صبحكم الله بالخير جميعا

الأكلات المكية لها طعم ونكهة ونشأة
واللي تحلي الأكلات وتطعمها زيادة إنو لكل أكلة مناسبة تتعلق بيها
وما ناكلها إلا في المناسبة حقتها

نحنا كدة المكاوية وبالزات العتقية القدم لنا تصانيف وتباتيك في الاكل والشرب مايعلم بيها الا الله عز وجل
ماشية معانا من أيام ما فنو الأوادم

واللي خلاني أكتب هادا الموضوع هو موضوع مشرفتنا حفيدة الحسين في المركب عن السقط
وطبعا دارت الردود على انو للأكلات مناسبات تتعلق بيها
وحرد على سؤالك يا لمتواضعة

أقروا الموضوع ومخمخو وبعدين قولوا رأيكم عن هادي العادات


طيب يا ستنا حفيدة انت والمتواضعة والكلام للجميع

الأكلات المكية ترتبط بعادات ومناسبات يعني كل اكلة ولها مناسبة زي أيش ؟؟؟

هيا خدو عندكم ....

1/الرز البحمبص والسقط والمعرق أو المختوم والششني هادي الأكلات خاصة بالعزا وزيادة في التوضيح
اليوم الأول والتاني والتالت يطبخو الرز البحمبص واليوم التالت اللي يسموه قطع العزا يسوو الششني والمعرق والمختوم والسقط

2/الكابلي أو الزربيان والسمبوسك والطورمبة هادي يسووها وقت المناسبات والأفراح للرجال
أما الحريم يجيبولهم الميز طبعا زمان أول مافي لا ميز ولا يحزنون ياكلو من نفس أكل الرجال بس يسووقليل بريك او بف بالجبنة والا باللحمة شغل بيتي يعني واللي تعرف تسوي كيك بالبرتكان او الموز تسوي صينية علشان يحلو بيها
بعدين فن علين الميز والشغلات الجديدة هادي


3/المعدوس ( الرز عدس ) هادا يسووه المكاكوة يوم الغيم والمطر ومعاه روبيان مكشن بالقوطة والبصل والفلفل الأخضر وزلطة حمر
وكيف لو كنا ساكنين في بلاد الخواجات على كدة كل يوم معدوس علين البطن تسير زي الطبلة

4/الملوخية الخضرا هادي تتعمل في اليوم الأول من السنة الهجرية الجديدة على الغدا من باب التفائل إنو ربنا يجعلها سنة خضرا وخير للجميع

5/الحليب أبو الهيل هادا برضو كمانة ينشرب في صبحية أول يوم في السنة الهجرية الجديدة

6/السليق هادا يسووه في المناسبات لمن يكون الجو باااااااااااااااااارد زي هادي الأيام

7/الدبيازة معروفة على ما أعتقد للجميع يسووها للفطور أول يوم العيد

8/المعمول والغريبة يسووها في أيام الحج

9/السمك مايتاكل إلا في الشعبنة علشان في رمضان
الناس ماتاكل السمك بس هيا كدة عادة
شعبنة يعني اضرب سمك وصيادية

10/عشرة عاشورا ( 10 محرم ) رز زربيان الحلو
وزلطة لبن أبو الفلفل

11/السحلب يسووه في الأيام الباردة زي دحين علشان يلم العضم ويدفي الجتة بالزات لو فيلو شوية جنزبيل

12/القهوة الملوزة اللي يحطولها لوز بجلي مهروش طبعا هادي وقت البزورة ما ينجحو والا يسقطو يسوولهم هيا قيد ماتفرق
لو البيت فيلو خمسة بزورة ناجحين وتلاتة صاقطين رايحين يلغو القهوة الملوزة

13/وغير أكلات رمضان الخشاف والماسية ومكارنة باللبن إزا تعرفوها والقطايف هادي ياكلوها من السنة للسنة

14/المجلب ( مجموعة أعشاب مخلوطة عن العطارين ) زماااااان ويمكن دحين مافي حرمة تنفس وتولد إلا يصنجوها مغراف مجلب علشان يكرت وصخ البطن والولادة وينضفها

15/ الزلابية واللقيمات ( اللنقطة ) أول ما ينقال اسمها نتزكر العيد والفطور حق العيد


16/ السلالي والمقلقل واللحم نفتكر على طول عيد الحج يندبح الطلي ومايبقى شي منو تبارك الرحمن
كل شي يتاكل فيه علين الرجول يسوو بيها مقادم والمفاصل نلعب بيها كبوش والجلد يفرشوه على عتبة البيت زي الدعاسات دحين والديل نشوح البزورة بيه زي البواكير
ههههههههههههه

زي ماشفتو الأكلات اللي قلنا عليها لها مناسبة أو وقت معين تتاكل فيه
مع انو يمدينا ناكلها طووووووووووول السنة مو مشكلة ويمكن كتير ناس هجروا
وفلتو تباتيك زمااان الا مارحم الله بس هيا زي ماتقولوا شغلة تعود

وعلى قولة المسل الله لايقطع العادة إلا بسلااامة

وأنا من عادتي لمن أغلق أقلكم
في وداعة الرحمن
دعواااااااااااااتكم

والا مووووو

منور يا عمدتنا
وزي ما قلت يا
في أكلات مكاوية مخصصة بوقت معين
مع إنو يمدينا ناكلها في أوقات كتيرة
لكن الخصوصية اللي أنوجدت لدي الأكلات
خلت لها طعم وحضور مميز

زي حضورك المميز على طول يا
منور مرة تانية

يا اهلا وسهلا بمحد مكيفو !!!

منور المكيات بموضيعك الحلوه

بس حابه اوضح شي

10/عشرة عاشورا ( 10 محرم ) نسوي العاشوريه

وفي انتظار جديدك المميز

ودمت في حفظ الله

ما شاء الله تبارك الله

كفيت ووفيت في الاكلات الله يعطيك الف صحة وعافية

وبصراحة شوقتنا لكل الاكلات

وعلى العموم تسلمو علىالموضوع

_16/ السلالي والمقلقل واللحم نفتكر على طول عيد الحج يندبح الطلي ومايبقى شي منو تبارك الرحمن
كل شي يتاكل فيه علين الرجول يسوو بيها مقادم والمفاصل نلعب بيها كبوش والجلد يفرشوه على عتبة البيت زي الدعاسات دحين والديل نشوح البزورة بيه زي البواكير
ههههههههههههه_



هههههههههههههههههههههههههههههههههههه


والله من جد فصفصتو الطلي مشالله



محد مكيفــــــــــــــو



ربي يسعدك على كلامك الحلووووووووووووو



ماننحرم طلتك يرب

حتى لية الطلي يسوبها سمن ليه

”

المشاركة الأصلية كتبت بواسطة محد مكيفو !!! صبحكم الله بالخير جميعا الأكلات المكية لها طعم ونكهة ونشأة واللي تحلي الأكلات وتطعمها زيادة إنو لكل أكلة مناسبة تتعلق بيها وما ناكلها إلا في المناسبة حقتها نحنا كدة المكاوية وبالزات العتقية القدم لنا تصانيف وتباتيك في الاكل والشرب مايعلم بيها الا الله عز وجل ماشية معانا من أيام ما فنو الأوادم واللي خلاني أكتب هادا الموضوع هو موضوع مشرفتنا حفيدة الحسين في المركب عن السقط وطبعا دارت الردود على انو للأكلات مناسبات تتعلق بيها وحرد على سؤالك يا لمتواضعة أقروا الموضوع ومخمخو وبعدين قولوا رأيكم عن هادي العادات طيب يا ستنا حفيدة انت والمتواضعة والكلام للجميع الأكلات المكية ترتبط بعادات ومناسبات يعني كل اكلة ولها مناسبة زي أيش ؟؟؟ هيا خدو عندكم .... 1/الرز البحمبص والسقط والمعرق أو المختوم والششني هادي الأكلات خاصة بالعزا وزيادة في التوضيح اليوم الأول والتاني والتالت يطبخو الرز البحمبص واليوم التالت اللي يسموه قطع العزا يسوو الششني والمعرق والمختوم والسقط 2/الكابلي أو الزربيان والسمبوسك والطورمبة هادي يسووها وقت المناسبات والأفراح للرجال أما الحريم يجيبولهم الميز طبعا زمان أول مافي لا ميز ولا يحزنون ياكلو من نفس أكل الرجال بس يسووقليل بريك او بف بالجبنة والا باللحمة شغل بيتي يعني واللي تعرف تسوي كيك بالبرتكان او الموز تسوي صينية علشان يحلو بيها بعدين فن علين الميز والشغلات الجديدة هادي 3/المعدوس ( الرز عدس ) هادا يسووه المكاكوة يوم الغيم والمطر ومعاه روبيان مكشن بالقوطة والبصل والفلفل الأخضر وزلطة حمر وكيف لو كنا ساكنين في بلاد الخواجات على كدة كل يوم معدوس علين البطن تسير زي الطبلة 4/الملوخية الخضرا هادي تتعمل في اليوم الأول من السنة الهجرية الجديدة على الغدا من باب التفائل إنو ربنا يجعلها سنة خضرا وخير للجميع 5/الحليب أبو الهيل هادا برضو كمانة ينشرب في صبحية أول يوم في السنة الهجرية الجديدة 6/السليق هادا يسووه في المناسبات لمن يكون الجو باااااااااااااااااارد زي هادي الأيام 7/الدبيازة معروفة على ما أعتقد للجميع يسووها للفطور أول يوم العيد 8/المعمول والغريبة يسووها في أيام الحج 9/السمك مايتاكل إلا في الشعبنة علشان في رمضان الناس ماتاكل السمك بس هيا كدة عادة شعبنة يعني اضرب سمك وصيادية 10/عشرة عاشورا ( 10 محرم ) رز زربيان الحلو وزلطة لبن أبو الفلفل 11/السحلب يسووه في الأيام الباردة زي دحين علشان يلم العضم ويدفي الجتة بالزات لو فيلو شوية جنزبيل 12/القهوة الملوزة اللي يحطولها لوز بجلي مهروش طبعا هادي وقت البزورة ما ينجحو والا يسقطو يسوولهم هيا قيد ماتفرق لو البيت فيلو خمسة بزورة ناجحين وتلاتة صاقطين رايحين يلغو القهوة الملوزة 13/وغير أكلات رمضان الخشاف والماسية ومكارنة باللبن إزا تعرفوها والقطايف هادي ياكلوها من السنة للسنة 14/المجلب ( مجموعة أعشاب مخلوطة عن العطارين ) زماااااان ويمكن دحين مافي حرمة تنفس وتولد إلا يصنجوها مغراف مجلب علشان يكرت وصخ البطن والولادة وينضفها 15/ الزلابية واللقيمات ( اللنقطة ) أول ما ينقال اسمها نتزكر العيد والفطور حق العيد 16/ السلالي والمقلقل واللحم نفتكر على طول عيد الحج يندبح الطلي ومايبقى شي منو تبارك الرحمن كل شي يتاكل فيه علين الرجول يسوو بيها مقادم والمفاصل نلعب بيها كبوش والجلد يفرشوه على عتبة البيت زي الدعاسات دحين والديل نشوح البزورة بيه زي البواكير ههههههههههههه زي ماشفتو الأكلات اللي قلنا عليها لها مناسبة أو وقت معين تتاكل فيه مع انو يمدينا ناكلها طووووووووووول السنة مو مشكلة ويمكن كتير ناس هجروا وفلتو تباتيك زمااان الا مارحم الله بس هيا زي ماتقولوا شغلة تعود وعلى قولة المسل الله لايقطع العادة إلا بسلااامة وأنا من عادتي لمن أغلق أقلكم في وداعة الرحمن دعواااااااااااااتكم والا مووووو

انا الى اعرفه ان اهل مكه قريش الهواشم وان قريش شهد لهم القران الكريم
بانهم اهل اللغه العربيه الفصحى وانت ياعمده حطيت مع الموائد حروف والوف (حرف الذا )فيى كلمه الذات وانت تنطفها (الزات ) مو معقول الشى الى بيصير ما تعرف تنطقها مو مشكله بس ما تعرف كيف تكتب ما اصدق
لـــــــــــــذا .ارجوا من الاخوه المكاويه الاصل المحافظه على اللفه العربيه لن منبعها مكه
ولكم جزيل الشكر على المرور

يا عزيزي جسار
لو جبت كل المنتديات العربية والخليجية
لوجدتها كلها تتحدث اللغة العربية شأنها في ذلك شأن منتديات قبلة الدنيا
ولكن سوف تلاحظ جلياً أن هناك ممن يتحدث بـ ( لهجة ) أهل المنطقة التي يشارك فيها
أرجو أن لا تأخذ هذه الملاحظة منك مأخذاً كبيراً
اللغة العربية نفتخر بها ونعتز بها
ولكن تظل أيضاً اللهجات لمختلف المناطق في بلدنا مختارة من قبل البعض

أشكر مشاركتك هذه وأرحب بك عضواً جديداً وفعالاً
في منتدياتنا

جســــــــار


يسعد مساكــ


_لـــــــــــــذا .ارجوا من الاخوه المكاويه الاصل المحافظه على اللفه العربيه لن منبعها مكه _



لاحظــــ انتا في منتدى كلهم مكاويه وهيا دي لهجتنا



بالعكس نفتخر من بينننا محافظ عليها لأنها من جد بدأتندثر زي مانثرت اللغه العربيه




ليش يعني نتخلىى عن لهجتنا هل هي عيب...؟؟؟




عادي يعني كل المنتديات بجميع اجناسها بيتكلمو حسب منطقتهم ...


راحت وجات علينا ...!!!



اللغه العربيه لغة القرآآن ماختلفنا


لكن هنا بنتكلم عامي لاننا نعتبر كاسره واحده إالا لوكنت بين اهلك تتكلم لغه عربيه شي تاني....!!!



اسفه بس كلامك شدّني



تحياتي لكم

أسعد الله جميع أوقاتكم بالخير والمسرات

بداية لا أملك إلا الدعاء لك يا عمي محد مكيفو بدوام الصحة والعافية
وأن يجعلك ذخرا للمنتدى

ماشاء الله تبارك الله لم يمض على موضوع الأخت الفاضلة حفيدة الحسين إلا كم يوم
حتى أوفيت بوعدك وأشبعت فضولنا واستفساراتنا عن الأكلات المكية
ومايلازمها من مناسبات

ثانيا أسلوبك ماشاء الله به جاذبية أقرب إلى السحر تتميز بخفة الدم وبعد النظرة والحكمة في الأمر
وهذا ديدن الحكماء والخبراء أمثالكم

لا أخفي عليك معرفتي ببعض هذه الأكلات والجهل بالباقي
يمكن تقصير مني أو لعدم وجود أناس ضليعين أو من الجيل القديم في بيئتي المحيطة يعلمونا
عن الماضي الأصيل والجميل وكما تعلم الجيل الجديد هو جيل السرعة والإستقلال كل شخص
بمعزل عن الأخر حتى وجبات الطعام لا ننجمع عليها إلا أحيانا


تعليق بسيط على رد الأخ الجسار

أخي الفاضل ما هكذا تورد الإبل
اللغة العربية هيا لغتنا الأم
لكن لكل منطقة لهجهتهم الخاصة بهم مثلا الحجاز لهم لهجتهم المميزة
ونجد اللهجة البدوية
والمنطقة الشرقية أقرب إلى الخليجية
والمنطقة الجنوية أقرب إلى اليمنية
وقس على ذلك بقية اللهجات في أنحاء العالم

”	مو معقول الشى الى بيصير ما تعرف تنطقها مو مشكله بس ما تعرف كيف تكتب ما اصدق

أخي الفاضل ليس هكذا من يريد النصح
الرقي مطلوب أولا وأخرا

بالعكس أنا أكثر ماشدني لموقع مكاوي تحدثهم باللهجة المكية
وبصراحة أكثر شدتني لهجة العم محد مكيفو لأنها لهجة قديمة قد أندثرت ولم يبقى لها أثر إلا ما ندر
من الناس الموجودين


أخيرا إذا كنت تريد اللهجة العربية أن تبدأ بنفسك ثم تبدأ مع غيرك

”

انا الى اعرفه ان اهل مكه قريش الهواشم وان قريش شهد لهم القران الكريم بانهم اهل اللغه العربيه الفصحى وانت ياعمده حطيت مع الموائد حروف والوف (حرف الذا )فيى كلمه الذات وانت تنطفها (الزات ) لـــــــــــــذا .ارجوا من الاخوه المكاويه الاصل المحافظه على اللفه العربيه لن منبعها مكه ولكم جزيل الشكر على المرور

انا ( أنا ) الى ( اللي ) اعرفه ( أعرفه ) ان( إن ) اهل ( أهل ) مكه ( مكة ) قريش الهواشم وان ( وأن ) قريش شهد لهم القران الكريم
بانهم ( بأنهم ) اهل ( أهل ) اللغه ( اللغة ) العربيه ( العربية ) الفصحى وانت ( وأنت ) ياعمده حطيت مع الموائد حروف والوف (حرف الذا )فيى كلمه ( كلمة ) الذات وانت ( وأنت ) تنطفها ( تنطقها )(الزات )

لـــــــــــــذا .ارجوا ( أرجو ) من الاخوه ( الإخوة ) المكاويه ( المكاوية ) الاصل ( الأصل ) المحافظه ( المحافظة ) على اللفه ( اللغة ) العربيه ( العربية ) لن ( لأن ) منبعها مكه ( مكة )

ولاتنسى أخي الفاضل بأن لغتنا هي لغة الضاد
وعند القبائل والبدو بشكل عام ينطقون الضاد (ظاد )

على سبيل المثال و ( لا الضالين ) تنطقونها ( ولا الظالين )
يعني هذه بتلك
أرجو أن تتقبل كلامي بصدر رحب