منتديات مكاوي

منتديات مكاوي (https://forum.makkawi.com/index.php)
-   المواضيع المميزة (https://forum.makkawi.com/forumdisplay.php?f=27)
-   -   صورة من زمان (2) (https://forum.makkawi.com/showthread.php?t=85282)

بشكة إنسان 20 Apr 2010 06:57 AM

صورة من زمان (2)
 
قبل المغربية مع خالة خيرية = تزهم وتنادي إنتي فين يابدرية
بدرية في السطوح مع علوية = يفرشو الطراريح ويخشخشو الناموسية
يالله يابنت إنتي وهيا بسرعة شوية = حاضر ياأمي دقايق ونخلص من القضية
واد يا أسعد فين أخوانك البقية = في الزقاق بيلعبو عسكر وحرامية
أزهم عليهم يطلعو لا تجيهم الجنية = صلي عالنبي ياأمي دي ساعة مغربية
صدقة يا عباااااااااس أطلعو بلا أزية = طيب طالعين خلاص مع ستي مهدية
مهدية لخيرية أولادك هدول فرفوشية = زفوني في الدرج يقولولي ياستنا ياعسلية
عباس مجروح في رجلو بقزازة مرمية = وصدقة ببجامة مقلمة وصخة زي الميكانيكية
خيرية .. إيش هادا حسبي الله عليكم شقاوية = مهدية ...لا تضربيهم عشاني وإنتي رضية
حاضر ياأمي عشانك بس المرة دية = يالله قدامي إنت وهو أتروشو من الحنفية
وإنتي يا أمي أجلسي جمب المصلية = عشان إذا أدن تصلي المغربية
وإنتو يابنات يالله تعالو نسوي المقلية = ونزبط زلطة الحومر والفلفلية
بعد المغربية . ياولد ياساتر طريق ياخيرية = أتفضل يبو اسعد مافي غير عمتك مهدية
كيفك ياعمة نورتي البيت ياعودة وعنبرية = تعيش ياجوز بنتي كلك ذوق ومفهومية
هيا سمو بالرحمن ونقنقو من المقلية = ونونو نونو لقمة هنية تكفي مية
أسعد يوشوش أبوه يبغى هدية = ماشاء الله نجح وأتخرج من الثانوية
أبشر ياولدي بس تجي فلوس الإكرامية = ولايهمك يبويا مافي مشكلة حصبر شوية
ياواد عباس إيشبها كدا رجلك ملوية = دخلت فيها قزازة يبويا من العصرية
تاني مرة فتح عينك لا أخرملك هيه = ولا اشوفكم تلعبو حفايا ترى تاكلكم التكرونية
بدرية .. يبويا فين حتودينا هادي الصيفية = والله يابنتي كالعادة الطايف حي البخارية
الله يسعدك يبويا نبغى أبها البهية = يابنتي أبها بعيدة مرررررة وسفرية
خلاص اللي تشوفو يا أغلى أب في الدنيا ديه = بنت ياعلوية ناوليني الكمر حقي والسديرية
أنا خارج دحين ياخيرية رايح الشامية = أودي صك الوقف حق بيت السليمانية
خلي الأولاد يسبقوني للحرم تحت المكبرية = عشان نصلي العشا ونكسب الفرض سوية
بعد العشا وفي السطوح عند المشربية = خيرية تفت العيش في الحليب وبدرية مسلقحة متحنية
هاتي ياعلوية الجبنة البلدي والحلاوة الطحينية = وكمان كم بيضة نسوي شكشوكة في الصينية
لمة حلوة وظريفة وعيلة عفوية = أتعشو وعليهم بالخير يدورو عالناموسية
عشان يصحو بدري مع أدان الفجرية = لاسهر لاكسل يومهم كله نشاط وحيوية
فينك يا ايام زمان تشوفي حالناوالفوضجية = مانعرف راصنا من رجلنا وحياتنا سارت ملوخية

الحقوق محفوظة لبشكة إنسان
1 / 5 / 1431هـ


&&بنت الحجاز&& 20 Apr 2010 08:04 AM

ابدااااااااااع قمة الابدااااع ياسيدي بشكة

:006::006::006::006::006:

ومنجد وبدون مجاملاااات ..ياسيدي فيييينك من زمااااان

بشكة إنسان 20 Apr 2010 09:50 AM

الله يسلمك بنت الحجاز . شرفتينا بطلتك الميمونة

انا موجود ياستي .


إنتو مبتقوووووش ليه مش تبئو تيقو


:a21:

Roooma 25 Apr 2010 03:56 PM

الله الله الله على ايام زمان

ولمة زمان .. وهرجة زمان

تسلم الايادي سيدي بشكه استمررررررررر كلامك حلو وخفيف على الادن

في انتظار جديدك .. تقبل مروري :128:

بشكة إنسان 26 Apr 2010 07:47 AM

اقتباس:

المشاركة الأصلية كتبت بواسطة roooma (المشاركة 850658)
الله الله الله على ايام زمان
ولمة زمان .. وهرجة زمان
تسلم الايادي سيدي بشكه استمررررررررر كلامك حلو وخفيف على الادن
في انتظار جديدك .. تقبل مروري :128:

الله يخليكي ويحفظك ... وشكرا على تعليقك . ياروووما

حلو كتير 26 Apr 2010 02:12 PM

احلى من كده مااااافيش

:a09::a09:

بشكة إنسان 26 Apr 2010 03:01 PM

اقتباس:

المشاركة الأصلية كتبت بواسطة حلو كتير (المشاركة 850845)
احلى من كده مااااافيش

:a09::a09:

الله يحلي ايامك يا استاااااااااااااذ . معليش بنتعدى على تخصصك شوية :a41:

لمسة ورد 27 Apr 2010 06:48 PM

اللة اللة فين كاااان بشكة...


من جد ررووووووعة

تسلم باسيدي

في انتظار جديييييدك..

محمد أبوحميدي 27 Apr 2010 08:46 PM

صورة لماض جميل في قصيدة أجمل
شكرا لك بشكة انسان

فرفوشة مكة 27 Apr 2010 09:22 PM

[COLOR="DeepSkyBlue"]ماشاء الله شي رووعة واللهي[/COLOR]

الله يسعدك دايما تدخلنا معاهم في الجو خخخ


بالتوفيق

ونستنى احلى الجديد


^^


الساعة الآن 10:28 PM.

Powered by vBulletin® Version 3.8.11
Copyright ©2000 - 2019, vBulletin Solutions Inc.

Ads Management Version 3.0.1 by Saeed Al-Atwi