(1)
1972م

الأب: ما عندنا بنات يشتغلون..الشغل للرجال .. و البنت تكمل تعلومها للإ بتدائية وتقعد في بيتها لين ما يجيها النصيب، الخير وايد والحلال متوفر….



(2)
1982م


أبو صالح: ..سمعت عندكم شواغر وطالبين مدرسات تربية إسلامية و تربية أسرية…

الموظف: أبشر طال عمرك.. الأوراق كاملة؟

أبو صالح: نعم ما خليت ورقة إلا و جبتها….

الموظف وهو يقلب الأوراق: طلبك مكتمل..وبرفعه للجنة و إذا صار شي هم بيتصلون بك..

أبو صالح: ما قصرت يا ولدي.. بس انتبه يرشحونها مدرسة موسيقى.. ترى الموسيقى حرام!







(3)
1985م



الأب: كل يوم الساعة وحدة الظهر أستناكي عند باب المدرسة.. ولا أشوفك تتأخرين..

أبلة عايشة: يعني وين بروح الله يهديك يا بوي.. من البيت للمدرسة.. و من المدرسة للبيت!



(4)
1990م



الأم: يعني شو فيها لو البنت اشتغلت في المستشفى؟

الأب: مستشفى؟.. وش تريدين الناس يقولون عنا.. بنت بو سالم تشتغل "سيستر"؟

الأم: لا تقطع رزق البنت مب يكفي إنك مانعها من الزواج علشان تشتغل… بعدين هي محصلة وظيفة زينة في قسم الاشعة براتب حلو..مش أحسن من قعدتها في البيت..

الأب: طيب…كم الراتب؟



(5)
1995م



حمد: تعرف يا علي…أنا مستحيل أتزوج وحدة تشتغل… ما أريد عيالي يتربون عند الشغالات

علي:صدقت و الله.. أصلا المفروض الزوجة تقعد في بيتها تربي عيالها..فالأم مدرسة إذا أعددتها أعددت شعبا طيب الأعراق.

حمد: أنا مستغرب صراحة من صاحبنا سلطان.. ما أدري كيف مخلي زوجته تشتغل .. لا و في مكان مختلط!

علي: نسيت إنه دارس في أمريكا.. وش تتوقع من واحد راجع من هناك!



(6)
1999م



أميرة: الحمدلله تخرجنا أخيرا من الجامعة.. و حصلنا على درجة الامتياز..يا ترى وين قدمتوا على وظايف ؟

سميرة: أنا ما خليت مكان إلا قدمت أوراقي فيه.. حتى السوبرماركت الي جنب بيتنا حطيت أوراقي عنده..

مريم: أنا كلمت أخوي و إن شاء الله بيشوف لي وآسطة في شركة من شركات البترول..

منيرة: طيب خليه يشوف لي معاه.. رواتبهم يقولون زينة.. أحسن من رواتب الحكومة .. ما تأكل عيش..

نهلة: أما أنا يا بنات قدمت بالتعليم أريد أصير مدرسة..مالي في الدوائر والوزارات..

أميرة: من أول ما عرفناك و انتي نكدية.. حد يروح للنكد برجوله؟



(7)
2001م



الزوجة: حبيبي …. أنتظرك على الغداء وللا بتتأخر كالعادة؟

الزوج: لا تغدي أنت و الأولاد.. أنا مرتبط باجتماع هام مع مديرتنا في الدوام.

الزوجة: طيب..بس لا تنسى تجيب معاك كيلو بطاطس و إنت راجع.



(8)
2002م



البنت : أمي.. انا اليوم مابرجع إلا على المغرب… صديقتي عبير عزمتني على الغدا في مطعم في المول..وبعدين بروح معاها بنقضي مشاوير العيد

الأم : فيه مكان مخصص للعائلات..

البنت : أي عائلات يا ماما…. أقولك في مووووول!

الأم: طيب.. بس ارجعي بسرعة قبل لا ينتبه أبوك لغيابك…ويسوي لنا قصة.



(9)
2003م



أم أحمد: وينك يا حبيبي.. اتصلت عليك أكثر من مرة وما رديت؟

أبو أحمد: آسف يا حبيبتي.. الظاهر ما انتبهت لصوت الموبايل

أم أحمد: طيب وينك للحين ما رجعت.. ما اتفقنا نروح السوق؟

أبو احمد: أووووه.. تصدقين أنني نسيت هذا الموعد تماما؟

أم أحمد: طيب والحين؟

أبو أحمد: خليني أشتري لي باقة من محل الورود لزميلتي سعاد في الدوام..بكرة آخر يوم لها في الدائرة.. وبعدها نروح لأي مكان يا حبيبتي.

أم أحمد: و لا تنسى أن تجيب لي معك لي باقة من الجوري الأحمر.



(10)
2004م



أم أمل : أمل.. اليوم بعد المغرب أريدك ان توصليني بيت خالتك

أمل: اوووه يا أمي…ياليت تروحين مع السواق أو تأجلينه ليوم ثاني.. فأنا مشغولة جدا اليوم.

أم أمل: وشو هاالشغل المستعجل الي يشغلك عن أمك ولايمكن تأجيله؟

أمل: صديقاتي في الدوام بيسوون (بارتي) صغير في فندق ماريوت على شرف صديقنا ماجد بمناسبة ترقيته إلى منصب مدير..ولزموا علي إني أحضر..

أم أمل: طيب.. ولكن حاولي ما تتأخرين لين نص الليل..فأخوك حمدان إذا عرف "يمكن" يتضايق…



(11)
2005م



المدير: اليوم جمعتكم علشان أخبركم بقرار الإدارة بمنع لبس النقاب للموظفات

موظفة1: أداوم بدون نقاب…مستحيييل!..بكرة استقالتي بتلاقيها على المكتب

موظفة2: لا و الله .. ما أضحي بالراتب علشان النقاب…من بكرة النقاب بخليه في البيت.

موظفة 3: يا ما نصحتكم و قلت لكم .. بلا نقاب بلا بطيخ..الدين يسر والوجه والكفين مش عورة!



(12)
2006م



أم أحمد: شو رايك يا حبيبي نتعشى الليلة في مطعم؟

أبو أحمد: فكرة جميلة.. ولكن أظن ما عندك مانع لو عزمت زميلتي منى في الدوام علشان تجي معانا؟

أم أحمد: لا أبدا .. و بالمرة بعزم زميلي خالد وزوجته صفية..من زمان ما جلسنا معاهم.

أبو أحمد: ليش لا.. صفية دمها خفيف!



(13)
2007م



المصور مخاطبا الموظفين والموظفات لالتقاط صورة جماعية بمناسبة الحصول على جائزة التميز:



لو سمحتوا..الطويل ورا والقصير قدام….

ممكن تقربون من بعض … close أكثر…

آنسة أم شعر أشقر… قربي شوي لزميلك…

الأخ الطويل أبو شماغ أحمر و عقال تقول كفر شاحنة……قرب أكثر..إيدك بإيد الي جنبك…. آخ بس ياليتني مكانك!

الأنسة الي في النص أم عباية قوس قزح….ايوة انتي ممكن تتقدمين للصف الأمامي.. وتقعدين جنب زيملك….

لا.. لصقي أكثر فيه لو سمحتي… عادي عادي لا تستحين.. انتوا زملاء عمل……ما اريد فراغات في الصورة..

يالله الكل جاهز… Everybody say Cheeeeeeez…

>>>>كليييييييييييك>>>>>



(14)
2008م



خولة: بصراحة أنا مليت من الوضع هنا.. صار لي سنتين بدون ترقية.

خالد:انتي عارفة زين إنه مديرنا عنصري ومتحيز.. و علشان تترقين لازم تغيرين اسلوبك في التعامل معاه..

خولة:كيف يعني؟.. قول لي وش أسوي أسوي؟

خالد: وش رايك نروح كوفي شوب.. نسولف فيها على راحتنا.. ترى الحيطان لها آذان..

خولة: ليش لا.. اصلا أنا مالي مزاج أشتغل اليوم..

خالد:طيب نروح بسيارتي و للا سيارتك؟



(15)
2020م



فهد: وش رايك اليوم نغير جو .. ووأعزمك بعد الدوام على الغدا؟

هند: همممم يعتمد على المكان

فهد: أحسن بوفيه.. في أحسن فندق..

هند: طيب شو بتقول لزوجتك؟

فهد: زوجتي.؟….لا تخافين .. نحن عايلة (فري) زميلها لؤي في الدوام ..عازمها على "غداء عمل"!

خخخخخخخخخخخخخخخخ فلللللللللله
وهادا اللي بيصير الله يخلف على حالنا
مره عجبني الموضوع يسلموووووووووو

ههههههههههههههههههههههه

والله شي ومو شي

ياناس تتفلسف وياناس متعقدة مرررة والحال يمشي بالتدريج

الله يستر من اللي جااااااااااااااي

ثااانكس عالجولة التاريخية دي

*_*

ههههههههههههههههههههههههههههههههههههاي
طب تعرف انو الشي دا اللى دوبي قرأته انا وكل صحباتي عاملين منو كزا نسخه وتقريبا فكل جمعه نعمل سيناريو حلو عن الجيل الجي

الله يستر بس منو من تهاويله

ههههههههههههههههه
ان شاء الله مايصير فينا كذا

الله يستر من الجااااااااااااااي...

مشكور مكمكاوي...