رحت علشان أعبي لي جالون زمزم من مكان السقيا اللي في مواقف كدي ..

والحقيقة تفاجأت بالمنظر اللي شفته ..

خاصة من العمال اللي مكوشين على كل بزابيز الزمزم ..

وعاملين عليها كمان منطقة محظورة ماتدخلها ..

وياليت أقتصر الأمر على مكان واحد ولاعلى عدد معين من البزابيز بحيث تكون فيه اماكن تانية يعبي منها اللي زي حالتي

جي بجالون واحد يبغى يعبيه ..

لو ما الله ارسل لي السكيورتي الموجود هناك وسمعني اتجادل مع التكارين الموجودين على دا الوضع ..

وكيف يحرمو الناس من انها تعبي ..

فأخد من يدي الجالون واعطاه التكروني وقله عبيله الجالون ..

كان يمكن قعدت هناك للعصر ماقدرت اعبي الجالون ..

الكلام دا حصل يوم الجمعة الماضي ..

المفروض يخصصو مكان للي عنده جالون اتنين او على الاقل يخصصو لهم بزبوز ولا اتنين ..

ماهو يخلوهم يكوشو على كل المكان ..

فعلا شي مؤسف

مع اني ماقد روحت ولا شفت بس بجد شي يقهر يعني الواحد كانو بيشحت !!

الله المستعان

اولن سلمت الايادي على الصور الجميلة للموقع وطريقة تعبية الجوالين في الشيب بكدي ومشكور ومجمل على النقله لنا

والله يا سيـدي عاشق نقول ايش ونخلي ايش .. ايام رمضان الواحد يمسك سره بالساعات وتقول لمين وتشتكي مين !!

اروح اعبي اكتر من 2000 جالون في رمضان بالاصح قبل رمضان بتلاته اسابيع والاقي الناس فوق بعض وبالقوة الاقي احد يرضى يعبيها وبحقوا طبعا .. اجل ايش نقول في الا معاهم عدد قليل يروحوا مساكين وسط العدد الكبير .. ولا تنسى انو في ناس كتير بتتصدق بهادي الجوالين وتعبيها لمساجد يعني بتكون خيرية فصعب منعهم من التعبية حتى لو عدد كبير ,,,

من رايي انو يكون عدد البزابيز اكتر من كده وخاصة في ايام المواسم ومكة سارت طوول السنة مليانه الصلاة على النبي

وفين المشرفين على هادا الشي ما يشوفولنا حل لهادي الورطة الا نحن فيها كلوا كم شهر وفي رمضان خاصة

ربنا يعمرك يا مكة ولا يحرمنا جوارك

تمنياتي للجميع بقضاء اسعد واجمل الاوقات في رحاب البوم الصور المكية بمنتديات قبلة الدنيا


اخوك \ ولد الشاميه ( اهل الدهب بالوقيه )

.. أحزان ..

أحسلك لا تروحي وخليك بعيد على طول ..

لحسن إحنا الرجال مافي غير دفدفة وأكتاف في بعض ..

شاكر ومقدر لك حضورك وتفضلك بالرد ..

.. ولد الشامية ..

أسأل الله العافية لكل ساعي للخير والله يكتب الأجر للجميع ..

بالتأكيد أنا لا يمكن أني أطالب بمنع تعبئة الجوالين حتى لو وصل عددها بالألاف ..

أنا أقول ليه مايتم تقسيم المكان ..

مكان للجوالين الخاصة بالمساجد والأماكن الخيرية ..

ومكان مخصص لأبو جالون أتين خمسة بالكتير زي حالاتي ..

سواء بزيادة عدد البزابيز أو بتخصيصها ..

وبلاشي شغل حجز البزابيز دا اللي صاير ..

شاكر ومقدر لك تواجدك وتفضلك بالرد ..

والله انا دايما اعبي جالون واحد او اتنين


لذلك ماصارلي موقف ..
بس اذا كان على كذا

من جد يبغالهم يوسعوا مكان التعبئة ..

ليشمل عدد اكبر من شراابين الزمزم ..


يالله سلامو عليكو ..

مشكور ومجمل سيـدي عاشق على التواصل الجميل والمتابعة الجيدة منك للموضوع

ها جينا دحين في نقطة جيدة انتا قلتها .. تعبية الجوالين بشكل كبير ممنوع اصلا ويقلك لازم ورقة من المشرف في الشيب عشان ما يسويلنا شي .. وفي الحقيقه ما قد شفت مشرف اصلا هناك عليهم .. المهم تلاقيهم اي وصاية تديهم هيا يوافقوا وياخدوا العدد الكبير هادا على دفع ويعبي ويرجع ياخد مجموعة من الجوالين ويعبيها لوحدها وزي كده لين ما تخلص الكمية كاملة .. ولو يسووا اماكن خاصة لتعبية المساجد والاماكن الخيرية فراح يكون في مشرف مختص يقلك هات ورقة تسبت انو لمسجد او مكان خيري .. وهرجة المشرف على العدد الكبير سببها: عشان يقلك الناس الا تعبي وتبيع وهما ما يبغوا الشي هادا يحصل ,,,

يا عمي الزمزم من عند ربنا ليه ما يكتروا البزابيز ويخلوا الناس تعبي وتشرب وتسترزق الله بدل ماهي جالسه لا شغله ولا مشغله

تمنياتي للجميع بقضاء اسعد الاوقات في رحاب البوم الصور المكية بمنتديات قبلة الدنيا


اخوك \ ولد الشاميه ( اهل الدهب بالوقيه )

ابو خالد

هناك دراسات مكثفة وتوجيهات من مولاي خادم الحرمين الله يحفظه ويديم عزه .

بإنهاء هادا الوضع .

المشروع المقترح مكلف جدا جدا جدا

لكن نقول إن شاء الله على أبو متعب مافي مستحيل .


الصبر طيب

ان شاء الله يكون هناك حل

.. ALRa7eL1 ..

أنا هذه أول مرة أروح أعبي فيها زمزم من بعد مانقلت لمكة ..

وصار معايا الشي اللي شفته في الصور وأتكلمت عنه ..

والحمدلله إنه أنت ماسبق وصارت معاك ..

وأتمنى إنه دا اللي بيصير بيصير في أوقات محددة ..

وحقيقة أنا رحت بعد صلاة الجمعة مباشرة ..

بعد كدة يبغالي أختار أوقات مايكون فيها زحمة ..

شاكر ومقدر لك حضورك وتفضلك بالرد ..