منتديات مكاوي

منتديات مكاوي (http://forum.makkawi.com/index.php)
-   الحلويات و المشروبات (http://forum.makkawi.com/forumdisplay.php?f=52)
-   -   طريقة عمل الكماج (http://forum.makkawi.com/showthread.php?t=85075)

رعشة دفا 07 Apr 2010 10:27 PM

طريقة عمل الكماج
 
بسم الله الرحمن الرحيم

الكيكة الاسفنجية


http://www.up.qatarw.com/thumb-8-2009-9fcivxa8.jpg

وايضا مايقال عليها زمان لاهل مكة الكماج

وهذي من مطبخي الخاص

وتقدرو تحشوها باللي تحبوه وتعملوها طرطة

وكمان هذي مثل كيك مخابز بدر اللي ابو السكر

وبالعافية وسمحت لمن ينقلها لتعم الفائدة للجميع

واليكم مكوناتها وطريقتها

واللي تعملها تدعيلي مو تاكلوها ولاتدعولي


http://www.shmou3.com/vb/uploaded/1142/709ec34cc8.gif


10= عشرة بيضات وسط

5و1 = كاسة ونصف دقيق ابيض المهم بدون خميرة

1 = كاسة سكر مطحون اوسنتر فيش اوخشن كله يمشي

1 = ملعقة طعام واحدة زبدة سائحة عشان تطلع هشة ويمكن الاستغناء عنها

وتوضع اخر شغلنا

شوية فانيليا يعني رشة بسيطة عشان ريحة البيض تروح

واللي تحب تحط اي ريحة ثانية بكيفها بس بيتغير طعمها على حسب ماتبغاه

يعني لوريحة برتقال تطلع طعمها برتقال ولو ليمون يطلع طعمها ليمون

ولو ريحة موز يطلع طعمها موز

ولو نسكافة يطلع طعمها نسكافة ولوكاكو تطلع كاكو وهكذا

وكل واحد ة بذوقها وراحتها

http://www.shmou3.com/vb/uploaded/1142/85634ef28a.gif

تحضر المقادير جميعها


http://www.up.qatarw.com/thumb-8-2009-w2vrrzj7.jpg

نضرب البيض جيدا

http://www.up.qatarw.com/thumb-8-2009-outjvri6.jpg


ثم نضع السكر ونضربه بالخلاط مايقارب عشر دقائق ويمكن تأخذ ربع ساعة

كلما انضرب البيض مظبوط تظبط اكثر ويختفي اي شريط اصفر

حتى يصبح كالكريمة مايتغير شكله جامد مايهبط مرة ولو حطينا الدقيق ياليد

ونضع الفانيليا ونخلطها جيدا ونتوقف عن استعمال الخلاط


http://www.up.qatarw.com/thumb-8-2009-4ik0m00n.jpg

ثم نضع الدقيق شوية شوية نرشه رش حتى مايهبط البيض

ونحركه بخلاط يدوي بهدوء بسيط بطريقة دائرة ونص الدائرة حتى مايخرج الهواء

حتى تنتهي الكمية ثم نضع ملعقة الزبدة السائحة بنفس الطريقة حق الدقيق وتختفي


http://www.up.qatarw.com/thumb-8-2009-eiebsyyu.jpg

ثم نضع الخليط في صينية مدهونة بزيت وشوية زبدة ونصبه دفعة واحدة ثم ندخلها الفرن

http://www.up.qatarw.com/thumb-8-2009-08tw9m35.jpg

والفرن لازم يكون حار قبل وضع الصينية حتى ماتهبط الكيكة وتكون درجة الحرارة 130 مؤية

وكل واحد حسب الفرن اللي عندها المهم يكون متوسط الحرارة

ويكون مولع فقط من تحت لمدة خمس دقائق ثم نولعه من فوق وتحت حتى تنضج اويحمر السطح

ملاحظة لايفتح الفرن اثناء الخبز الا بعد مرور خمس دقائق على الاقل

ولمعرفة النضج نضع عود اسنان بالوسط للتأكد انها استوت وماعلق بالعود شي من الكيكة


http://www.up.qatarw.com/thumb-8-2009-zvd2ou2e.jpg

ثم تقطع حسب الرغبة وهي حارة احسن


http://www.up.qatarw.com/thumb-8-2009-gz5ho91y.jpg


وكما اشرت من قبل يمكن نعملها طرطة تقطع بالنص ونشربها باي شراب

وتحشى باي كريمة ترغبوها وكلا حسب رغبته وبالهناء والعافية مقدما

سمرة 08 Apr 2010 02:56 AM

اللــــــــه . . كُـمـــاج من زماااان ماسمعت الكلمة دي ههههه

تسلمِ يارعشــة على الكماجة دي ... دحين يؤلو كيكة جاتوه ... وتارت وووو

يعطيك ِ العافية وتسلم الايادي



بس ياختي 10 بيضات وااااو في كيكة وحده .. خلصنا الطبق كلو ! ما يبقى شئ للشكشوكة !

كتييييييييييييييييييييير 10 .. أنا صراحة ما أزيد عن 3 بيضات بالزبده أو الجزر أو الكويكر

ومره عملت كيكة الطبقات ب بيضتين فقط ... أختي بتمزح وتسألني مافي كيكة أبو بيضة ونص ! ؟

ههههههه ... مش بُخل ولا حاجة كلها تجاربي والحمدلله نااااجحة ...

أنا حاجرب طريقتك بس 3 وبعدين أقلك النتيجة .... طيب فُــتّـك بعافية يارعووووشة

رعشة دفا 08 Apr 2010 10:25 PM

مو سرها ياسمرة بالبيض عشان تطلع كماج
ومقرمشة
تقدري تنزلي لثمان بيضات وباقي المقادير مثل ماهية
بس لازم يكون ماء حار تحت الاناء اللي تضربي فيه البيض عشان
تتنفش اكثر ولاحظي مافيه خميرة ولابكنج بودر
يعني اعتمادنا فقط على البيض

ولوحطينا مساعدات اخرى راح تخرب المقادير كلها

وبعدين ترى البيض مرة صغار يعني يادوووووووب
اللي بالصورة اكبر من البيض البلدي بدقة بسيطة

ولاحظي الصينينة كبيرة

وترى الكيكات تختلف عن بعض بالطعم

واذا تبغي مقادير كيكة عادية
وعلى ضمانتي وبكرة تدعيلي

يكفي ست بيضات
كأس دقيق ( الكأس هو كاس الجبن الكبيرة السائلة)
وثلاث ارباع الكأس سكر ناعم
وفانيليا
ولو عندك عرق الحلاوة ينباع عند العطار
يعني تحطي شوية بعد ماتدقيه بالهوند ناعم مرة
ربع ملعقة الشاي حق التقليب
كدا تضمني نفشان البيض بسرعة وتضمني ماتهبط بالفرن

(ويمكن استبدال ملعقة الزبدة بالزيت وتزيدي ملعقة موية بالاخير
وتطلع الكيكة مروية وتقدري تستغني عن الزبدة اوالزيت والموية)

ولماتخرجيها من الفرن خليها تبرد شوية واقسميها بالنصف
وشربيها بسفن اب من جوه وبرة واقطعي اطراف الكيك
حتى تظبط في تغطيتها وحشوها اما بكريمة شانتيه مخلوطة بعصير
اي عصير فواكه او مخلوطة بقشطة او حليب مع الشانتيه

او زبدة كبيرة مضروبة جيدا بنصف كأس سكر ناعم جدا جدا
وربع كأس ماء فيه 4 ملاعق مليئة حليب بودرة وفانيليايجنن طعمها

اوتغيري كامل الكيكة باضاقة ملعقتين كاكو وتنقصي من الدقيق ملعقة بس
وتعملي ايضا تغطية بحشوة كاكو ودريم ويب وشوية قشطة وفانليا

وتبشري جالكسي في السطح كمان تجنن وبرضو تشربي الكيكة بسفن اب
او موية وسكر فيه شوية فانيليا برضو تطلع طيبة

وطريقة تشريب الكيكة تبخي بخ باناء حق الماء حق اللي مثل
نستعمله للكوي

حزاري تغريقيها

وتقدري تعملي نصف مقادير الكماج عشان تخلي للشكشوكة
ومنتظرة تجربتك ويسلمووووووو ع المرور
واي استفسار انا بالخدمة

قمورة مكة 27 Apr 2010 01:29 PM

آهلين رعووشهـ ..

هههههههههههههه اختلف العلمآآء .. حطي بيض وزيدي بيض

بس شكلها لزيزة مامتي ربي يخليها تحب الكيكآت اللي نكتر فيهآ البيض عكسي تمآمآً

< متعقدة من البيض من صغري

شكلي حطلب منك وصفة كيك بدون بيض هههههههه

ومشكورة يا عسل ع الحلى الطعمـ زي صآحبتو

لا تحرمينا حلويآتك

قمورة

رعشة دفا 05 Jul 2010 11:04 AM

مشكورة قمورة مكة الله يحلي ايامك ياستي
بس هادي الكماج حق زمان وفين تلاقي اشياء زمان
وتكاتيك زمان
ويسلموووووووووووووووو

ام عنود الشمري 21 Sep 2016 10:56 PM

مشكوريييين يسلمووووووووووووووووووو


الساعة الآن 04:58 PM.

Powered by vBulletin® Version 3.8.11
Copyright ©2000 - 2020, vBulletin Solutions Inc.

Ads Management Version 3.0.1 by Saeed Al-Atwi