المساعد الشخصي الرقمي

مشاهدة النسخة كاملة : ..}{كان ياماكان حكونا اهلنا من زمان}{..


حمامه الحرم
21 May 2007, 10:02 PM
السلام عليكم ورحمة الله وبركاتة

كيفكم يا مركازين ان شا الله كلكم بخير


كان يا ما كان كلمه سمعناها من كنا اطفال و ستمرت الى الان
وترددت على الِسنه ابائنا وامهتنا وحتى جدودنا وكنا نستمتع بيها في اكثر الاحيان
تعالو يا يبناتي و اولادي احكيكم حكايه عن مكه زمان
كانت مكه صغيره قد البستان
واهلها كلهم حبايب وجيران
يسودها الخير والبركه ونحس فيها بالامان
كل اهلها بين بعضهم اخوان
وتماشينا كانت شي جنان
نجيب الكربو والفصفص وديك البليله الى عليها الطرشي والخل كمان
ونجيب معانا الراديو ونسمع طارق عبد الحكيم وفوزي محسون وننطرب مع الالحان
بعدها نرجع البيت واحنا اخر بسطه من التمشيه الى جات بعد طول حرمان
صلاتنا كلها في الحرم ونستعد ونتوضى من يوم يادن الادان
وبعدها نلعب كروره مع اولاد حارتنا بروح حلوه حتى الي يخسر ما يكون زعلان
ورجال الحاره يجتمعو في المركاز ويتناقشو ويشربو الشيشه اصلا هيا معاهم في كل مكان
الله عليكي يامكه والله وحشتنا ايامك حقت زمان
من جد كان يا مكان في قديم الزمان

اكيد كل واحد فينا عندو عن مكه قصص كتير كانو اهلنا يحكونا هيا وكنا مره نتبسط بيها وانا حبيت انزل الموضوع دا عشان نسمع قصص اهلنا الي حكونا هيا ونشوف مكه كيف كانت ايام زمان


وانا منتظره انو كل واحد في المنتدى يكتب قصه في كتاب قصص مكاوي ونحتفظ بيه لينا ويتوارثو اولادنا بعدنا
ويسير كتاب قصص مكاوي اجمل كتاب عن مكتنا الحبيه زمان


وحكايه المقص كلمتين وبس
حقوق الطبع محفوظة

....سراب....
22 May 2007, 07:10 PM
السلام عليكم ورحمة الله وبركاته
موضوع جدا رائع
بس رح احجزلي مكان على بال ما ارجع كدا بزاكره لي ورا
واخلص اختبارات عشان اامخمخلو تمام
تسلم يدك يا عسل

حمامه الحرم
22 May 2007, 07:12 PM
السلام عليكم ورحمة الله وبركاته
موضوع جدا رائع
بس رح احجزلي مكان على بال ما ارجع كدا بزاكره لي ورا
واخلص اختبارات عشان اامخمخلو تمام
تسلم يدك يا عسل

اهلا يا سروووب يلا مستنيه قصه منك بس لا تتاخري

حمامه الحرم
22 May 2007, 07:15 PM
الرجااااااااء تغير اسم الموضوع الي كتاب قصص مكااوي وشكرااااااا

بنت العزيزيه
23 May 2007, 12:03 AM
السلام عليكم ورحمة الله وبركاته
يسلمو يا اختي على الموضوع المبدع دا
وخليني اروق واخلص من اختباراتي الاسبوع الجاي وليا رجعه مع القصص

حمامه الحرم
23 May 2007, 05:33 PM
السلام عليكم ورحمة الله وبركاته
يسلمو يا اختي على الموضوع المبدع دا
وخليني اروق واخلص من اختباراتي الاسبوع الجاي وليا رجعه مع القصص

مين في موضوعي الدكتوره زوزه وانا اقول ليش نور اهلا اهلا
طيب يا ستي انا مسنيه الين تخلصي اختبارتك والله يوفك يارب
بس مو تتاخري

ولد السقا
23 May 2007, 09:55 PM
http://forum.makkawi.com/imgcache/2957.imgcache

حمامه الحرم
23 May 2007, 10:07 PM
عفوا يا سيدي
وتسلم على مرورك العطر

محد مكيفو !!!
12 Jun 2007, 08:42 AM
السلام عليكم ورحمة الله وبركاته

مرحبابك ياحمامة
موضوع حلو ومكلف
ماشاء الله مشاركات حلوة ومفيدة وان شاء الله على طول ترميلنا مواضيع ومشاركات

والله لو جلسنا نهرج ونتكلم ماراح نغلق

يالله نتكلم بسرعة كدة عن بيوت زمان
طبعا زي منتي عارفة زماااان الدنيا كانت ماشية بالبركة والستر
مو زي دحين تبارك الرحمن الفلوس موجودة والجيوب عمرانة
حتى اللي مستور ماشاء الله عندو بيت

أول أغلب البيوت كانت مبنية من اللبن ( التبن بقايا القمح والقشور وووو + موية + تراب ) تتخلط مزبوط ويبنو بيها
بعد مايسووها زي الدراديم على شكل الاجور او الطوب

وبرضو في منهم كانوا يسوو البيت من الطمي ( التراب الناعم المالس لونو بني على احمر )
او اللي يسموه تراب المطر وخصوصا شقة المزارع مع السيول تتكون النوعية هادي من التراب
وبرضهم يسوو منه الصحون والشراب الفخار
وهادي طبعا اقوى وبالزات لمن تنشف في الهوا والشمس

بعضهم كانت بيوتهم عبارة صنادق وعشاش

يشترو الابلكاش الواح الوح ويقصقصوه ويسمروه جمب بعض ويسوولو فتحات صغيرة ويغطوها بالشرك
علشان التهوية يعني المهم حاجة يخشو راصهم فيها

بعضهم كانوا يسوو بيوتهم من الصاج والتنك زي تنكة الزيت ابو شوكة وملعقة عارفينو
كانت زمان تجينا تنكات كبار لزيت ابو بقرة
البعيد يجيبو الساطور والا الشاكوش
ويقدحو التنك يفكوه ويبردو الاطراف حقتو علشان لاتجرحهم ويربطوها ويلصمقوها مع بعض
صحيح بيت مكنكن لكن مصيبتو وقت الحر يسير البيت زي الفرن حراااااارة وشي يطلع الروح
وبرضو وقت البرد يبرد الصاج ويلسع الناس لسع من كتر البرد والتنك يبرد زي القسطير

بعضهم كانوا يجيبو سعف النخل لمن ينشف ويسير كبير يفردوه في الارض ويجيبو كم حبة ويلفوها زي العقد
حبة فوق حبة فوق حبة ويخلوها على جمب ( علشان اقربلكم المنظر تقريبا زي المفتة
عارفينها هادي صوفرة اهل اول وساعات تشوفو الحجات والتكارنة يبيعوها عند الاشاير والكباري )
المهم قصرو بلا طول سيرة
بعدين يجيبو اربعة قدد خشب مزبوووووطة من الاصلي وينحفرلها في الارض زي نص متر ويغرزها في الاركان
ويالله كل جهة يجيبو السعف اللي مسوينو ويربطوه بالحبال ويشدوه مزبوط علين يندك

هو صحيح البيوت يمشي حالها واحيانا وقت المطر والعج والهوااااااا تطير العشاش وتتفكفك الصنادق
لكن يرجعوا يركبوها ويزبطوها
وكانوا اللي يسكنو في زي هادي الاماكن وقت الحر يرشو التراب اللي قدام بيتهم بالموية
منو علشان الطراااااوة ومنو كمانة علشان لو انفك هوا مايدخل التراب جوة البيت

وفي ماشاء الله الميسورين والمستقدرين يسسو بيوتهم مزبوطة بالسمنت والخرسانة وووو

شوية شوية الناس كترت ومن كترتها صارت تبني وتعمر فوق بعضها
مسلا انا بدي اتجوز وماعندي بيت يجي جاري يقلي اطلع فوق سويلك بيت
ان شاء اللله لوصندقة صغيرة نخش راصنا مع الحرمة
وسبحان الله كانت ميسرة ومسهلة
تلاقي البيت صغير اسفل الديوان والقاعة الا هيا مقام الصوالين والكنب والباطرمة دحينة
ويسوو غرفة صغيرة او زاوية صغيرة ويسموها المركب واللي يسمع يفكر حاجة كبيرة زي دحين
وهيا يادووووب طباخة على دافور وطاوة وقدرين وصحنين توتوا ونملية والحمدلله

طبعا في كمانة السقيفة او اللي يسموها كمانة المصروقة
يسووها في الغرف يسير يلمو الكركبة والقرمبع الزايد ويدسوه علشان البيت يقعد مرتب ومرفع
وهيا يسووها بالاخشاب تترص قدد جمب بعض ويسوولها باب وال استارة من القماش تغطي الكدوة اللي عليها
في كمانة الطيرما الغرفة الفوقانية مرررررة برضو زي المستودع
الخارجة وهادي زي السطوح يندرو اهل البيت في الجو البارد يفرشو النامسية ويرقدو
والا ينشفو الرز المبلول بموية المطر والا السكر المليان ضر يخلوه يتصفى

وسبحان الله البيوت الشعبية والله ماتحسي بالطفش او الزهق
من الصبح البيت يلعب فيه الهوا يمين شمال
وغير الشمس تقدحو من الصبح للعصرية يتشمس مزبوط

يالله نلقط نفسنا ويمكن نرجع مرة تانية ازا الله اراد

هيا اودعناكم في حفظ الرحمن

حمامه الحرم
12 Jun 2007, 03:00 PM
سيدي محمد مكيفو فعلا مني عارفه ايش اقول غير ماشا الله لا قوه الا بالله
اثريت موضوعي بمعلومات جدا جدا رائعه
بصراحه اول مره اعرف دي الاشياء
يا الله كيف كانت الحياه بسيطه ورغم بساطتها حلوه اي شي يرضي الناس
دحين يجيك الرضا ما ترضى الحمد لله على كل حال
بصراحه شوقتنا لمعلومات وحكايات حلوه
يعني دحين اعطيتنا معلومات عن البيوت

طيب ممكن كل مره يكون عن شي بصراحه انا طمعت في كرم حكاياتك الرائعه
ويا ريت تكون عن الاماكن الي كنتو تروحها عشان تتمشو

ربي يسعدك ويبارك فيك يا عمدتنا
والله من جد اقل ما يقال ليك هوا شكراا

محد مكيفو !!!
13 Jun 2007, 08:38 AM
السلام عليكم ورحمة الله وبركاته

ياستي لاشكر على واجب
نحنا خدام المكاكوة كلهم على قد ماربي يقدرنا

والله التماشي والحاجات الحلوة بصراحة راحت ايامها
لاتماشي اليومين هادي بتعجب ولا شي

المهم تبغي الهرجة بالم نشرح ومفصفصة والا كدة كم سطر على الماشي

ازا حبيتي نففصفص الهرجة ناخدها حبة حبة على قولهم

عرفة اول مكان يخطر على بالنا
وغير الاماكن اللي خارج مكة زي وادي فاطمة الزيمة ابو عروة الخيف عين شمس هدى الشام
اليمانية والقشاشية رهاط وهادي زي الايسكريم علشانها منطقة عالية
ياكانت فيها مزارع وبساتين واسجار كبيرة وفاكة قطع وكل محد يقلك شي

المهم خلونا نقضي واحد يوم من ايام التماشي وبالزات الشعبنة


طبعا يتلمو قيلة ( يعني في الضهر ) وبالزات لمن يكون الجو حلو بارد مو زي اليومين هادي رطوبة وزمطة ولسلسة العرقان تصبصب زي البزبوز طبعا يتـفـقو قبل كم يوم ويحركو من بدري علشان يمسكو محل مزبوط
وكانوا يتحركو من بدري يصلو الصبح حاضر يسير النور لمن يفج والشمس تطلع الا وهم قيد ماسكين الطريق

مو زي دحين نحرك بعد العصر ونسمر علين الساعة نص الليل وكل مين على بيتو
يقلك يزهقو طول النهار والليل يقيلو ويسمرو
وازااا اجبرناهم يجلسو ماسكين المكر والخزاوة ومادين بوزهم شبرين

قصرو
وقيد العفش مرتب ومرصوص
وكل بيت يجيب معاه اللي ربنا يقدرو عليه من أكل وشرب وطافوحلي وليانات وحنابل والعاب وووو
ويجيبو الشراشف وينقو اكبر سجرة ويفرشو تحتها علشان الفية والضلة ويفرشو الحمبل ويربطو الشراشف
علشان الشمس ماتصرعهم البعيد
وبرضو كمانة علشان الكشف يعني
وياخدو معاهم طلي بس يكون حي يسير يشعبن معاهم ويشوف الدنيا قبل ما يتكل على الله
ههههه


القصد لمن يجي الليل يحطوه على القبلة وبسم الله
ويسوو منو هداك القدر حق الزربيان ويسوو مقلقل وسلالي وشوية كبدة على الصاج يشوحوها
واوصال لحم على الفحم
مع زلطة الطحينة ياسلااااااااااااااااااام شي رجج
زي ما تقولو نقـنقة علبال ما ينحكر القدر

طبعا الحريم والستات الكبار يهتمو بالطبيخ والنفيخ
مكتوب عليهم الشقاااا وحتى وهم برا البيت
والبنات القطع الشباب يعني يعطوهم الزلطات يتلهو فيها ويسووها


طبعا مو شرط انهم يدبحو طلي كلا على حسب استطاعتو ناس احيانا يخلوها دجاج
وناس تمشيها فول وتميس وناس تدردب تعتيمة خفيفة
مايدقـقو هم جيين يمبسطو ويفلكو عن نفسهم والا جيين علشان الطافوحلي

بس اغلب الناس أول زي منتو عارفين غرااااامهم تربية الطليان والدجاج
فيجلسوا يربو ويضرموا الطلي علين يمسك حيلو ويتربرب بعدين يرفعوه للشعبنة
واللي بدو يشعبن على اكلة سمك والا جاوي كل مين على حسب مراقو ومطنو وتصنيفتو زي ما بنسمع اليومين هادي

المهم يسمرو لقريب الصبح طبعا زي منتو عارفين أهل أول غراااااااااامهم الضومنة والكيرم البرجون والكبوش والصوقيطة
خصوصا أنا أموووووووت في الكيرم واتحدى أي واحد في الكيرم لدرجة انو يستني دورو علبال ماياخد المضرب
وساعات أنا احن عليه واقلو هيا خد العب
ههههههههههه
بس دحين ليا سنين يمكن مالعبنا كيرم صح وعلى اصولو كلها يعني بهللة وتضيعة وقت مع الحبايب

وازا كان فينا حيل وخصوصا الشباب يدقو كوووووورة وازا كانت
الشعبنة رجال يميلو شوية على المزمار

بس وفي الاخير بعد مايغلقوا من اللعب والنطنطة والبرمان
يجي وقت طق الحنك وخصوا النكت ( اللي بالي بالكم )

والبهللة ماتحلا الا في الليل مع براد الشاهي
المنعنش والا إن كان الجو باااااارد نسوي قدر السحلب ونخليها ألم نشرح بس أول شي نصرف البزورة والا نرقدهم
هههههههههههههههه

والحريم طبعا أصواتهم تلعلع اللهم صلي على النبي
فلانة فيها وفلانة يخطيها حتى في التماشي مايبطلو عادتهم والحش حقهم واشترينا فساتين واشترينا دهب هادا هرجهم زي ماهو علين تقوم القيامة
ياسلام على أول وبساطة زمن أول على قد ما كانت الدنية بسيطة وماشية باللززعلى قد ما كنا نفرح ونمبسط ونتسلى ومحد شايل في قلبو على أحد
مو زي دحين
الناس صارت تكره الشعبنة والمصيبة أهلية في بعضهم وحتى لو جوو مجاملة والا من ورا قلوبهم زي المغصوبين وكل مين مادد بوزو شبرين ويتقعدو لبعضهم في الكلام ويقولوا فلانة قاعدة زي بقر الحرام مافزعت معانا ولا عبت الصوفرة ولا سوت الزلطات وغير البنات مو جايبين خبرها دوبهم في الجوالات والفورة والهرج الفاضي والشغل أترمى على الخدامات والحريم جالسين في طق الحنك


حتى البزورة كمانة معد صارو يحبو لا شعبنة ولا هباب
يقلك اقعد في بيتي العب كومبيوتر واتاري احسن من التماشي
اللي زي وشكم قال ايه افرد فرشة على التراب
واشم هواااا مو اجلس في الحوش حق بيتنا احسن ؟؟؟
والله بيني وبينكم تبغوا الصراحة معاهم حق
الأشياء اللي كانت تبسطنا وتسلينا زمان
بالنسبة للجيل الجديد صارت تغمبج قلوبهم وتطفشهم
دحين يبغوا يشعبنو برااااا وناس على الكباين وبيوت البحر

يعني الكلام يطول ويطول لكن هادي هيا الشعبنة باختصار

ايوا افتكرت حاجة قبل ما اروح الشعبنة ازا صادفت ايام حر ورطوبة ولسلسة وزمطة
زي هادي الايام يخلوها في البيوت يعني عشوة صغيرة
وبعضهم يروحوا لسطوح مكة ( الهدا ) الله يهد عافية الشيطان

يالله باقي تمشية البحر ان شاء الله احكيكم عنها بكرة ان الله احيانا
هيا لاتنسونا من دعواتكم
وفي اماان الله

حمامه الحرم
14 Jun 2007, 02:13 AM
والله من جد احلى تمشيه واحلى شعبه
فين الشعبه دحين اصلا سار مو الكل يعملها
والله معلومات مره رائع
خلاص يا عمدتنا ان حستنى منك كل مره شي عن مكه زمان
ماشا الله عليك ربي يخليك لينا وللمنتدى
يلا انا بستنه تمشيه البحر يا سيدي شوقتنا عليها
وتسلم يا عمده محمد مكيفو

محد مكيفو !!!
14 Jun 2007, 06:50 AM
السلام عليكم ورحمة الله وبركاتة

تماشي البحر ان كان بحر جدة والا بحر مكة الشعيبة



ناخد زيادة معانا مناشف وحوايج زيادة وكم جالون موية
طبعا من تباتيك زمان كنا لمن نروح البحر لاااااااااااااااااااااااازم
ننزل ونطشطش بالموية ونمشي رجولنا من الصوغار علين الكبار

يقلك علشان ينفك النحس والعكوسات طبعا كلو بامر الله
ونجيب جك والا مغراف كبير ونتروش بموية البحر
ولمن نغلق نجيب جوالين الموية ونتروش بيها علشان تطلع الملوحية
حق البحر علشان جتتنا لاتاكلنا ونفضل نحك ونهرش زي اللي صايبهم جرب البعيد

والبزورة يجيبو معاهم قدر صغير ويجمعو ابو جلمبو ( لاترقد جمبو ) تشيلو تحطو على يدك رجلك فخضك
صحيح يجزع بس حلو وساعات يندر ابو جلمبو ويفلت البيت حقو يلملمو البيوت ويلعبو بيها كومكم
ويبشكو البزورة بالتراب حق البحر ويكشو بعضهم ويسوو بالتراب ابراج وعماير واوقاف زي اللي شايفينها دحين
ههههههههههههه

على الضحوية اللي في راص اهلو عوم وغطس ينزل ينقي سمك طبعا الشغلة هادي أكتر حاجة في الشعبنة مع الاصحاب
لانو الاهلية صعب ننزل ونفلتهم لحالهم

والا يزلو على البنقلة ويشترو حوت وابو مقص وروبيان ووزف
يركبو جمبو قدر ابيض وقدر صيادية
والوزف يقلوه وبعدين يرشو عليه ملح دقة وشطة تكروني ويتاكل زي الناشف حق البويوم
والحريم يزبطو الحوت ويبزروه ويقلوه واحلى حوت ياجماعة لمن تاكلوه على البحر من جد طعم اخر حلاااوة

ولمن نغلق التباسي والقدور مزفرة ايش نسوي
ننزل على البحر ونجيب من التراب الناعم ونفرك التباسي بيها وتندر الزفرة منها ونغسلها بموية البحر

قبل لا نمشي وعلبال مايجمعو العفش يروحو على البحر ويتفرجو على الشمس لمن تغيب
والدنيا حمراااااااااا وخدو من الكلام الحلو زي حق سيدنا ابو اصيل

طبعا البزورة بعيدين والا كان صارت شغلات تبكي

هههههههههه






افتكر من النوادر اللي سويتها فيهم
أخدت غفوة تعسيلة زي ماتقولو

قمت بنص عين زي المفجوع واناااااااااااااهج

ايشبك ايش في
عسى خير

قلتلهم حلمت حلم وابغاكم تفسروووه

حلمت البحر انقلب ملوخية

طيب ماينقلب ملوخية والا ينشف ليش شايل هم

قلت ماهي فارقة معايا بس اللي قالقني قد ايش عيش حب يبغالو علشان الفتة


اي والله ياجماعة تمشية من حقت اول من جد تغسل الهموم والطفش والزهق
وتريح القلب والباااااااال

حمامه الحرم
15 Jun 2007, 08:34 AM
يا سلام والله تمشيه ولا احلى شهيتنا على البحر
والله افتكر لما كنا صغار كنا نروح نسبح في البحر وناخد معانا جوالين مويه وشامبو وكريمات
ونا خد سبت شويه عالي عشان بعد ما نسبح نوقف فوقو ويحمومنا عشان التراب لا يعدم رجولنا ونلبس البجاما
ومن السياره نكون نمنا والله تماشي كنا من جد ننبسط بيها
نرجع من التمشيه واحنا اخر انبساط مو زي دحين وانت في وسط التمشيه يقولك احنا طفشانين

ربي يخليك يا عمدتنا وانا بستنا منك حكايه جديده الله لا يحرمنا من حكاويك الحلوه

العندليب12
16 Jun 2007, 01:33 PM
والله الله يديك الغافية أختي حمامة السلام على هذا الموضوع وأنا عندي حكاية بسيطة عنا أنا وأسرتي أتوفى أبونا ونحنا صغار طبعاً هدا الكلام في عام 1395هـ لكن الوالده الله يطول في عمرها في طاعته ما حسستنا بموت الوالد كانت تاخدنا في الإجازة زي هادي الأيام وعلى طول على موقف الطائف وناخد سيارة كمبوليت بيجو ونطلع الطائف عند خلانها يلي كلهم أتوفوا رحمة الله عليهم المهم إنه الأمهات زمان كانت عندهم حكمة وصبر وطولة بال ياريت أمهات دحين يكون عندهم زي هادي الحكمة والصبر وطولة البال وشكرررررررررررراً للجميع

العندليب12
16 Jun 2007, 01:34 PM
والله الله يديك العافية أختي حمامة الحرم على هذا الموضوع وأنا عندي حكاية بسيطة عنا أنا وأسرتي أتوفى أبونا ونحنا صغار طبعاً هدا الكلام في عام 1395هـ لكن الوالده الله يطول في عمرها في طاعته ما حسستنا بموت الوالد كانت تاخدنا في الإجازة زي هادي الأيام وعلى طول على موقف الطائف وناخد سيارة كمبوليت بيجو ونطلع الطائف عند خلانها يلي كلهم أتوفوا رحمة الله عليهم المهم إنه الأمهات زمان كانت عندهم حكمة وصبر وطولة بال ياريت أمهات دحين يكون عندهم زي هادي الحكمة والصبر وطولة البال وشكرررررررررررراً للجميع

ابو امنة
16 Jun 2007, 06:08 PM
بسم الله الرحمن الرحيم
السلام عيكم ورحمة الله وبركاته
اخواني في المنتدى ترى هادي اول مشاركة لية بصراحة موقع مكاوي ما عرفتو الا قبل مدة قريبة جداً والموضوع شدني بما فيه من حكايات بحكم اني من الناس اللي عاصروا او لحقوا شي من الشي . انا ابغى اتكلم عن الحارة اللي عشت فيها طفولتي وهي حارة النقا وعن بيتنا الصغير اللي كان يلمنا . كنا عايشين في بيت مكون من تلاتة غرف غرفة للضيوف وهادي محد يدخلها غيرهم وغرفة للنوم وفيها كمان جلستنا وغرفة للمركب الا هو المطبخ حالياً وحمام اعزكم الله وحنفية يعبيها السقا كل يوم حاجة بسيطة جداً مقارنة مع شقق وفلل هادي الايام بس والله ياجماعة اننا كنا مبسوطين كفاية اننا ملمومين على بعضنا واكلنا وشربنا سوا ومع هادا بيوتنا مفتوحة لبعضنا اهل الحارة كلهم يعرفو بعضهم والاكل اللي ناكلو ياكلو منو الجيران يعني صحوننا ديارة بيننا والمدرسة كنا نروحها كعابي والله على بياع الفول والترمس والحلبة لمن كان يخش الحرة وكنا نأازيه قبل ما نشتري منو وتعالو شوفو بياعين الخضرة كيف كانو كان الواحد منهم يفرش الخيشة حقتو ومعاه ميزان ابو سلسلة وكل واحد عندو نوعين او تلاتة من الخضرة يعني تشتري فاصوليا من عند عم صالح وتشتري بدنجان احمر من عم موسى وتمر على النونو علشان تشتري اللحمة وتطبخ امنا الله يرحمها الشي المتيسر على فكرة شاعرنا الكبير عبدالله دبلول ما قصر في وصف حياة اهل مكة وكلامو كلو صحيح . العابنا كانت على قد حالنا كنا نسويها بنفسنا وبالنسبة للزواج كان يصير في نفس الحارة بيت فلان للحريم والرجال كانو ينصبو البرزة بمشاركة الجميع وطباخنا مننا وفينا وما عندنا ( نتمنى لاطفالكم نوماً هادئاً ) لانهم هما روح الفرح وحلاوتو . في الحج كانت امي الله يرحمها تسوي المعمول والغريبة وكانت تحملها على روسنا بالتباسي عاشان ناخدها للفرن لانو ماكان عندنا افران زي دحين الا كان عندنا طباخة ودافور . تماشينا زي ماقالو اخواننا ناخد سيارة من الموقف ونطلع الطايف وللا نروح المدينة نزور الحبيب عليه الصلاة والسلام واحياناً نستاجر تكسي يوم كامل من الصبح اللين المغرب علشان نروح ابحر. نفسي اكمل واكتب كمان وكمان بس والله تعبت من كتر مااكتب على العموم اكيد غيري ما راح يقصر.

( ومن شكو الزمان شكة لايزعل ولايشيل هم دوغري يروح لاهل مكة )

حمامه الحرم
16 Jun 2007, 10:40 PM
العندليب والله يا سيدي سعدن بمشاركتك وزي ما قلت حريم زمان كان عندهم من الحكمه والصبر
سبحان الله الحياه علمتهم اشياء كتير نجهلها في زمننا دا وما نعرف قيمتها
والله مشاركه قيمه من شخص ممتيز زيك يا عندليب

حمامه الحرم
16 Jun 2007, 10:45 PM
سيدي ابو امنه والله من جد مني عارفه كيف اشكرك على النبذه الرااائعه الي اعطيتنا هيا عن مكه
خاصه انو كثير من جيلنا يجهل كيف كانت مكه قديمه عشان كده حبيت من الاعضاء المخضرمين الي زي حضرتكم
يمتعونا بقصص مكتنا الحبيه وكيف كانت زمان ربي يبارك فيك والله حسيت كاني ايشه في ديك الفتره وانتا بتحكينا
وموضوعي في انتظار حكيات حلوه منك فلا تحرمنا

العندليب12
17 Jun 2007, 12:38 AM
والله مشكوررره اختي حمامة الحرم وهدا من تواضعك

makkah butterfly
17 Jun 2007, 12:48 AM
مشكورة كتيييييييييييييييير
ياحمامة الحرم وماشاء الله عليكي
اهتمامك بتاريخ وحكايات اهل مكة زمان
وانا حالي من حالك بتعلم زيك
ولو كنت عارفة حاجة كنت جيت وقلت لك هي
لكني من اشد المتابعات للموضوع
واللي اتمنى انو الحكواتية اللي عندنا بالمنتدى
يجوا ويحكونا..حتى نعرف عن حياتهم زمان
كيف كانت وكيف سارت..
ونتعلم من طريقة عيشهم ومن طريقة تعاملهم مع الناس
وكيف كان الواحد فيهم يحس باخوه وينسى نفسو..
وربي يعطيكي الف الف عافية ياحمامة على موضوعك الرائع

وتقبلي تحياتي

حمامه الحرم
17 Jun 2007, 01:45 AM
احلى مكيه ربي يسعدك على دعمك ليا وان شا الله اعضاء المنتدى ما راح يبخلو علينا
بحكايات مكه الحلوه وتاريخها الجميل

لكي مني كل الشكحر والتقدير

حمامه الحرم
26 Jun 2007, 08:17 AM
فينك يا سيدي محمد مكيفو والله اشتقنا لحكايتك عم مكه وقصصك الحلوه
كل يوم اشوف الموضوع اقول يمكن اليوم كتبلنا وحده من قصصو الرائعه
يلا يا عمدتنا نحن في انتظارك ربي يعطيك العافيه

محد مكيفو !!!
27 Jun 2007, 06:55 AM
السلام عليكم ورحمة الله وبركاتة

تشتاقلك العافية يا ستي
معليش الاسبوعين التلاتة كنا وجعانين صخونة على زكمة على ضخضخة
الواحد مو قادر يرفع راصو
داعتو الحمد لله ربنا نفخ في صورنا ومسكنا حيلنا شوية
قلنا نسلم على الحبايب


طيب نتكلم عن اللبس زمااااااااان
علبال ما نمخمخ للحج ورمضان والعيد زماااااااااااان
لحسن حكاوي ترد الروح

هيا صلو على الحبيب


اللبس حق اول مرة حلو وكلام كتييييير
الحرمة كانت تلبس الكرتة الحلوة طويييلة ومحتشمة واللي مطرزة واللي منقرشة وكان تلبس على راصها
محرمة مدورة زي قضية الطرحة لكن هديك اكبر شويتين وتتلف على الراص والباقي يجلس مفرود ومبربخ قليل
وبعضهم كان يلبس الخلخال والا الدهب العريض اللي في الحلق
طبعا لافيه بنطلونات ولا قمصان مشقشقة ولا فلاين بدون اكمام ولا من التهاويل هادي اللي بنشوفها الله يكافيهم
وكانت لمن تخرج الحرمة من البيت زي الغراب ماتشوف الا حرمة سوووودا نادرة متغطية ومحتشمة مو زي دحين
الحجاب صار عادة مو عبادة وكل شغلهم أركب ماشي خشت العباية وهبدت الطرحة ورمتها على راصها زي مايجي
وندرت تلنقب على كيفها

سامعك يالللي تقول في بنطلونات للحريم
هديك مو بنطلونا سراويل طويلة بيضا زي حقت الرجال كانوا الحريم يلبسوها
علشان الحشيمة والستر
اخ على حريم زمان فين تلاقي زيهم دحين الا مارحم الله كان بوسنا روصهم

الرجال لبسهم التوب الابيض واللي عندو قرنقش يسويه مشتغل ومطرز بالقيطان
وبرضو السراويل الطويلة كانو الحريم يشتغلوها بيدهم في البيت من اسفل الرجول ومنظرها بالمرة حلو
وبعدين تجي الكوفية البلدي اللي يسموها كوفية صندقة زي الطربوش منفوخة على فوق
وبعدين تجي العمامة ويجي شغل الرجاجيل طبعا لف العمامة لو فن وطريقة مو كل مين يعرف يلفها
يعني يبغالها صنعة لطافة وشغل حراريف
في ناس يقيسو العمامة بس لف على الفاضي علين تسير فوق
راصو زي الكدوة منكوتة وملخبطة وراصو يسير تقييييل خصوصا ازا كانت العمامة طويلة
يعني لفها يبغالو اول شي يمسك الطرف حقها ويلفو بميلة بسيطة على الكوفية ويمسكو مزبوط
وبعدين بيدو التانية يبرم شوية شوية لا يشحطها مرة ولا يخليها مبربخة ومحلولة علشان لاتنفك كل شوية مع الحركة
ويكون اللف على شكل رقم تمنية داير مايدور والطرف الاخير اللي يبقى يا يدخلو جوة العمامة ويلفو
والا يدخلو من تحت العمامة على ضهرو يعني يسير زي ديل الحصان
وبعد كدة البقشة تتلف على الوسط وبعضهم يحط بدالها الكمر ويحط جوتها الفلوس والتابعية ومقلمية صغيرة خصوصا ازا كان (اكة )
وبعضهم يعزق جمبية في الوسط شكلها قريب من الخنجر حق اليمنة
وبعدين تجي الساعة الفضة ابو سلسلة تنشبك في السدرية وتنحط في الجيب كمان شكلها بالمرة حلو ولها نشأة وطلعة حلوة
والسدرية زي الجاكيت بدون اكمام في منها متين للبراد وفي منها خفيف للحر ولها الوان كتيرة
بس اللي كان دارج الاسود والبرتكاني
وبعدين تجي احسن حاجة احبها
عصاية المزمار هادي جزء اساسي في شخصية رجال الحارة وخصوصا ازا كان مشكل وفتوة حق الحارة
وناس كانو ياخدو بدالها عصاية اصغر شوية يسموها بومبية بس عيبها تنفشخ قوام وتنكسر

طبعا عصاية المزمار الاصلية تكون من خشب اللوز او الزان علشان هادا الخشب افضل الانواع
ولا ينعدم بالموية ولا يطق وينكسر كانت المزبوطة قد علبة جبنة الكريفيت المتن حقها وطولها
زي متر متر وربع
خصوصا وقت لعبة المزمار او المضارباااات

وبعدين الله يعزكم يجي الحدا ( ناس يقولوله مداس شرقي ) مدري عرفتوه والا لأ
وكانو يلبسوه زي البطاريق مايدخلو رجولهم كلها جوة زي البزورة
يدخل مشط رجلهم ويندرو نصها برا حتى الكعب يزحف في الارض علين الرجول تسير زي حفارين القبور
علين دحين اجيب الولاعة واحطها على كعب رجلي الله يعزكم
ولا احس بالحرارة
خلاص الجلد مات وخنزر

وطبعا في البيت يلبسو فلاين علاقي او نص كم ومعاها فوطة زي حقت الجاوات

بنفسج
27 Jun 2007, 10:38 AM
يا سلام عليكم ..
الموضوع مرة مزبوووط

---

سيدي محد مكيفو

والله مرة مشتاقين يا باشا
سلامات من الزكمة والصخونة ..
اشرب خاشكير .. ولا بابونج
وعندك العافية


---
وعيني على الموضوع اتابع الجديد فيه

محد مكيفو !!!
30 Jun 2007, 07:03 AM
السلام عليكم ورحمة الله وبركاته

صبحكم الله بالخير

ومرحبابك يا بنفسج سألت عنك العافية
طيبب ماشاء الله ماشين على العلاجات الشعبية

داعتو مسكنا حيلنا فين كنا وفين صرنا
الحمد لله على كل حال
وربي لايطرح جمب لكل الحبايب الموجودين

سامحونا اتحيرنا عليكم

يالله خلونا نمسك الهرجة بالسرا

نبدأ برمضان





لمن كان يخش الشهر الفضيل يضربو 21 مدفع ورا بعض بدون توقف وكنا نمبسط وننزغط
ونفرح كتير بالصوت ونجري ونفجع بعض
وخصوصا ازا كان اللي يدك المدفع معلم لأنو لازم ينحشي بالبارود مزبوط ويدك ويدخل االعصاية الى القلب حقو علشان مايبقى نسمة هوا داخلو علشان لو فيه قليل هو تسمع الصوت ضعييييف يعني زي ماتقول فاسد
وزي منتو عارفين مدفع للفطور والسحور وحق الموية برضو كان قوي علشان الناس تسمع

اما المسحراتي كانت ايامو مرة حلوة وخصوصا لمن يدور قرب السحور وبالطلبة يدقدق ( اصحى يا نايم ) (وحد الدايم ) ( سحورك ياصايم )وكان يزهم باسم راعي البيت وبزورتو يالله يافلان يالله يعلان
وكانت الناس قلوبها على بعض ويزهمو على المسحراتي ويعطوه من السحور حقهم يسير يتسحر معاهم
واللي حرمة ولية جالسة في البيت تدلدل الزمبيل وتعطيلو الاكل
وتاخد دعوة حلوة


المهم تلاقي الاهل والاحباب والاصحاب يتجمعو ويهنو بعضهم
واللي زعلان يتصالح ويتسامح علشان هو رمضان شهر البركة والتسامح فكل الناس تلاقي قلوبهم بيضا زي
البفتة مافي لاحقد ولا حسد وكره على احد


وتلاقي الحريم وبناتهم يستعدو ويبخرو الدوارق والمغاريف بالمستكة بعد ماينضفوها
ويزينوها ويشتغلوها بالقماش والكلف والتطريز يعني شي يفتح النفس
ويعبو الجلايل والليانات ويزبطو البيت من الى يسير في رمضان مايتعبو ويكونو مستعدين لإستقبال
الاهل والاصحاب علشان فكوك الريق




والناس خلاص قيد معبين ومقضين مقاضي رمضان كلها من اللحم والدجاج الى القمر الدين والماسية
يعني من زمان كانو المعلمين والرجال يقوم عايدي يشتغل وعلى الضحوية يقضو ويبضعو للبيت خضرة ولحمة
بحكم ماكان في تلاجات ولا برادات يعني كل يوم بيومو وربي لك الحمد والشكر
يسير مايبقى على الرجال الا قرب المغرب يزل على الفوال ويشتري الفول ويروح على العزب ياخدلو كعك
وازا كان حران ينتشلو سوبيا قيد في البيت معبين السمبوسك وشربة الحب والقطايف والشغلات الطعمة


ومن الاشياء الحلوة اللي راحت زماااااااااان من كتر ما الناس قلوبها على بعض الصفرة
في المغرب وقت الفطور تلاقوها عمرااااااااااانة ومليانة اللهم صلي على النبي من كل شكل ولون
بس ايش اللي عبى الصوفرة مو أهل البيت بالعكس
الجيران يعني كل واحد يركب اكلة لازم يرسل لجارو ويفتكرو بصحن والا صحنين
مو زي دحين نفسي نفسي لو ارسلت لأحد يقلعقلو ليش ارسلي هو انا فقير ماعندي حق اكلي
والا يقول في نفسو ازا كان شكاك وموسوس يمكن حطلي سحر والا سم البعيد يبغى يقضي عليا ؟؟؟
يعني الشهر كلو ماشاء الله صحون رايحة وصحون جية وغير الرسلات الى المساجد علشان الفقير والغلبان
واللي عابر سبيل ماشي يجلس ويفك ريقو ويابختهم بالاجر


طبعا الزحمة والصرفدة وفورة الدم كلها في حلق المغرب تلاقو الشوارع زي المحشر من كتر الناس
عند الفول والشربة والسمبوسك والتميس والسوبيا واللي حمش وعصبي يجلس في بيتو
احسن ما يندر ويجرح صيامو ويفور دمو


بعد صلاة العشا والتراويح تلاقو الرجال ينجمعو على المراكيز وهات يا هرج ومزح وبهللة
علين ميعاد السحور بالزبط وقت المدفع حق السحور او حق الاكل

مو المدافع وللمعلومية تلاتة انواع
النوع الاول حق الفطور والتاني حق السحور والتالت حق الموية هههههه
عارفين حق الموية بالنسبة لمدفع الموية يعني حق الامساك ماأدري انتو بتسوو في بيوتكم زي زمااااااان ولا لأ
قبل الادان ب3 دقايق تقريبا تشوف الناس ماسكة مغاريف الموية والكاسات وزي دحين القوارير
علشان اخر حاجة يسوها قبل الادان شرب الموية وهادي برضها من العادات وبعضهم يقول من التخاريف والتباتيك حقت اول علشان اتعودنا لو ماشربنا موية قبل الادان رايحين نعطش يومنا كلو
الحمد لله علين دحين مستمرة معايا هادي الطريقة تلاقيني قبل الادان ادور واقوم اللي نايم يالله قوم فز اشرب مويتك
لا تعطش

طبعا الصيام الاهل يعودو بزورتهم من صغرهم هو صحيح صيام من ورا الزير
ويمكن يندرق على السقيفة وياكل جبنة وشريكة والا يفك تونة لكن مرة على مرة وسنة على سنة يتعود
بالعكس اول كانو يعرفو البزورة اللي فاطرين وقت الادان حق المغرب تلاقي البزورة من غير شعورهم
يمسكو سمبوسك والا بف ابو الجبن وعلى طول الاكل تعرفو انهم فاطرين هههههههههه

طبعا رمضان كانو اهل اول وعلين دحين في ناس يقسموه تلاتة اقسام

العشرة الاولى للجزارين ( يعني يشترو اللحم والدجاج والمقاضي وكل طلبات الاكل والشرب حقت الشهر )

والعشرة التانية للخياطين ( تلاقو الزحمة عندهم علشان تفصيل تياب الرجال وكرت الحريم ودحة البزورة ههههه )

والعشرة التالتة للحلوانية والحلاقين ( عاد يقرب العيد ويعبو الحلويات اللومنية والحلقوم وابو بقرة واللدو واللبنية )
واخر ستة او خمسة ايام الزحمة عند الحلاقين يقصقص ويزبطو خلقتهم علشان العيد

سبحان الله من ضمن كلام اول يقلكم ( ازا عشر بشر )
يعني لمن تمر اول عشر ايام من الشهر على طووول تلاقيه يتقلفط ويمشي بسرعة

سبحان الله مرت الايام والسنين وبرضو رمضان حتى والدنيا متغيرة
طعم وليلو نكهة حلوة
يارب تبلغنا رمضان ونحنا في صحة وعافية وستر والله يرحم اللي ما انعاد عليه


يالله كدة كفاية يا حبايب
بس لسع باقي شويتين ونغلق من رمضان

دعواااااااااااااااااااتكم

بنفسج
30 Jun 2007, 08:54 AM
ربي يعطيك العافية

نفسي يا سيدي
نعمل مشروع
نجمع فيه كل العادات والحكايات القديمة ونعمل بيها كتاب
مطبوع ما أعرف لكن قصدي نعملو الكتروني
يسير يجلس لنا وللزمن
...
ايش رأيك .؟!

حمامه الحرم
01 Jul 2007, 12:51 AM
سيدي محمد مكيفو نورتنا من تاني يا عمدتنا وفرحتنا حكاويك
الله اللبس كان روعه
افتكر مره ماما ورتني صور للبس التقيل يجي كلو مطرز وعليه يلبسو محرمه ومدوره
اللبس كان شكلو مره حلو
اما لرمضان فمافي كلام بعد الي قلتو خاصه مدفع المويه
دا الا الان احنا نعملو لازم قبل الادان نشرب وان كنا مو عطشانين هههههههههههههههه
ولا زحمه المغرب شي موطبيعي
والله رمضان كل شي في حلو ربي يبغلنا ويبلغكم رمضان واحنا بصحه وعافيه يارب

حمامه الحرم
01 Jul 2007, 12:55 AM
يا استيتا والله فكره رائعه والله من جد نعمل الكتاب اقسام وكل قسم يتكلم عن شي معين
يلا ربي يسهل
لانو ماشاء الله حكيات عمدتنا ما ينمل منها كل مره يسعدنا بحكايه جديده

بنفسج
01 Jul 2007, 01:10 AM
خلاص يا حمامة الحرم
شوفي ايش رأي عمو مكيفو

ونتفق على الخاص
ونسويها مفاجأة الموسم

حمامه الحرم
01 Jul 2007, 02:38 AM
من عيوني يا ست الكل انا حشوف الموضوع واعطيكي خبر

محد مكيفو !!!
01 Jul 2007, 07:05 AM
السلام عليكم ورحمة الله وبركاتة

صبحكم الله بالخير جميعا

مرحبابكم يا ستاتنا
بنفسج وحمامة

الله يجبر بخاطركم

ههههههههه
تبغو تسوو كتب
الناس موفاضية تقرى وانتو بتسوو كتب الله يهديكم

وازا على القصص والحكايات
والله ماتلاقو زي مكاوي ماشاء الله عليه
كتاب كبير مليان من الى ولا ننسى في اعضاء ماشاء الله عليهم
نزلو مواضيع بالمرة حلوة

وبدل الكتاب نخلي موضوع حمامة هادا هو الكتاب
كل واحد يسمع هرجة من هنا من هناك والا قصة والا عادة من العادات القديمة يقيدها على طووول

قصرو

كان العمدة والقايم على امور المركاز في هداك الوقت بعد فكوك الريق وقبل العشا
يزبط المركاز ويحط الموية في السموار ويملي الشراب بالموية ويفرد الجلايل والتكايات يسير يستقبل
اهل الحي طبعا كانو كلهم ماشاء الله رجال وشباب والحريم ( حسب مقدرتهم ) يروحو للحرم يصلو العشا والتراويح
ويطلبو الله ويسألوه القبول في الصيام والقيام وبعد كدة الرجال كلهم ماشاء الله تبارك الله يتفرتكو كل مين في جهة
التاجر على تجارتو والمزين ( الحلاق ) على دكانو والقهوجية على القهوة حقتهم
واللي كان فاضي يزل ويتكي على المركاز وبعضهم كانوا يفضو نفسهم مخصوص علشان الجمعة الحلوة
على القليل يتكو كم ساعة وبعد كدة اللي عندو شغلة يروح يقضيها


المهم طبعا المركاز والعمدة ماشاء الله مو مقصر في واجب الضيافة لكن زي منتو عارفين مكة وأهلها وعاداتهم الحلوة
ماشاء الله تبارك الله ربي مايغير علينا من عادة كان كا واحد يجيب معاه من بيتو صحن قطايف
صينية كنافة كم وصلة بسبوسة والا بقلاوة واللي يجيب سمبوسك والا بف ابو الجبن يعني يسير ينقنقو
ويدوقو اكل بعض وهادا كلو علشان تتقوى اواصر المحبة بينهم كمان وكمان ويسير بينهم عيش وملح


هههههههه
اول لمن يجي واحد جديد يتكي في المركاز يزهموه
تعال اشرب كاسة شاهي وخدلك وصلة شريك مع الجبنة
حتى لو كنت شبعان ومبشوم مايمنع تاخد وصلة يقلك علشان يسير بيننا
عيش وملح ياسلااااام على القلوب الحلوة والنفوس الصافية


يعني كلام العمدة والناس الطيبة والقصص الحلوة ما تنمل ويتناقشو في امور الحي واهل الحي
ولو كان في واحد منهم مريض يسألوا عنو ويزوروه بعد التراويح دقيقتين ويرجعو للمركاز
واحيانا يصلحو بين الرجال والحريم في المركاز خصوصا رمضان بعض الرجال كانو مايحلالهم الشر والنكد الا في رمضان
وعلى اسباب تافهة اللي ماسوت الاكل بدري واللي نسيت الملح واللي السمبوسك غرقانة في الزيت واللي مدريشكلو
عارفين اول رجااااال كانو زي البنزين عللى طول يطرطعو ويسيرو ( محد مكيفهم ) ههههههه


وغير كدة اللي كان ربي موسع عليه من اهل الحي يعطي العمدة اللي فيه النصيب علشان يعطي
بعض الاسر المحتاجة من غير مايقلهم انو هادي الفلوس من فلان او علان علشان مايكسر قيمتو قدام الناس
مو زي دحين بعض الناس يتفلحن ويتفاخر انو اعطى فلان واتصدق عليه !!!!


اكتر الشباب كان غرامهم النطنطة بالكورة ودق الكفر على قولهم
غير المراجيح ابو الالواح والدواليب
والمدوان الكداب كانو يجيبو غطيان الكاكولا الحديد ويخرقوها ويحطو مسمار صغير في النص ويفرفروها بيدهم
وغير البوسكليتات بالون ونص بالون هههههههه
بالون ونص بالون هادي مقاسات الدراجة زي دحين في مقاس 18 ومقاس 24 يعني كم نوع تبارك الرحمن

اما الكمكم ياربي عليه كانو لمن يشعبنو ينزلو للبحر ويملو الزنابيل بالكمكم يسير يلعبو فيها في رمضان
يعني هيا تتلعب ب اربعة حبات لكن يجمعو قريب خمسين حبة عارفين ليش
علشان المضاربات اول لمن ينغلبو تلاقي المهزوم من كتر القهر يشيل الكمكم
وبطول يدو يرميه على الخارجة والا على سطوح بيت الجيران والا اكرمكم الله يدعس عليه برجولو يفشفشو من الغلب
وغير اللي كان يربي أضافيرو زي حفارين القبور يسير وقت الخمش يعور الناس ويخربشهم
وكم مرة تسير مغاورة بين البزورة وتعالو شوفوا التلطيش البعيد ههههههههه

اما السقيطة هادي مو كل مين كان يلعبها علشانها صعبة يعني هيا صعوبتها في خفة اليد
لازم اليد تكون خفيفة علشان تلقطو الحجار من الارض طبعا هيا عددها سبعة حجار وفي كل مرة ترمو الحجر الكبير
على فوق وتنتشو حجر من الارض والمرة اللي بعدها تسير حجرين يعني لبخة
بس سر اللعبة الل محد يعرفو هو لمن تجي ترمي الحجر الكبير ( المضرب لازم ترميه فوق عاااااااالي علشان علبال ماينزل للأرض
قيد خلاص لميت الحجار ولقطتها لقط على قولهم )

وفي ناس غرام أهلهم الكيرم زي حالاتي ( يالله راجعو موضوع مشرفتنا مدردرة حق الكيرم بالمرة حلو )


وغير البرجون يسوو دويرة بيدهم في التراب ويحطو خط في النص ويرصو 10 15 حبة برجون ويبعدو عنها
زي مترين تلاتة ويالله بسم الله يبدأ القنص في البرجون والايادي تتنفخ من كتر الضرب حق البرجون هههههههه

وغير الكبوش هادي مفاصل الطلي الاوصال الصغيرة تتنضف وتنسلق على النار علين تتقرمش وبعدين يلعبو بيها

المهم كنا نرجع على البيت ونحنا حوايجنا وهيبتنا زي كأننا جيين من سفر وتعالوا اسمعو اهالينا يخاصمونا
وان ما اكلنا كم كف على ضهورنا واحيانا ايام البرد كانوا يعاقبوهم يخلوهم يتروشو بالموية البااااااردة
قيد لافي سخانات ولاهباب اللهم كفتيرة فايرة تتنكت على الطشت ونفصدها مع موية باردة وربكم سامع الدعا
المهم نجي ونعطيها خامودة علين لمن يجي المسحراتي ونصحى ونتسحر ونعطيلو كمانة من الموجود يسير يتسحر كمانة
ونمليلو مغراف زمزم يسير يرقع منو وهو ماشي

طيب نجي للحريم دحينة وقعدات الحش واللغوصة
ههههههههههههه
لا بمزح معاكم
والا اقلكم من جد
يصومو النهار ويضيعوووه في الليل
ههههههههههه
احيانا الحريم اللي مافيها تروح للحرم يعني تعبانة من الطبيخ والنفيخ وتدليك النحاس
تصلي في البيت مع بناتها العشا والتراويح وياسلااام لمن تشوفو البنت الصغيرة
تلبس المسفع حق امها والا البخنق وتقعد زي كأنها بتصلي دوبها توقف دوبها تسجد وبعدين تركع
والا تمسك الختمة بالشقلوب زي كأنها بتقرا تحرك فمها ( بللم بللم بللم ) هههههههه


اتكلمنا عن رمضااااااان ونسينا مقاضي رمضان
هادي عادة مكاوية حلوة في ناس متمسكين بيها وفي ناس ماتفرق معاهم الجود من الموجود

10 كيلو دقيق فينو علشان السمبوسك والبف والبريك
5كيلو حب حق الشربة
درزن جبن كريفت
ودرزن تونة
2 كيلو سقدانة
كرتون كريمة
دقيق رز علشان المهلبية
3 علب حليب نيدو حجم كبير
2 كيلو برغل
كرتون جلي مشكل
كم قارورة بليلة وفشار على كم كيس كربو مشكل يسير ننقنق بعد التراويح
درزن صلصل احقاق
ودرزن قشطة
3 علب تطلي
2 كيلو سمن بري علشان الفول والحلويات
10 حزم ماسية
6قوارير توت و6 قوارير تانج من كل شكل ولون
روح الموز قارورتين
وروح الزمزم قارورة ( هههههه) هادي جديدة
2 كيلو كنافة وقطايف
ابزار حق الشربة وفلفل اسود وكمون وخولنجان وشيبة وقرفة وقرنفل وهيل
من كل نوع كيلو نص مصحح ونص مطحون
قصطير وصوفر وملاعق ورق وصحون ورق
كرتون زيت قلي والا خليه كرتونين دحين رمضان استهلاك كل يوم اللهم صلي على النبي قلي وطبيخ
خميرة وكربونة
قطمة سكر
قطمة رز ابو كاس
قطمة رز تايلندي ( عمبر بو ) عارفينو هادا للأكل الجاوي
مستكة للبخور
وفحم قرض اصلي
كرتون سفنجات وتايد وسلك نحاس وكلوركس علشان الغسيل وتدليك النحاس
3ربط اكياس للقمايم ( الله يكرمكم ويعزكم )
ولاتنسو اللحمة كم كيلو هبرة وكم كيلو مفرومة يسير للسمبوسك
وازا في فلوس جيبو دبيحة تنفع مرة وحدة بدل روح وتعال
خلاص كتبتوا كل شي والا باقي

ها قبل لا انسى درزن قمر الدين وقعقع وصنوبر ولوز بجلي ومشمش وقلادة
علشان نرفعها يسير نسوي دبيازة للعيد ونوزع للحبايب عمر وعافية
صلو على النبي
باقي شي والا خلاص لحسن مقاضي رمضان شي متفق عليه في جميع الاسر المكية خاصة والسعودية عامة
ولكن تختلف من بيت لبيت حسب النوع والشكل والسعر


كل مانقول غلقنا نفتكر حاجة
يالله باقي شويتين نخليها بكرة
يسير نرتاح ونخلي الناس تقرى على مهلها

في وداعة الرحمن

حمامه الحرم
01 Jul 2007, 03:13 PM
الله على رمضان حكاياتو ما تنمل
خد راحتك يا عمدتنا خاصه في المقاضي ياا الله حوسه مقاضي رمضان
كل الناس تلاقيها في السوبر ماركت بتقدي كانو حطير البقايل في رمضان
ههههههههههههههههههه

العندليب12
01 Jul 2007, 03:49 PM
أحب أحكي عن الحج في مكة وأخص منها المسفلة كانوا الحجاج يجوا من شهر شوال وكان أغلبية الحجاج في المسفلة من جنوب اسيا وكان فيه بعض من النيجيرين والسوادنه المهم كنا نقوم من النوم في الصباح نشوف الحجاج كانوا ما يقعدوا في البيوت كانوا دايما في الحارة وحتى طبيخهم كان في الحارة كانوا ينزلوا الطباخة ويعملوا الشباتي وكنا نتفرج عليهم وطبعا ما ننسا بسطات الحليب والشاهي وصوت المسجل يلي يعلوا منه صوت عبدالباسط عبالصمد الله يرحمه والله كان له نكهة مانا ننام كتير وقبل لا كده كنا نحرج الشارع ونروح عند المطوفين ونعرض بيوتنا للإجار وإذا كان المطوف ما يبغى ندور على الحجاج يلي بيجوا بدون مطوف طبعا كانت الشغلة عشوائية مو زي دحين المهم والله الله سبحانه وتعالى ما كان يخيب املنا ونشوف حجاج ونأجرهم كان بتنا عبارة عن صنادق موزعه لمجلس وخزانه وعدة غرف هذي الحياة بصورة مبسطة ومختصرة ومن عنده زيادة على الموضوع اتفضل وينعشنا وجزى الله الجميع

حمامه الحرم
01 Jul 2007, 06:17 PM
الله يا يا سيدي العندليب الحج يا سلام على الحج وزحمه
سبحان الله الموسم دي ليه مكانه خاصه تشوف فيه كل الاجناس والالوان
ولغه الاشاره يكون لها اكبر حظ في ههههههههههههه
يا سيدي امتعتنا بقصتك وياريت دايما تفتركرنا بقصصك الحلوه

محد مكيفو !!!
02 Jul 2007, 07:03 AM
السلام عليكم ورحمة الله وبركاتة

الله يبارك صباحكم بالخيرر والصلاة على سيدنا محمد

يا ستنا حمامة هيا مقاضي رمضان لمن نتكلم عنها
مو معناتو ان البقايل رايح تنقفل او يبطلو
الشغلة ومافيها انو الواحد يزهق في رمضان من الاسواق والدكاكين
فتلاقي المحلات كلها زحمة وبدها تنطق
وانا ادمي ما احب الزحمة والنرفزة بالزات لمن اكون صايم
لحسن تقفل معانا على طوووووووول

علشان كدة نجيب مقاضي للشهر مرة وحدة
طبعا مو زي اللي كتبتها بنفس الكميات لكن على حسب كل عيلة ان كانت كبيرة والا صغيرة

المهم

نغلق ان شاء الله اليوم من رمضان


عارفين الواحد في المغربية يادوب ياكل التمر ويرقع مغراف الزمزم وكم سمبوسك على شربة ربي لك الحمد والشكر

فكانو يتلببو وينـقنـقو تعرفو مع الصلاة والتراويح الواحد برضو يجوع فكانو يلفلفو ويبلبعو كل شي يطيح في يدهم

طيب البسطات اللي موجودة والمشهورة في رمضان منتشرة في الحواري والازقة
بسطات الكبدة والبليلة واليمنة اللي كانو يدورو ويبيعو المنفوش


الفـــول النابت والترمس

الفول النابت ( المدشوش ) اللي بقشره ينسلق مزبوط وبعدين يتقشر ويغمسوه في ملح الدقة
والمسلوقة يرمو عليها فلفل اسود وكمون ونص ليمونة ويشربوها حارة حارة تغسل الصدر على قول داك

والترمس زي حبات البليلة لونها اصفر في منو نوعين شي حلو وشي مالح او فيلو مرارة بسيطة كانوا يغمسوه في ملح الدقة وياكلوه

البلـيلة

( بليلة بليلة .. بليلة بللوكي .. و سبع جواهر خدموكي .. وبالشطة حدقوكي وبالطرشي زبطوكي وبالخل مزمزوكي
علشان الحلوين يدوقوكي ) بلل بلل ياولد
طبعا كل مين يتفن في الاغاني والاناشيد علشان البزورة يسمعوها ويمبسطو منها وتحببهم في الاكل
مو زي دحين النفس رتعة البعيد والله لو جلس الادمي يغني الحب كله محد يقلو ايش عندكم والا ايش بتبيع

وكان كل مين يتفنن في البليلة اللي يسويها سادة واللي يحط عليها جزر وخيار وناس تحط قتا وكوسة مكعبات واللي يحط عليها
بطاطس مهروسة واللي يشططها بالشطة التكروني يعني كل واحد وصنعتو والمعلمانية حقتو

احيانا ما تنحكر معاهم وتطلع زي الحجار قاسية مو هادي البليلة شغلتها شغلة
يبغالها بل بالموية نص يوم وبعدين تنحط على النار حتى تستوي وتتمخمخ مزبوط على طبيعتها
واللي مستعجل يحطلها كربونة والا خميرة بطرف الملعقة يسير تنهري من الاستوا
وبسم الله ناكل الصحن ونطلب التاني والتالت
والبياعين كانت نفسهم حلوة ساعات يشوفك لمن قرب يغلق صحنك يرميلك كفكير بليلة وصاية من عندو


المنفوش

اللي مايعرفو هو الكربو لمن يكبر ويسير رجال
ههههههههه
زي الكربو ويمكن اطعم منو حبات مدورة وكبيرة وبالزات حق اليمنة مقرمش كنا ناكلو حاف والا نوديه للبيت ونملطو بالجبن الكشكبان
وقليل شطة للتحديقة يسير طعمو تكتكة على قولهم
دحين في المنفوش لكن مو زي طعامة حق زمان

الحبش

وازا كان رمضان صادف موسم الحبش ( الدرة ) كان منجد روعة وخصوصا ايام الهوا والبرد السكاتي
يجيب الكانون الفحم ويرص الحبش اللهم صلي على النبي من اول الكانون لأخرو
وهنا تجي المعلمانية وهيا كيف تجيب الزباين؟؟؟
كان يلم الشعر حق الحبش ويكومو جمبو وكل فترة والتانية يرمي خمشة على الفحم
يسير لمن يولع البعيد تلاقو الريحة شاااامخة وتنخشش في الدماغ وتجري جري تدور عليه
وتلاقي الناس متكومين على الكانون وكل مين يحجز هادي حقتي وهديك حقتك يقعدو
يراقبوها من ساعة ماتتقشر علين لمن تستوي
وزي منتو منتو عارفين الحبش كل مايكون صغار زي اصابيع الجنية كل مايكون طعم وممخمخ
ويمديكم تختبروه والحبة بقشرها تتكو بضفركم على الحبش ازا سالت المرقة حقتو
تعرفو انو جديد ومزبوط ولعلمكم الحبش نوعين في الاصفر هادا حلو وفي الابيض وهادا العايدي او المالح

الدندرمة

الدندرمة او الاسكريم تباتيك زمااااااااااااان
كانو يسوو جك عصير توت يشربو اللي يشربوه بالعافية واللي يزيد ينكتوه في زنابيل نايلون صغيرة ويسووه
زي المسلس ويجمدوه وبعدين لمن يخرجوه يخرقوه بسنونهم ويجلس يلحسو ويمصمصو في الايسكريم

طبعا هادا الكلام لمن كانت التلاجات والفريزرات

زماااااان كانت في مكاين تمباع يسوو بيها الايسكريم زي منتو عارفين لا فريزر ولا هباب
هادي المكينة ياحبايبنا زي السطل او البرميل

( إن شاء الله أدور عليها وازا حصلتها اصورلكم هيا )
فيلها مكان يحطو بطنو قوالب التلج طبعا التلج يشتروه قوالب جاهزة

المهم لمن ينكتو التلج ويحطو عليها النكهات اللي يبغوها اللي يبغى توت واللي يبغى برتكان واللي يبغى ليمون
واللي يبغى بالحليب مع الهيل وبعدين المكينة لها يد زي الهندل يجلس يبرم يبرم يبرم ويدور علين يتهروش التلج
وينخلط مع العصير مزبوط يرمي كمانة خمشة سكر وقليل ملح وبعدين يفرغو في الزبادي او القراطيس
يعني لغوصة في لغوصة بس شغلهم نضيف وطعم


ايش بقيلنا كمانة اللهم صلي على النبي

الكبدة

بسطة الكبدة وياعيني على الكبدة وخصوصا لو كان اللي ورا الصاج معلم
المهم من الصبح يقوم الرجال ويروح للجزارين او السلخانة ويشتري الكبدة طااااااااااازة بدمها
يغسلها وينضفها ويرستكها ويقطعها شقف شقف نحيفة وبعدين يرمي عليها تلج علشان ماتخرب وتريح علين الليل
ويسوي كمانة سطل خل مع الموية والتوم والفلفل للتحديقة
ويمر كمانة على الفران وياخد منو عيش حب يعني ماشاء الله يشتري حق 20/30 قرص

وبسم الله بعد التراويح يجيب الكانون حق الفحم والا الدافور ويحط الصاج ويرمي الكبدة ويشوحها على النار
واللي يبغاها سادة واللي يبغاها بقوطة واللي يبغاها ببصل واللي يبغاها بفلفل كلو موجود حسب الطلب
بس سر الكبدة قلبتين والتانية وقيدها في الصحون مغروفة لأنو لو جلس يقلقل ويطبخها على النار تسير مجحشة وقااااسية
وتتمضغ زي اللبانة وبعدين تبور في خلقتو يايصدقها والا يعطيها للبساس ( مو بساس اول كانوا انتيكة الناس يربوهم على الغالي , والله كنا ناكل وكانوا يجلسو جمبنا ترميلهم لحمة يمرمشو فيها
كبدة ولحم ودجاج وسمك ) مو زي بساس دحينة حونشية الله اكشف حالهم ياكلو فيران وصراصير الله يقرف الشيطان

غير بسطة الشاهي بالحليب او حليب مع النص كافر

يعني زي منتو شايفين كل الاكلات والطافوحلي شغل مكاوي بيدهم وبنفسهم لا اجناب ولا صبيان
وماعندهم عيب والناس ايش تقول والناس ايش تدحل كانوا الاهل بدل مايخلو بزورتهم داشرين ومصرمحين
يقولولهم يالله ياواد تعال ابسطك بسطة في الزقاق انا اديك المونة وانت خد الباقي
وكانوا البزورة يلملمو الفلوس علين لمن تتكوم وتجي حسبة يروحو يشتروبها اغراض وكراكب لهم
اللي يجيب بوسكوليتة واللي يجيب دباب طبعا الاب يساعد شويتين مع الولد
بس المهم انو الولد اتعلم المرجلة ونفع نفسو واعتمد على نفسو يسير مايقعد زي صجو زي الضرب على الركب



مو زي دحين كترو البياعين المتجولين في كل شارع وتلاقي الواحد قلبو متوغوش من اكلهم
ومنت داري نضيف والا مو نضيف

مرة كنا بنشتري بليلة مدري في عرفة زمااااااااااااااااااان
جالس البرماوي الله يكشف حالو يغرف في الصحون وجالس يعطس
طيب دير خلقتك على الجهة التانية عساك بالكتمة البعيد بس شوفنا المنظر هادا انصدت نفسنا الله يصد نفسو
والا غير نفسهم الرتعة والضيقة يحطلك نص كفكير بليلة ويلغ الصحن خضار وخل علين
يجيبلنا الحموضة والقداد
تقلو اتوصى يقلك خلااااااص


اااااااه على زمن فين الكلام هادا كلو راح
دحين البسطات يمكن انقرضت او صارت قليلة وفين وفين حتى تشوف بسطة ييمكن علشان جات الكفتريات
والدكاكين اللي تبيع الحلويات والحبش وووو

يالله ربي يديكم العافية
الليلة 29 صلو الصبح ووايقو في السما ازا شفتو هلال العيد بلغوني يسير نتكلم عنو
بحول الله وارادتو

كل سنة والجميع بخير

حمامه الحرم
02 Jul 2007, 10:11 PM
تمسو بالخير يا سيدي مكيفو الله الله على زمان وحلاوتو
شهيتنا على البليله بالخل والطرشي
والمنفوش والله اموت فيه مع الشطه والخل يا سلااام ولا الز من كده
والله اهل مكه نفسهم حلوه وقلوبه زي الدهب مو زي الي بيجونا من بره الحمد لله
والله يا سيدي جالسه اقراء وما نفسي تخلص الحكايه من كتر مهي باستطني
بس في شي يريت تقلنا عنو قبل ما يضرب مدفع العيد
نبغا حكاوي السوبيا وبسطاتها يا عمدتنا والبسبوسه اليمني
خلينا نعرف كيف كانت زمان

وكل سنه وانت طيب يا سيدي

العندليب12
03 Jul 2007, 05:04 AM
والله يا سيدي امتعتنا بالكلام المكاوية واللهجة الحجازية الي هي احلا من العسل وزاد حلاها عادات رمضان وحكايات رمضان واكلات رمضان الله يديك الف عافية ويبارك فيك ياموسوعة منتديات مكاوي ما شاء الله عليك طبعا بدون قر او حسد هههههههههههه وشكرا لك سيدي

محد مكيفو !!!
03 Jul 2007, 07:18 AM
السلام عليكم ورحمة الله وبركاتة

حمامة الحرم
مرحبابك ياستنا تباتي وتصبحي على خير
الله يجبر بخاطرك
البسبوسة برضو من ضمن الحلويات المكية بس مو في شهرة الحلويات المكية ( لدو لبنية مفروكة ........)
يسووها بدقيق السميت مخصوص للبسبوسة
وفي ناس تخلط السميت مع النارجين الابيض المطحون كمانة طعمها طعم ويترش معاها حليب وقت العجن
وبعدين يسوولها شيرة برانية ويزينوها باللوز

اماا السوبيا كانوا يسووها في بيوتهم انضف واطعم بس الواحد صار يستصعب
لانو يبغالها طولة بال وروقان
يجيبو العيش الشامي والشعير وينشفوه كم يوم مزبوط
بس ويجيبو السطل الكبير بالكم السطولة الحمرا والبرتكانية حق اول
يحطو العيش جوتها وشوية خميرة وبعدين يعبو الموية طبعا على حسب مقدار العيش
لو زادت الموية واتلغت تسير سايطة
وبعدين يرشو عليها قرفة وهيل وسكرعلشان الطعم والريحة تسير حلوة
بس يخصروها علين تاني يوم حتى تتخمر مزبوط ويجيبو المنخل والجك الكبير ويصفوها من الحتل
ويشربوها والنوع التاني اللي هو الاحمر يسووه بالزبيب

نحنا نخليه تخمر ليلة وبعدين نلغها لغ
لكن في مو مافي بعض الناس اللي بالي بالكم يخلوها تخمر بالكم اليوم
علين ريحتها تسير اخص من الكرشة الله يكرمكم وبرضو كمانة طعمها لادع في اللسان

على العموم هادي مشروبات دايمة على الصوفرة المكية ويسموها شوربيت
في كمانة الليمون والتوت والبرتكان

كمانة الخشاف

نجيب كم ربطة قمر الدين ونفتفتها اوصال صوغار قد اللقمة
وبعدين ننكت القمر الدين في كروانة ونخليه مبلول كم ساعة علين يتمخمخ
ونرمي في القدر مع الموية حقتو وازا يبغالها زيادة نزيدها
ونخليه يطبخ ويفور علين يقول امييييين
وبعدين نحطلو كم رشة نشا علشان يمسك حيلو ويسير طخين
وطبعا يجي السكر في الاخير واللي بدو يحط قليل هيل والا قرفة يعني على حسب المراق

وفي طريقة سهلة للكسلانين جيبو القمر الدين وحطوه في الجك حق الخلاط وانكتو موية بااااردة ومسكرمة
وخمشة سكر واخلطوه وحطوه في الفريزر وبعدين اشربوه


في كمانة الحمر الا هو تمر هندي
كمانة بالمرة طعم وخصوصا ازا كان الحمر جديد ( يكون لين ولونو قالب على صفار )
ينحط في كروانة ويمبل بالموية وبعدين ينحط على النار علين تندر مرقتو ويتمخمخ مزبوط
نجيب المصفى وننكت بطنها الحمر ونصفيه من الحتل هو يزهق شوية بس يبغالو
مرص وعرك بالاصابيع علين يتصفى وبعدين يحطولو سكر شوية وبسم الله


حبيبنا العندليب
يجبر بخاطرك الهي وينور عليك
ولاشكر على واجب
برضو اللي عندو اي حاجة تعديل اضافة تصحيح يقيدها

اليوم شكك وطلع تلاتين
يالله فضيلة
وبكرة ان شاء الله حنتكلم عن ليلة العيد
على قولة ام كلتوم ياليلة العيد انستينا

تأنسكم الفرحة والعافية بحق الصبحية هادي

بنفسج
03 Jul 2007, 10:08 AM
الله ينور عليك

سيدي محد مكيفو
مبسووطة مرة بالموضوع

makkah butterfly
04 Jul 2007, 12:15 AM
السلام عليكم ورحمة الله وبركاته
كلام حكم كلام أمثال والسنة حلوة وطرية
لسانك ينقط عسل ياعمو
والله حكاوي مرة حلوة خاصة اللي في رمضان
بقراها وبحس انو شعر جسمي بيكشششش
والله ايام حلوة ونفسي لو اني كنت موجودة
وخاصة حكاية المسحراتي مرررررررة عاجبتني
ولحد الآن امي تحكينا بين فترة والتانية عنها..
وحتى حكاية الموية قبل الاذان للآن نجري زي المهابيل نبغى نشرب
عشان لانعطش زي ما اتفضلت

وحكاية المقاضي مايحتاج لها بداية كل شهر رمضان تلاقينا حايسين ايش
نشتري وايش نحتاج
والمنفوش آآآآآآآآآآه عليه والله شهيتني لحسن ليا فترة ما اكلتو وعلى قول حمامة
بالشطة والمخلل جنااااااااان والبليلة لاتهرج عنها هادي ليومنا ده ماشي سوقها فين ما تروح
وبعدين في لعبة ماني عارفة ايش اسمها ...اللي قبل السقيطة ..هادي كيف تلعبوها...؟
بس السقيطة بالمرة احبها حتى دحين اجمع لي كده كم شغلة صغيرة حول السبعة كده والعبها
والله حكاويك وكلامك وهرجك ماينمل ياعمو..ولا باسيدي..؟

والله حكاويك جناااااااااااان ياسيدي وربي يحفظك انشاء الله
ولا تنسانا من حكاوي العيد مستنيتها بفارغ الصبر

وبعدين يالبنفسجية انتي وحمامة تتفقوا من ورايا هااااا
كده ياحمامة هااااااااااااا
طيب نتفاهم بعدين بس اذا لكم نية بجد
لاتنسوني ماشي
هيا في امان الله

محد مكيفو !!!
04 Jul 2007, 07:40 AM
السلام عليكم ورحمة الله وبركاتة

يسعدلي صباحكم بالخير وبالصلاة على النبي

بنفسج
ياستي الله يبسطك كمان وكمان مرحبابك

العضوة اللي بعدك معليه بعدين ترجمولنا الاسم يسير نعرف نزهم عليكم

وعليكم السلام ورحمة الله وبركاته
مرحبابك يا ستي وربي يجبر بخاطرك
ويحلي ايامك

وبعدين في لعبة ماني عارفة ايش اسمها ...اللي قبل السقيطة ..هادي كيف تلعبوها...؟
الكمكم ( كوم كوم )
هو يا ستي ابوجلمبو نفس البيت حقو لونو ابيض عارفتو تلاقيه ملياااااااااااااان جمب البحر
ان شاء الله ازا رحتي البحر لملمي منو وازا حصلتي ابو جلمبو جوة البيت حقو
غلغليه وجيبيلو الكفية من كتر اللعب تلاقيه من حالو يفلت البيت ويندر يمشي لحالو
تتلعب ب 4 حبات
طبعا مقاسها واحد
اول حاجة لازم اللاعب يزرع
والزراعة تكون ال4 حبات مكفية على بطنها يعني تمسكي ال4 حبات وتخضيها في يدك وترميها على الارض
وازا زرعتي تنحسب ب4 نقاط
وبعد كدة تاخدي الحبوب وتخضيها وترميها على الارض
حتكون الحبوب بعيدة عن بعض دحين حاولي تدقي كل حبة مع اختها وكل دقة بنقطة
تلعبي لغاية ما تغلطي في الدق والا تكون حبتين متلاقة مع بعض ساعتها الدور يروح للي بعدك
لو رميتي الحبوب وكانت كلها مفتوحة على فوق يعني الحبة ضهرها على تحت وبطنها على فوق
ساعتها يجي وقت الخمش ( اللم بسرعة ) لانو كل حبة تنحسب ب10 نقاط
وغير اللي كان يربي أضافيرو زي حفارين القبور يسير وقت الخمش يعور الناس ويخربشهم
وكم مرة تسير مغاورة بين البزورة وتعالو شوفوا التلطيش البعيد
طبعا القيم كلو من 100 اللي يوصلها قبل هو الفايز
ان شاء الله وضحت الهرجة

والله حكاويك وكلامك وهرجك ماينمل ياعمو..ولا با..؟

والله حكاويك جناااااااااااان يا وربي يحفظك انشاء الله
ولا تنسانا من حكاوي العيد مستنيتها بفارغ الصبر

الله يجبر بخاطرك ابشري ياستي
دحين اخد لنص شوية
وونشوف العيد

من عادات المكاكوة
يصلو الصبح يوم 29 ويطالعو في السما يدورو على القمر لو حصلوه معناتو الشهر كامل
لو ماحصلوه معناتو الشهر ناقص هادي تباتيك اول علمها عند الله
لانو لازم يغيب وحدة ليلة قبل لايندر مرة تانية

العيد البارد
لمن يجي العيد ورمضان مكمل تلاتين
يعني على قولهم جابوه براحتو الناس كلها عارفة انو بكرة ان شاء الله عيد
وكتير ناس كانوا يتمنو رمضان تلاتين علشان اللي ماغلق شغلو يمديه يغلق
بالزات الخياطين واهل البيت اللي لساعهم مارفعو وكنسو ونضفو

غير كدة صيام يوم زيادة فضيلة

يالله لاتروحو بعيد ............

محد مكيفو !!!
04 Jul 2007, 08:15 AM
يعني زمااااان لمن يجي العيد ويضربو المدافع تلاقي الناس كلهم يعايدو بعض البزورة يسلمو على الام والاب
والاخوان على بعضوالحرمة تسلم على جوزها ويهنو نفسهم على ان من الله عليهم صيام رمضان وقيامو
ويسألوا الله القبول حتى اللي متخاصمين ومضاربين حتى لو لهم سنة مايهرجو مع بعض
يجو ويسلمو على روص بعض ويعتزرو من بعض في المركاز حق العمدة
مو علشان شي علشان العيد فرحتو كبيييرة ولازم الواحد يكون خاطرو مريح ومو شايل على احد
على قولهم وحتى ربنا يطرحلهم البركة


وبعدين يروحو يجيبو حوايجهم من الخياط واللي يقضي امورو وحاجتو واللي يشتري الحلاوة والشربيت
طبعا عوايز العيد والدبهرك حق العيد يبدأ الاستعداد حقو من يوم 20رمضان الا هيا العشرة الاخيرة واللي يسموها عشرة الخياطين والحلاوانية والحلاقين

يعني يعبو البيت اللهم صلي على النبي من إلى
وبعضهم اللي بيتو نص ونص ( يرخموه ) يعني يجيبو رخام وقليل جبس
ويدعكو البيت من برا يسير يلمع ويبرق ويكشح لونو ابيض زي البفتة
واللي الله منعم عليه يقدح البيت بوية والحريم جوة يغسلو الدهليز والدرج
ويبيتو الليانات والمخدات والمساند بهديك البيوت المشتغلة
واللي فيها كرانيش وترتر يعني زبرقة من صنع الحريم
طبعا البزورة الصوغار يلموهم بعد الترويش ويحنو اياديهم
وينقشولهم هيا برضو الستات الكبار يحطو حتة في شعورهم
ويطلع لونها رجج مو زي دحين محد يحط الحنة الا ناس قليل
اللي يقول ريحتها مو حلوة واللي يقول لونها مو حلو
ويعبو الحوايج وتلاقو البزورة كل بعد شوية يندرو الحوايج ويطالعو فيها علشان ماشاء الله جديدة
مو خلي بالكم اول الدنيا بالبركة والمعيشة قاسية فكانوا يفصلو الحوايج الجديدة من العيد للعيد
يعيدو بيها ويرجعوها للدولاب كل ماتجيهم مناسبة يندروها ويلبسوها علين لمنت تقدم يجروها في الخروج العايدي
مو زي دحين اللهم صلي على النبي ربنا موسع على الجميع وبنلبس اجدد نوع واحلى نوع في أي وقت وزمان
ربي لايغيرها علينا ويحفضها نعمة من الزوال

قصرو
وبعدين يرقدو البزورة على الساعة 12 / 1

ويصحو قريب الصبح يتروشو ويتزبطو ويتخشلعو وينزلو للحرم يصلو الصبح وبعدين يصلو المشهد
وبعدين يروحو لأكبر واحد في العيلة ويفطرو عندو مع الاهلية والحبايب

(دبيازة ولقيمات او اللنقطة وزلابية وشريك بلدي وجبنة وحلاوة وزيتون
وشويتين أمبة وطرشي المختوم والمعرق والمنزلة واللي خرمااااان للفول والهريسة يجيب على قدو قيد الناس طفشانة من سيرة الفول حق رمضان وغيرها من الاكلات على حسب مراق أهل البيت ) ولو انو الهرجة هادي قامت تختفي شوية وصارو الناس يفطرو في بيوتهم وبعضهم لا يفطرو ولا يهببو
لمن يرجعوا من الصلاة يندبجو وتاخدهم الخامودة علين يشبعو
وبعضهم بدل الفطور يسوو عشوة في الليل قيد الدنيا عيد وسهر وصهللة

وبعدين المعايدة والتزاور عيد الرجال كان في الصبح علين قبل الضهر وفي العصرية دور الحريم والبزورة
مو زي دحين انقلبت الاية والناس كلها تندر تعيد في الليل بدل الشلوطة في النهار وخصوصا ازا كان حر ولسلسة علشان كدة الناس خلت المعايدة في الليل علين وجه الصبح

المهم كانوا ماشاء الله شباب ورجال الحي من كترتهم تبارك الرحمن
يقسموا نفسهم 4/5 اقسام وكل قسم كان يعيد على حارة من الحواير القريبة
اهل الشامية يطلعو للفلق واهل الفلق يروحو للشبيكة واهل الشعب يروحو للنقا واهل السليمانية يروحو على سوق الليل يسير هدولاك يردو رجولهم
مرة تانية

ومن الحاجات الحلوة زي منتو عارفين أول أهل الحي عارفين حيهم
واللي ساكنين فيهم من البزرة علين الحرمة والبنات بحكم انو الاحياء صغيرة وضيقة ومافي راجل غريب بينهم والجيران زي الاهل فكانوا
لمن يعيدو ومايلاقو رجال البيت يحمحم ويزهم ( يأهل البيت
يا أم أحمد كل عام وانتو بخير والله يعيدو علينا وعليكم بالخير )
ودلال القهوة جاهزة وحلاوة الحلقوم واللوزية واللومنية وبيض الكوكو للبزورة يعني الديوان او المجلس مزبط من إلى وبعدين في دفتر صغير كدة ومرسمة يسير يقيد اسمو في الدفتر انو جاء وعيد في البيت
يسير لمن يجي رجال البيت يمسك الدفتر ويشوف مين اللي جاء يسير يرد رجولو ويعيد عليه وفي حاجة حلوة أول كل بيت يحط في المجلس تلاتة اربعة اشكال من الكلونيات يسير الضيف يعطر نفسو او صاحب البيت
يعطرو مو زي دحين لو تسوو الحركة هادي يقلك روح وفارقنا انا عندي عطري الخاااااااااص والا يقلك ليش شايف ريحتنا زي التيوس
علشان كدة تبغى تعطرنا !!!!! ول ول ول هرج زي القنابل


وازا كان العيد طويل كانوا الأهلية على سادس ايام العيد يتلمو كلهم
ويروحو يتمشو وينفهو على أهاليهم وبزورتهم قيد طول رمضان
والحريم والبنات محبوسين في المطبخ والبيت طبيخ ونفيخ

سبحان الله على هديك الايام اصلا دحين العيد عيد العافية ودحين اللي يفرح بالعيد هم البزورة الصغار اكتر من الكبار
تشوفهم مبسوطين وهم لابسين الدحة حقتهم والكرتة ويقرمشو في الحلويات وبعدين ياخدو العيدية

والبزورة الصوغار اول كانوا ينزلو للحارة ويعيدو على البيوت ويدقو الباب وتفتحلهم الحرمة وتديهم تفاريق وحلاوة عيدية
علين الجيوب تتملا اللهم صلي على النبي مافي الا قشر الحلاوة وابلع
ولمن نجي ننخمد تسمعو اصوات الكحة من كتر الحلا
والقلاسة
وتعالوا اسمعو الاهل ( بس ياواد انكتم خلينا نستكن ونرقد
اقعدو لفلفو في الحلويات زي المصاريع وتعالوا امتحنونا
هيا قوم لغ موية وانكتم والا اصمخك تنشرب الموية وبرضها الكحة
فيجرو الدقديق والا الطورحاة ويكحو جوتها يسير الصوت يخف)
وفي ناس كمانة على 25 رمضان يروحو للمدينة يسير يصومو كم يوم في المدينة ويحضرو العيد في المدينة

وناس كانت بعد صلاة المشهد يزلو على القبور ويسلمو على اهلها ويدعولهم ويعيدو عليهم


من النوادر الحلوة مرة جابو العيد اخر الليل ومرة جابو رمضان اخر الليل
عاد ناس كتير اتبرجلت اللي صام على اساس رمضان
واللي فطر على اساس ماخش رمضان

مو زي دحين ماشاء الله علين العشا بالكتير ولازم يبينو للناس ان كان الشهر ناقص والا كامل
وساعات يجيبو العيد بدري ويقولو يالله اقضو يوم غلطنا في الحساب

هههههههههههههههه
مين بدو يقضي ساعتها زمبنا عليهم
والا موووو



طيب في النهاية في كم نفر بدهم يسلمو عليكم






سالم أبو خيشة

درويش ابو الليل

عباس كيك الجنة

فؤاد ياكلك

حامد أبو طبنجة

صالح كتكت

صدقة درديري

عبده مقلية

علي كراتة

حسن لبنية

عمر كرته

سراج رقدني

بيقم البوو

محد مكيفو




وكل أهالي مكة الكرام يهنوكم بعيد الفطرة المبارك

هههههههههه

يالله لاتنسونا من دعواتكم واللي عندو اي اضفة والا تعديل مرحبابو
خلونا نريح ونرجعلكم بكرة والا بعد كم يوم
حسب الظروف ان شاء الله

حمامه الحرم
04 Jul 2007, 03:23 PM
اهلابنفسج و يا احلى مكيه نورتني موضوعي يا ست الكل
مين بنتفق من وراكي يا ستي انتي الخير والبركه

حمامه الحرم
04 Jul 2007, 03:30 PM
الله على الكم معقول مفي احد ما يعرفو اللعبه دي تجنن
خاصه لما يجي الفل تلاقي الناس على بعض هههههههههههههه
واهم شي لما تلعبوها تكون الاضافر مقصوصه مزبوط ولا تخرجو من اللعبه كانو خارجين من حرب
انا احس الكم كم من احلى الاعاب الى الان مازلت مشهوره

اما عن العيد البار على قولك يا عمدتنا من جد كلنا نحبو عشان ا نجلس محتارين ها في العيد بكره ولا لاء خاصه لما ما نكون خلصنا اشغالنا
بس اول مره اعرف انو يسمو العيد البارد

يلا خليني اكمل القصه حقت العيد يجعلكم ربي من عوادو وانتو بخير

حمامه الحرم
04 Jul 2007, 05:13 PM
الله اكبر الله اكبر الله اكبر لا اله الا الله الله اكبر الله اكبر ولله الحمد
الله اكبر كبيرا والحمد لله كثيرا وسبحان الله الله بكره واصيلا وصلي اللهم على سيدنا محمد وعلى اله وصحبه وسلم تسليما كثيرا

كل عام وانتو بخير وينعاد عليكم بالصحه والعافيه

العيد يا سلام على العيد وليله ليله العيد ما نام فيها ابدا وزي ما قلت يا عمدتنا كل شويه نجلس نتفرج على الملابس الجديده
وانا في حركه دايما يضحكو عليا فيها احب كل شي يخص العيد اعمل في ليله العيد زي مسلا السرير في العيد نشترليو طقم جديد يعيد زينا لازم احطو ليله العيد ولو فرشو قبلها انام في الارض الين ليله العيد عشان يفضل جديد
هههههههههههههههههه

والمشهد خاصه في الحرم لي طعم تاني يعني ماشا الله تلاقي العيله كلها اتجمعت ونزلت الحرم نصلي المشهد ونرح بيت العيله نفطر فطور العيد
وبعدها العيديه يا الله وقت العديه ما تشوف النور كلا على بعضو يبا يلحق هههههههههههههه

وفي الليل كل واحد يروح يعد على التاني ونوزع حلاوه العيد

وبعد كده تبدا التماشي وتمر ايام العيد زي الهوا بس والله انو فيها فرحه سبحان الله غير كل الايام ومها قلنا فيها ما نخلص

ولا تنسى يا عمدتنا توصل سلامنا ل

سيدنا وعمدتنا ربي يديمو بالخير
محد مكيفو

سيدي
سالم أبو خيشة

سيدي
درويش ابو الليل

سيدي
عباس كيك الجنة

سيدي
فؤاد ياكلك

سيدي
حامد أبو طبنجة

سيدي
صالح كتكت

سيدي
صدقة درديري

سيدي
عبده مقلية

سيدي
علي كراتة

سيدي
حسن لبنية

سيدي
عمر كرته

سيدي
سراج رقدني

سيدي
بيقم البوو

وكل حبيبنا اهل مكه ربي يبارك فيهم

وكل سنه وانتو بالف خير


ولا تتاخر علينا يا عمتدنا اتعودنا كل يوم نقراء قصه من قصصك الحلوه يا سدي

makkah butterfly
04 Jul 2007, 08:26 PM
عجبتني كتير لعبة الكوم كوم
خاصة انو بعد اللعب فيها ضارب ومضروب ومين يكش التراب ههههههههههه
تعرف اللعبة دي مين يكش التراب..؟ والله سيدي كان يحكينا وانا اضحك
على التهاويل..حقة زمان والعابهم اللي مافي منها

وبعدين ماشاء الله عليك وعلى حكاويك...ياعمدة..
(هي رتبتك بس خليني اقول لك ياعمدة ماشي..)
وبعدين ياسي عمدة انا اسمي معناه.....فراشة مكة هيا لاتنساه ماشي
ووالله عجبتني حكاويك حقة العيد
ياسلاااااااااااااام عليها.....مستعجلين على العيد...ربي يبلغنا هو
انشاء الله بصحة وعافية


وينزلو للحرم يصلو الصبح وبعدين يصلو المشهد وبعدين يروحو لأكبر واحد في العيلة ويفطرو عندو مع الاهلية والحبايب (دبيازة ولقيمات او اللنقطة وزلابية وشريك بلدي وجبنة وحلاوة وزيتون وشويتين أمبة وطرشي المختوم والمعرق والمنزلة واللي خرمااااان للفول والهريسة يجيب على قدو

ياسلام على صلاة العيد وخاصة والناس رايحة للحرم الواحد يحس بروحانية عظيمة
لان الكل ماشي على رجوله والكل رايح لمكان واحد متجهين نفس الاتجاه
والله شعور جدا رائع اعجز عن وصفه....هادا غير انو الناس كلها بتردد
تكبيرة العيد وشيء جدا جدا عظيم وحلو..

وفطور العيد ياعيني عليه
تلاقينا كلنا متجمعين في بيت العيلة او عند اكبر واحد في العيلة
والفطور زي ما اتفضلت وذكرت ومعاها كمان الكبدة ولا لا..؟
والدبيازة آآآآآآه على الدبيازة مرة أحووووبها
احيانا من حبنا لها نعملها حتى بعد ماينتهي العيد..وأكيد بنسويها كمان في عيد الاضحى

والمعايدة كمان ياعمدة لها طعم خاص
وزي ماتفضلت الآن العيد للصغار فقط..واحنا يالله حسن الختام هههههههههههههه
والله محد صار يفتكرنا زي اول لما كنا ننبسط بالعيدية كنا نلم من هنا.
.وجري للملاهي من هنا ونصرفها كلها..
وزمان عايدي تروح تعيد للحواري المجاورة
بس دحين لما يجوا يطالعوا فيهم...لا دول مو من حارتنا هيا لحد يفتح لهم الباب
سبحان الله دحين حتى بعض النفوس اتغيرت

والله ياعمدة نفسي ارد كلمة كلمة ...بعد اذنك ياحمامة
بس حخلي المجال لغيري

وبعدين سلم لي على أسيادي ربي يسعدهم ويوفقهم دنيا وآخرة وانت وياهم

سالم أبو خيشة

درويش ابو الليل

عباس كيك الجنة

فؤاد ياكلك

حامد أبو طبنجة

صالح كتكت

صدقة درديري

عبده مقلية

علي كراتة

حسن لبنية

عمر كرته

سراج رقدني

بيقم البوو

محد مكيفو

وكل عام وانتو بالف خير ....قبل الزحمة
ومن العايدين ومن الفايزن انشاء الله
ههههههههههههههههههههههه

العندليب12
05 Jul 2007, 08:09 PM
بدي احكي اليوم عن عادات الزواج في مكة طبعا هذا بعد اذن الجميع بالنسبة لنا نحن في المسفلة وبالذات في زقاق مدرسة الناصرية يعني في حارة ( البزبوز ) كانت افراحنا تقام في نفس الحارة طبعا كنا نقوم قبل الفرح بيوم من الصباح نروح نجيب المرابيع والتيازير والكراسي وسعف النخيل واللمبات وبعضنا يكون موجود في الموقع يرش الارضية بالمويه وينضفوا المكان يعني مايكون في الحارة ريش دجاجة ةبعدي كده نجيب المرابيع ونحفر لها ونغرسها ونشد عليها التيازير والكهربائي مشغول بمد الاشرطة تبع اللمبات من اول البيت الين فم الحارة وبعد كده نفرش الجلايل ونحط كم كرويته علشان يجلس عليها المملك والعريس واهل العريس طبعا وبعدين نروح ونربط سعف النخيل على مدخل الحارة يلي هو فم الحاره ونزينه باللمبات يلي تفتح وتنسك طبعا المفارش والكراسي تنصب في يوم الجواز ونكمل بعدين

حمامه الحرم
07 Jul 2007, 07:41 PM
اهلا بسدي عندليب

ماشا الله حتى في الجوازات كانو مع بعض كانو فرح ولدهم
والله حاجه حلوه وانا بنتظر بقيقه الفصه على احر من الجمر

لا تتاخر علينا يا سيدي

محد مكيفو !!!
08 Jul 2007, 07:09 AM
السلام عليكم ورحمة الله وبركاتة

صبحكم الله بالخير جميعا حبايبنا المكاوية

معليش سامحونا أتحيرنا الاسبوع اللي راح

والله يكون في عون الجميع

سبحان الله لمن يخش رمضان يتقلفط قواااااااااام ويجيب العيد
وازا خش العيد يمبرم قوام زي الملوينة فتح عين غمض عين يقلك لبيك

القعدة ( قومة وقعدة ) زي مايقولو المكاكوة لانو شهر القعدة يجري قوام

المهم الحج زي ما اتفضلو الحبايب اللي قبلنا وزكرونا بالحاجات الحلوة نتكلم كمانة شويتين

بس يبغالكم تزبطو البراااااااد والكاسة الكبيرة يسيير الواحد يمخمخ


دربكة الحج والاستعداد حق الحج يبدأ من نهاية شوال تلاقوا الناس اللي بدها تأجر بيتها في الحج
من بدري يزبطوا البيت ويهتموا بيه اللي يبغالو بوية واللي يبغالو ترخيم ( يعني يجيبو الرخام ويملطو البيت من برا يسير يرجع جديد وأبيض زي البفتة يايعني من قلة الفلوس ) والحمد لله على كل حال

والمطوفين نفس الشي يرسلوا صبيانهم الكبار وبعضهم يسافروا علشان يعربنو مع الحملدارية والمسؤولين عن الحج في بلادهم بالزات العجم والايرانية
وياخدو التعاريف يسير يعبوا نفسهم ويحسبوا حسابهم من بدري وهادا اييييييييييه الدنيا بالبركة كانت لكن كل شي مزبووووط ومية المية ومافي لالخبطة ولا تقصير من أحد
مو زي دحين كل شي موجود لكن خدمة بالبلا وغش وصرقات ونهب
وياخافي الألطاف نجينا مما نخاف
شاهدنا

لكن تنظيمات الحج احسن من هادي الايام اللي مليانة لخبطة في لخبطة والواحد مو داري راصو من رجولو اقربها دحين عرفة 9 خطوط
والسرا واااااااقف

المهم يسير يشترو الخيام والبسط والتيازير والليانات والدوافير والطبخات يعني يستعدوا من إلى

طبعا الرجال قبل لايروحوا الحج للحج او الشغل كانو يمونو البيت بالأرزاق والمعلبات وكل الأكل
علشان القطعة تعرفوا أيام الحج محد في حال التاني وغير كدة يحسبو حساب الخوليف ( يوم 9 )

وكمانة الكم اليوم حقت منى ماكانوا يبسطو الدكاكين إلا 13 الحج يسير يغلقوا غلاق التعب مرة وحدة ويبسطوا مرة وحدة مو زي دحين ماشاء الله تبارك الله الناس تبسط وتبيع وتشتري وخصوصا دحين الحج زحمة واللي ماراح للحج يقل عقلو ياواد قوم فك الدكان واترزق الله احسن من قعدة البيت والمغاورة مع الحرمة وفوران الدم

يعني سبحان الله السنوات تجري ورا بعض والزمن أتغير يعني زي زمان أول ماكانت فيه هادي الزحمة والكركبة في الحج

ماشاء الله تبارك الله دحين قريب 2مليون او تلاتة مليون إن ماكان أكتر

يعني اول الناس كانت تخرج بسياراتها للحج
ويفرشوا الخيام حقتهم ويحجوا وكل شي أخدينو معاهم طبعا السيارات كانت قليلة واغلب الناس كانت تحج على الشقادف وهيا زي الصندقة الخشب يلبسوها بالقماش والستاير ويزبرقوها وتنحط فوق الجمال الحريم يركبوا في الجمب والبزورة يركبوا في النص والرجال يمشوا على رجولهم أو يركبوا جمال تانية واللي مايمديه يتشربط على الجمل يجيبولوا كرسي والا سلم صغير

أحيانا الشقدف لمن يكون مليان بالدبب والناس المتان اللهم صلي على النبي بعض الجمال تجلس تورور وتصنقر من الحملة علشان كدة كانوا يوزعوهم على كم شقدف
ودايما المتان يركبوهم في النص
علشان لايميل الشقدف على واحد جمب وينطق ضهر الجمل والا يجيلو أبهر البعيد

وكانوا ياخدوا معاهم المعمول والغريبة والسمسمية والنقل ( مجمع المكسرات لوز بجلي فصفص ( كاجو فستق ) طبعا هادي جديدة ماكانت موجودة من زمان وياخدو كمانة قعقع عين الجمل زرنمباك)

وطبعا يوم العيد قيد الطلي معاهم ويدبحوه على طول وياكلوا منو طول مهم قاعدين في الحج ويسوو مشاوي والا سلالي لحم اوصال والكبدة والقلوب والفشة يشوحوها على الصاج وياكلوها مع عيش الحب وزلطة الطحينة
وملح وليمون وياربي لك الحمد والشكر

طبعا رجال مكة أول كلهم يندرو للحج يا يحجو أو يروحوا للشغل وتسير البيوت فاضية من الرجال(طبعا مو كلها تفضى في بعض الرجال يقعدوا في بيوتهم زي الكبار واللي وجعان واللي فتران ) والحريم علشان لاينفجعوا من الوحدة والهجبة وعلشان الدنيا سارت خليف الا هو يوم 9 فكانوا يتلمو مع بعضهم والا يروحوا ( يخلفو) يجلسوا مع أمهم وخالاتهم يعني يونسو بعضهم 3أسر4أسر يعني بشكة حريم علين لمن يغلق الحج كل مين يرجع لبيتو وكلها ماشية بالبركة وحجهم بالبركة

واللي صايم ينزل يفك ريقو في الحرم ويطوف ويصلي المغرب والعشا وفقييييع على البيت علشان خلاص مايجي نص الليل
إلا الناس والحجاج كركبو من منى على الحرم وترجع الزحمة

وحج مكة كمان بالتصانيف يعني جالسيييين علين يوم 9في بيوتهم وفي الضهر تصنفلهم ويقولوا لبعض يالله نحج يقولوا يالله ويروحوا يحجوا على طول وخصوصا إزا صادف زي السنتين هادي الجو باااارد وحلو
علشان تعرفوا إنو الشغلة كلها تسهيل وتوفيق من عند الله
يعني ساعات الواحد يستعد ويعبي نفسو ويجهز طلباتو إلا الشغلة تسوق العكاااااس وبعدين ينطقو في بيوتهم
علشان كدة خلو أموركم بالتساهيل واللي ربنا رايدو رايح يسير


ياااااااااااارب المعونة من عندك
طيب نلقط نفسنا شوية ونرجع نكمل معاكم
لاتنسونا من دعواتكم
في وداعة الرحمن

makkah butterfly
08 Jul 2007, 09:15 PM
بدي ارد عليك ياعمدة
بس
بدي الازن من حمامة

7
7
7
7
7
7
7
7

بعد مانتهيتي جيتي تستاذني
ههههههههههههههههههه

هيا ارد ولا لا عشان يكون لصاحب الموضوع كلمة

حمامه الحرم
09 Jul 2007, 11:03 PM
احلى مكيه دا كلام برضو يا ستي الموضوع موضوعك
خدي راحتك يا ست الكل

جـوري
11 Jul 2007, 09:28 AM
فيني من زمااااااااااااااااااااااان
غاااااااااااااااااااطسة ولا ايه!!!

ارووووح الململي كم قصة كدا
واجي الزقهم هنا..
اش دا الكلام...مفتشلة من نفسي..

وجب خلاص اروح واجي
لزوووم يختي
يعني حجز ونرد..

يلا عبال اجي خدي تحيتي

http://forum.makkawi.com/imgcache/8612.imgcache (http://www.q8vip.net/up-pic)

حمامه الحرم
13 Jul 2007, 02:16 AM
جوري يا ستي الموضوع موضوعك
لملي القصص وتعالي ازقوليها
هههههههههههههههههههههههههه

يلا لا تتاخري

امبراطور مكة
13 Jul 2007, 07:30 PM
تسلم الأيادي

makkah butterfly
13 Jul 2007, 07:55 PM
ماشاء الله عليك دايما تتحفنا بحكاويك الحلوة

بس عندي سؤال...؟

ايش هو اشقدف..؟
والزرنباك..حق عين الجمل؟

وطبعا يوم العيد قيد الطلي معاهم ويدبحوه على طول وياكلوا منو طول مهم قاعدين في الحج ويسوو مشاوي والا سلالي لحم اوصال والكبدة والقلوب والفشة يشوحوها على الصاج وياكلوها مع عيش الحب وزلطة الطحينة
وملح وليمون وياربي لك الحمد والشكر

ماشاء الله عليهم..دول راحين يحجوا ولا عصرية..ههههههههه

والله للاسف ياعمدة دحين احنا اهل مكة
ماحجينا وناس تجي ما آخر الدنيا تحج واحنا جالسين في البيت
بس نتأمل ..ونقول كل سنة اللي بعدها انشاء الله
الله يكتب لنا الحج انشاء الله في اقرب وقت يارب

وفعلا زي ماتفضلت الشغلة من إلى ...** توفيق من الله**

مستنييين باقي الحكاوي ياعمدة
ترى اتاخرت المرة اكتر من اسبوع...؟

حمامه الحرم
14 Jul 2007, 01:59 AM
فينك يا عمدتنا الموضوع اشتاق لحكاياتك يا سيدي

محد مكيفو !!!
14 Jul 2007, 07:25 AM
السلام عليكم ورحمة الله وبركاتة

صبحكم الله بالخير

اعزرونا يا حبايب على التاخير
كنا بعافية شوية

على العموم مرحبابكم

فراشة مكة
ايش هو اشقدف..؟
والزرنباك..حق عين الجمل؟

الشقادف وهيا زي الصندقة الخشب يلبسوها بالقماش والستاير ويزبرقوها وتنحط فوق الجمال

باين مافصفصتي الموضوع مزبوط
بالك اول لمن يسافرو من مكان لمكان الحريم لازم تكون حاجة تسترهم وتحميهم من البراد والشمس
فيسوولهم الشقدف

يجيبو اربعة الواح خشب ويسووها زي البيت كل لوح في جمب والسقف بعضهم يقفلوه بلوح خامس
وبعضهم يحطولو قماش متين للتهوية

الزرنباك / عين الجمل نوع من انواع المكسرات

ياستي الحج كلو مقدر بامر الله عز وجل
اللي ربنا رايدلو الحج رايح يحج ان كان مو دحين بعدين

بس لو الادمي قدر يحج واتوفرت الاستطاعة اللي قال عنها ربنا
يتوكل على الله
وربنا يبلغك الحج السنة هادي وكل مشتهي يسير نسويلك جوجو

المهم نكمل الشويتين

الحمد لله أهل مكة ربنا شرفهم بخدمة الحاج من أجداد أجداهم وعلين تقوم القيامة ربي لك الحمد والشكر
إنو خصنا بخدمة الحجاج والمعتمرين والزوار علشان كدة لازم اللي يخدم الحاجي يحط خوف الله في قلبو
ومايتجبر على الحجاج ويضحك عليهم ويغشهم مو علشان شي علشان ربنا يطرح البركة في الفلوس
اللي بتاخدوها يعني كانوا يبيعوا قارورة الموية ب4 وب5 قال أيش علشان نكسب وكاسة الشاهي بريالين
وهادا كمانة مهي مليانة ربعها فاضي وغير العصاير وغير وغير

لعلمكم بعض الحجاج يقعدو بالسنين وهم يجمعوا ويلملمو القرش على القرش ويحرموا نفسهم من حاجات كتييييرة علشان يحجو المفروض تساعدوهم والله بيوت في مكة كانت تفتح بيوتها سبيل للحجاج
أو على القليل تراعيهم في الأجرة واللي ماعندو يقلو ياعمي تعال اسكن وكل ببلاش انت البركة حقتنا


المهم الناس أغلبها كانت حالتها المادية ضعيفة ومايعلم بيها إلا الله بس هو بركة الستر زي ماتقولوا

يعني أول مايمسكوا فلوس الحج إلا تتفرتك وتروح زي السحر ولا مال الحرام مو زيها

السقا بالدين والخضري بالدين والفران بالدين وبياع الارزاق بالدين وكللللللو على الدفتر
يعني سوتمية خابور على قولهم ومايبقالهم الا تناتيش بسيطة يمشو نفسهم بيها

وغير كدة يجو الحريم وبعيونهم الضيقة يقولوا خلاص الراجل اشتغل وملى جيوبو خلينا ننفضها
وخد ياطلبات مرة المركب قديم وبدو تغير ومرة الطراريح مشقشقة ويبغالها تتنجد عن القطان
ومرة براميل الموية اللي في الخارجة بتشرشر موية وتهرب ويمكن هيا طلعت بمخراز والا بمفك
نسمت البرميل

كلللللو علشان تفكيرهم اللي يقول إزا كترت الفلوس في يدو الرجال رايح يتجوز من جد ناقصات عقل ودين ومطن مخلووووف

عيد اللحمة
أول حاجة العيد في مكة على قولهم يضيع بين الرجول
علشان الحج والزيطة والكركبة والدوشة مايبان عندنا العيد
بعكس مدن المملكة الباقية والعالم العربي ماشاء الله عندهم أفراح
وسهرات وتبشيكات علين يقولوا أمييييين

وحتى أهل مكة اللي بدهم يصلو يروحو للمساجد الكبيرة علشان يسلموا الحجاج وزحمتهم مو ماشاء الله الحرم كللللللو يطوف ويسعى مافيلو
مغرز إبرة تبارك الرحمن

مالكم بالطويلة المهم
ماشاء الله مايبقى بيت إلا وفيلو طلي يضحو بيه في العيد طبعا اللي مستقدر وربي فاتح عليه وكل مين حسب
استطاعتو ياكل منو ويتصدق شوية ويوزع للأهل والأرحام
واللي ماشاء الله عايلتو وجماعتو كتييييييييييييييييييييييييير يا يضحي بكم طلي والا يسويه ساتي ويوزع
عليهم كل بيت خومشة عيدان يهرمشو ويمرمشو بالهناااااا
ههههههههههه

طبعا زي منتو عارفين من 15 الحج علين محرم تقريبا أغلب الناس يبطلوا يشتروا لحم قيد عندهم لحمتهم في بيتهم
وحتى لو غلقت مايشتروا من برا لأنو أغلب الجزارين يروحوا للسلخانة ( المجزرة ) ويلملمو الدبايح ويرفعوها عندهم ويبيعوا منها للناس

فتلاقي الناس يقولوا لبعض أخصرك منهم اللحم هادا كلو فدو منى
والجزارين على قولة المسل إن ما حصل أحد يغشوا يغش أهل بيتو ( إلا مارحم ربي )

وغير المعمول والغريبة هادي حاجة اساسية في كل البيوت المكية
تقعدو تسمعو صوت القوالب الخشب
طاع طيع واللي ينقش بيدو وكل عيلة تتفن في التنقيش ويرسلو لبعضهم كم حبة معمول وغريبة دواقة


افتكرت حاجة قبل لا أقلكم مع السلامة سبحان الله دايما بعد الحج ربنا يرسل هديك المطرة اللي تغسل مكة غسيل وتطهرها من وسخ وعبل الحج

طبعا زي منتو عارفين أول كانت الكعبة تجلس زي ماهيا
يعني البيت والتوب مرخي زي ماهو لكن العجم وبالزات الايرانية
كانوا يخشوا للحرم ومعاهم مشارط وأمواس صغيرة ويجلسوا
ينخوروا ويقصقصوا من توب الكعبة علشان يستباركوا بيه
ويودوه لبلادهم بس بعد كدة خلو الكعبة كمانة تحرم زي الحجاج
يسير محد يمديه يلعب ولا يهبب

makkah butterfly
15 Jul 2007, 02:15 AM
اهلا بيك وبحكايتك الجديدة يا سي عمدة

وفعلا انا مانتبهت لتعريف الشقدف

بس لفت نظري

الشقدف لمن يكون مليان بالدبب والناس المتان اللهم صلي على النبي بعض الجمال تجلس تورور وتصنقر من الحملة علشان كدة كانوا يوزعوهم على كم شقدف
ودايما المتان يركبوهم في النص
علشان لايميل الشقدف على واحد جمب وينطق ضهر الجمل والا يجيلو أبهر البعيد


وسالتك السؤال..ولاني كنت مسعجلة نفس اليوم

عموما ياسيدي مشكوووور على انك نبهتني كثييير

ولحكاية الجديدة ماقراتها لسة لان الوقت متاخر..وانشاء الله

اجي واقراها على روااااااااق عشان ما افوت منها شي

تحياااااتي لك يا استاذي

حمامه الحرم
15 Jul 2007, 07:59 PM
لبيك اللهم لبيك لبيك لا شريك لك لبيك ان الحمد والنعمت لك والملك لا شريك لك

ماشا الله تبارك الله كانت حجه حلوه يا عمدتنا خفيفه ربي يتقبلها يارب
وعلى سيره الدبيحه دايما في الحج نعمل اكله مشهوره نعمل السلات نتجمع العيله كلها ماشا الله ونقطع اللحمه
وكبير العيله هو الي يطبخ السلات على الصاج

والمعمول يا الله لازم في الحج نعمل المعمول نصحى من بدري ونعمل المعمول لكل العيله عشان كل عيله ترسل للتانيه تتوقها معمولها
ماشا الله تبارك الله مايجي اخر الحج الا عندنا معمول ينفع للبيع
اللهم صلي على النبي

والله ايام الحج لها طعم خاص سبحان الله وتلاقي البلد كلها تمشي على قولهم كل الاشكال والالوان فيها

يارب بلغنا الحج يارب نحن وكل السامعين

وسلامتك يا عمدتنا ما تشوف شر ونحنا في انظار حكايه جديده منك يا سيدي

حمامه الحرم
21 Jul 2007, 05:01 AM
طول غيابك يا عمدتنا مكيفو كل يوم ندخل ندور ونبحث يمكن نلاقي قصه من قصصك
المميزه والرائعه

حتى سيدي العندليب ما بنشوفو ولا بنشوف قصصه الحلو والمشوقه

نحنا في انتظارها على احر من الجمر لا تتاخرو علينا

نقيب الحارة
22 Jul 2007, 09:03 AM
( تعامل المكاوية فيما بينهم وطيب نفوسهم )

ـ كان صاحب الدكان اذا فتح دكانه صباحا وفتح الله عليه بزبون .. وجاءه زبون آخر ورأى جاره لم يستفتح بعد . قال
للزبون ما عندي مطلبك تجده عند جاري رغم وجود السلعة المطلوبة فى دكانه

ـ نادرا ما يجلس رب الاسرة على سفرة الغداء ولم يجد انواعا من الطعام غير التي اشتراها صباحا .. حيث من العادة
ان تتهادى الاسر المتجاورة من طبيخ يومهم وتسمى ( الطعمة )

ـ كثيرا ما يحصل ان يدعو صاحب البيت قريبه او صديقه او من يعرف ممن لا يملك ارضا ببناء دور فوق بيته ليسكن به
هو وعائلته . دون مقابل مالي .. ولكن شراكة حبية وتكافل .

ـ كان الاب اذا ادخل ابنه المدرسة يقول للاستاذ لك اللحم ولنا العظم .. يعني لك الحرية المطلقة فى سبيل تعليمه .

ـ كان الجار أب للاطفال وكانه من صميم الاسرة يؤدب ويربي وينصح

ـ كان البيت الذى يسكنه نساء دون عائل رجل يلقى كل الاهتمام من ابناء الحارة كبارا وصغارا .. حتى ان ربة البيت

اذا جهزت عجين العيش تضعه على لوح العيش امام باب داره حتى اذا مر اي شخص ورءاه اخذه الى الفرن وخبزه

واعاده الى حيث اخذه دون طلب من الاسرة

ـ كان رب الاسرة اذا سافر ترك اهله وماله واولاده فى رعاية جيرانه دون ان يطلب منهم الرعاية

ـ كانت الزواجات تقام فى البيوت وتستمر الى ثلاث او اربعة ايام وكان جميع ابناء الحارة فى الخدمة وتسمى الفزعة

دون كلل او ملل بل بسعادة وفرحة وبهحة وكانهم جميعا اسرة واحدة .. وكذلك الامر فى المناسبات الحزينة

ـ كان الناس كل الناس يتزاورون شخصيا طوال ايام العيد وتسمى ( المعايدة )

والله لم يوقفني عن كتابة المزيد الا خوفي من ان اطيل فتملوا

حمامه الحرم
23 Jul 2007, 07:55 AM
سيدي نقيب الحارع فعلا اتحفتنا بالدرر الي قلتها كلام رائع
وياريت يرجعو اهل مكه زي زمان على قلب واحد
ونفسهم حلوه

الله يسلمك يا يبدي ويسعدك ولا تحرمنا من حكاياتك الحلوه

نقيب الحارة
23 Jul 2007, 09:43 AM
وياريت يرجعو اهل مكه زي زمان على قلب واحد
ونفسهم حلوه


عزيزتي حمامة الحرم :

هيهات ان تصحوا الضمائر فى نفوس بهتت .. وهيهات ان تسلو النفوس لغة المادة والمال .. وهيهات وهيهات وهيهات ..

نفوس طيبة مطمئنة .. سادت ثم بادت .. عفى عليها الزمن .. ذابت فى تراب الارض .. قطع ما بينها وبيننا النسيان والتناسي

اليوم يا عزيزتي لا يفصل بين الجار وجاره الا جدر واحد وبالكاد يعرف احدهم اسم الآخر ..

يستيقظ الجار صبحا ما ليجد جهة حكومية تطلب حضوره لشكوى مقدمة ضده من جار ولاتفه الاسباب ..

يقاضي الجار جاره لو تجرأ احدهما وفتح فتحة لا تتجاوز المتر المربع ..

تقوم الدنيا ولا تقعد لو تجرأ الجار ونصح ابن جاره ..

يحاكم المعلم لو تجرأ ومد يده بصفعة خفيفة على خد طالبه ..

قد يدرك الجار الوحيد فى شقته أمر الله .. فلا يعلم بموته الا بشم رائحة رفاته ..

وتتمنني ان تعود وشائج الرحم والتعاطف والتكافل بين مجتمع اثملته المادة وانساه المال حتى امه وابيه واخته واخيه ؟!!

فهيهات هيهات هيهات ..

فما علينا الا ان نتباكى فى زمن ليس للبكاء فيه حيزا الا على الريال ،،،

شكرا على ثنائك العطر الذى اخجل تواضعي

لك ازكى التحايا ،،،

مشخمط النمر
23 Jul 2007, 02:50 PM
انا حبيت احكيلك قصه صغيرة عن شقاوة وبراءة اهل مكه زمان وان شاء الله تعجبك مع انها متأخره حسب علمي بس مو مشكله اهم شي مشاركه لموضوعك الحلو .....

زمان كانو الاطفال في مكه وفي رمضان بالتحديد ما يسبوا الشقارة حتى في وقت الصيام ولما يجي وقت ادان المغرب يطلعو الاطفال لجبل المدافع وقبل الاذان بدقايق يقطعو الفتيل حق المدفع والرجال مسكين يولع الفتيل والمدفع مايطلق!!!

ويكرر المحاوله مرة تانيه وكل يوم وهو مو ملاحظ انه الفتيل مقطوع وبكده كسبوا الاطفال لعبتهم واخرو الادان ....هههههه


ان شاء الله تكون القصه عجبتكم لانه ابويا الي كان يسوي كده....... خخخخ


اخوكم حاشر التنين


(( لايوقف شي ياعيال ))

حمامه الحرم
24 Jul 2007, 01:03 AM
سيدي نقيب لقد دمعت عيني من الحقائق التي سطرتها
اصبحنا في الزمن الا المعرفه كلا مسؤول عن نفسه فقط وكل همه ارضاء ذاته
ولكن لا نفقد املنا بالعزيز القدير ان يعدينا على هدنا الذي عهدنا به

اللهم جمع قلوبنا يارب الاعلمين

اشكرك على مشاركاتك القيمه

حمامه الحرم
24 Jul 2007, 01:08 AM
ههههههههههههههههههههههههههههه

حاشر التنين مافي احلى من شقاوه الاطفال دايما حركاتهم وان كانت تعصب بس براءتهم تغفرلهم
بس دي مره جامده ههههههههههههههه

وربي يخليك الوالد ويريت تححفنا بقصص منو

تسلم على قصتك اللطيفه
والموضوع موضوعك وانا منتظره قصص جديده منك يا سيدي

نقيب الحارة
24 Jul 2007, 05:54 AM
يارب .. يا محقق الآمال ..

حمامه الحرم
24 Jul 2007, 09:29 AM
يا رب استجب يا رب العالمين

تسلم يا سيدي نقيب على الدعوه
وفي انتظار قصه جديده منك يا سيدي

نقيب الحارة
24 Jul 2007, 10:34 PM
حدث من اعماق الذاكرة

انا من عائلة توارثت خدمة ضيوف الرحمن ابا عن جد .. ( الطوافة )

قبل انشاء مؤسسات الطوافة كان كل مطوف يخدم حجاجه هو واولاده مستقلا من مكتبه فى بيته ..

ومن العادة ان يوظف المطوف مجموعة من شباب مكة وما جاورها ليعينوه على القيام باعباء مسؤولياته ..

كنت يومها فى خطوات العمر الاولى ..

فوجئت يوما باحد كبار الحجاج والمسؤول عن نأمين سكن حجاجه يطلب منى مرافقته لمشوار اجهل هدفه ..

فوجدت نفسي فى مكتب احد دلالي العقار .. الذى اتفق معه على استئجار دار لحجاجه فى حي الششة .. انتهى الحدث

الا انه بعد انقضاء الحج وبينما كنت جالسا فى مكتب والدى الذى صادف وجوده ..

دخل صاحب مكتب العقار وسلم وجلس بجانبي وسلمني ظرفا واخذ ضيافته وغادر ..

فتحت الظرف فوجدت به مبلغا من المال قدره 5000 ريال ..

سالني والدي ماهذا ؟!!! اجبته لا اعلم ولكني رافقت يوما الحاج فلان الى مكتبه واستأجر دار حجاجه ..

فكانت المفاجأة فيما قاله لي والدي وبالحرف الواحد ..

( اسمع كل الموظفين العاملين معنا لم يعملوا عندك من اجل المرتب الذى تعطه لهم .. كل آمالهم معلقة بما يكتسبوه من

إيجارات دور الحجاج ( دلالة ) وعليك ان تعتبر ان هذه المرة الاولى والاخيرة ان تشاركهم ارزاقهم )

لقد كان درسا لن انساه طيلة عمري ولا زلت ابني عليه الكثير من مواقف حياتي .

اعتذر عن الإطالة ..

مكاويه00
25 Jul 2007, 06:38 AM
[COLOR="Purple"][/COLORبسم الله الرحمن الرحيم00
كيف حالكم00
ياهووووووووو00
رجعتونا لزماااااااااان مرررررررره00
]وكل ما اتذكر زمان اتذكر رمضان ونحن نقضي أشياء العيد00
وكله كوم ويوم ماضاع عليا الفستان حق المشهد00
وراح ابويا الله يرحمه يجبلي واحد غيره00
وكان بغيرلنا البناجر كل عيد 00
على قولهم يبيع القديم ويدفع الفرق
مع الجديد00
وياسلالالالالالالام على يوم العيد00
لمن نطلع من الحرم على الدكاكين00
واللمبات الصفر الحلوة00
ولمبات ابو ألف 00
ههههههههههههههههههه
والعيال بالطراطيع00
واللقيمات والزلابيه من جنب الحرم شي شي 00
وياسلام على العيديات00
والريال الجديد 00
كأنه طول السنه ماناخد فلوس00
بس يوم العيد ليه طعم تاااني مرررررره00
وأحلى شي محمد عبده 00
ومن العايدين ومن الفائزين انشاالله00
والله يا ناس أهل مكه ما أتغيروا00
بس ماتوا الله يرحمهم 00
وجوااااااااا 00
بعض عيالهم مشيو زي ابهاتهم00
وبعضهم اتكبر وشاف نفسه مع النعمه اللي هوا فيها00
عشان كدا نحنا بنقول اتغيروا أهل مكه00
ولا مكه هيه هيه بس القلوب هيا اللي اتغيرت 00
وسلامي للجميع00

العندليب12
27 Jul 2007, 04:27 PM
السلام عليكم ورحمة الله وبركاته والله يا ستي حمامة الحرم آسف جدا على التاخير لكن حصلت عندنا ظروف عائلة انه اختي ولدت ولادتها كانت معسرة شويه لكن الحمد لله ربنا ستر المهم قلنا انه في الجواز بعد ماتنصب الكراسي والمفارش وتنشد التيازير طبعاهذا غالبا ما يكون في الضحى أو بعد صلاة الظهر طبعا تعرفوا جميعا انه الحارة كانت بيوتها بجانب بعض يعني فين وفين حتى تلاقي انه في يقعة شمس بالناس الموجودين والفزيعه بعضهم يستاذن بيروح يريح شويتين ويجي بعد العصر والبعض لا والله بيقعد ويشوف إذا في شي ناقص أوتعديل ونجيب الغدا وتغدى ونعبي براميل الموية حقت الغسيل ونحطها على براميل كبيرة مرتفعه شوية عشان الطرطشة ونحط تختها طشت عشا لا تطرطش على احد او تعمل زروطه المهم بعد المغرب نشوف ايش باقي عند الحريم من نواقص نحاول نكمله والحريم هناك مشغولين بترتيب البيت وتجهيز اللشاهي والقهوة وتجي هذي والله راح عن بالي اسمها هذي يلي تقص الشعر بالحلاوة والمنقاش هي يلي كانت معروفه عندنا الست فتو شوشو الله يديها الصحة والعافية ست كبيرة خلاص كبرت نقول عليها المقينة ولا ايش ؟ تجي وتزين اهل العروسة والموجودين يلي بيحب يعمل زينة المهم البيت في داك اليوم عبارة عن خلية نحل يلي بيغسل الصحون ويلي بيرص ويلي بيكنس كل واحد مشغول وتطلع الروائح الطيبة من بخور ومستكة وترويش الصغار وطبعا كانوا الصغار محظوظين لأنهنم كان عندهم لبسين لبس بيلبسوه أول الفرح ولبس بيلبسوه وقت النصه المهم عاد جا وقت الشغل المضبوط بعد صلاة العشا تبدأ وفود المدعويين تهل طبعا لكل واحد له مكانه حسب سنه ومكانته وتبدأ تباسي االشاهي والقهوة رايحه وجايه طبعا ما كان هناك عماله ولا اجيرة لا كانو كلهم عيال الحارة والفزيعه من الأقارب والأصدقاء وتبدا مراسم العرس وإذا كانت ملكة طبعا يبجي العريس يزفته والجسيس معاه وهات يا مجسات وبعد كده إذا ما صارت الملكة في الحرم يبدأ المملك بخطبتوا ويعلن الزواج وتوزع علب الملكة طبعا الجسيس والمملك كانوا ياخذوا علبتين تلاته ويتعشوا الناس وبيمشوا والعريس ياخذ مرتوا ويروح ويبدأ اخوان العريس والفزيعه بالكد بيشيلوا التيازير وبيفكوا اللمبات ويرجعوا كل شيء لحالوا وكانه ما صار شيء والحارة نظيفة احسن من تنظيف الكناس لها لأنه كل الزبايل الله يكرمكم كانت تحط في أكياس كبير و ونرميها أعزكم الله في براميل القمامة وبعد كده الواحد بيروح ينام نومه حتى ما بيشعر بلي حواليه

مكاويه00
28 Jul 2007, 04:53 AM
السلام عليكم ورحمة الله وبركاته00
وازيدكم كمان 00
كانوا الحريم لهم تلاته فساتين يلبسوها ليلة الفرح00
وطبعا هادولا اهل العروسه 00
واهل العريس00
واحد في اول الليل00
وواحدنص الليل00
وواحد قبل الزفه بنص ساعه 00
وكمان ما ننسى القهوجيه00
واللاعابه00
يعني المغنيه00
اللي تحي الفرح00
وتجي من بدري 00 مو زي دحين تجيكم الساعه 12 00
ويلا على بال ماتغني 00
ويا سلام على المييييييييز00
اقصد البوفيه يعني 00
ماكان في احد احسن من بدر 00
والتورته ابو سته سبعه ادوار00
والفرح يقعد الييييييييييين الصبح00
ودحين فيه ناس يواصلو افراحهم والطرب اليييييييييين بعد مايروح العريس مع عروسنه00
وللحديث بقيه00
وعقبال اللي ما اتزوجوا 00
واشوفكم على خير 00
و

السلام عليكم ورحمة الله وبركاتهالسلام عليكم ورحمة الله وبركاتهالسلام عليكم ورحمة الله وبركاته

حمامه الحرم
28 Jul 2007, 02:58 PM
سيدي نقيب الحاره ماشا الله تبارك الله
كل مره تفاجئنا بقصص تشمل الكثير من ىالدروس والعبر
بارك الله فيك وفي والدك الكريم
وادامكم الله لخدمه حجيجه واجزاكم عليه كل الخير

وفي انتظار المزيد من قصصك المشوقه

حمامه الحرم
28 Jul 2007, 03:03 PM
اهلا با حلى مكاويه

الله من جد رجعتينا لعيد زماان
وفكرتيني بالبناجر كل عيد لازم جديده ونفرح بصوتها هههههههههههههه
والعيديه ونضارب عليها
وفطور العيد في بيت العيله
من جد زكريات رااائعه
الله يعطيكي العافيه ولا تنسينا
كل ما افتكرتي شي من زمان تعالي حكينا هوا

حمامه الحرم
28 Jul 2007, 03:09 PM
اهلا سيدي عندليب والله افتقدنا حكاياتك يا سيدي
يلا الحمد لله على سلامه اختك ربي يطرحلها البركه في مولدها والف مبروك
بالنسبه للحكايه بصراحه ماشا الله عليك اسلوبك مشوق في سرد القصه حسينا كانو نحنا معاكم يا سلام على الجيران والاهل كيف كانو مع بعض الكل يحس انو دا فرحو
من جد ياريت نرجع زي زمان وحكايه الفرح مره حلوه
عقبال كل الاعضاء يارب الي لسه مو متزجويجين نفرحبهم

ولا تطول يا سيدي نحنا في انتظار حكايات جديده

حمامه الحرم
28 Jul 2007, 03:13 PM
مكاويه ماشا الله حكاياتك حلوه
والافراح ما شا الله شغاله اليومين دي ربي يديمها
ونفرح باعضاء المنتدى
وعلى قولك المغنيه ما تجي بدري ازا المعزيم جو بدري يون طيب
والكيكه هههههههههههههههههههه
عماره ماشا الله

شوقتنا والله على البقيه يلا لا تتاخري علينا بنستانكي

حمامه الحرم
31 Jul 2007, 02:50 AM
الموضوع واحنا مشتاقين للحكايات الحلوه الي بنسمعها منكم واتعودنا عليها
منظرينكم يا احلى مكاويه

نقيب الحارة
31 Jul 2007, 08:37 AM
هناك موقف ولو انه شخصي لكني ونحن فى ذكريات الانسانية العليا التى كان يتمثل بها اهل مكة .. اهلنا الذين رضعنا

منهم سمو المبادىء .. وعلو الهمم .. وجدت انه لا مناص من احكيه لكم ..

كنت صغيرا .. وكان لى عما يرحمه الله .. مولع بي يحبني كابن له .. حيث لم يرزقه الله الخلفة ..

كان حريصا على احضار كافة احتياجاتى الشخصية من جيبه الخاص .. رغم وجود والدي الذى لايقل حبا لي عن عمي ..

وفى احد الاعياد وعلى مجريات العادة .. اصطحبني عمي لشراء ملابس العيد ..

وفوجئت صباح أول أيام العيد أن الخادم الذى يعمل فى خدمة عمي يرتدي نفس ملابسي ..

وبحكم صغر سني أقمت الدنيا وحلفت ان لا اقعدها .. كيف يلبس الخادم نفس لبسي .. الامر الذى احرج عمي ..

فوجئت بطلب من والدي الى غرفته ..

طلب من الجلوس .. فجلست طائعا ..

سالني سؤالا .. هل انت انسان .. فاجبته على الفور نعم ..

فبادرني قائلا كذلك خادم عمك انسان مثلك ..

غير ان الحاجة اضطرته ليكون خادما ..

وانت اعطاك الله من خيره فلم تلزمك الحاجة بالعمل خادما مثله ..

ياولدي ... الانسان لا يدري ماذا تخبىء له الاقدار .. فاحرص على حب العطاء بقدر ما تحرص على حب الأخذ ..

اعتذر لعمك .. ولا تنسى ارضاء الخادم وتطييب نفسه .. فقد جرحته ..

فوالله مازلت اتعامل مع نفسي ومع من هو اكثر واقل مني بنفس نصيحة والدي .

حمامه الحرم
31 Jul 2007, 02:08 PM
سيدي نقيب الحاره الله بارك فيك ويجزاك الف خير
دورس وعبر بترويها ضمن حكايات تهدف الى الكثير من المعاني الساميه
الله يبارك في الوالد وفعلا دا الشي الي مفروض يسير
لانو زي ما اتفضل الوالد وقال انو هو انسان زينا مافي فرق بيني وبينه غير وظيفته
وطالما بيشقى ويتعب عشان يكسب بطرق شريفه دا يحتم علينا احترامه

عبره رائعه منك يا سيدي الفاضل و لا تحرمنا من المزيد من حكمك و رواياتك الرائعه
لك مني كل شكر وتقدير

مكاوية كووول
31 Jul 2007, 10:00 PM
والله يا حمامة الحرم ... ايش اقول بس ؟؟


ما شاء الله مواضيعك جنااااان


الله يسعدك ويوفقك ان شاء الله

لا ولا الحكاوي عن مكة احلى واحلى كمان



انا ادور لك كدة كم قصة من هنا وهنا واجي اكتبها ان شاء الله


يلا امر عليكم تاني ان شاء الله


سلامو عليكم

مكاويه00
01 Aug 2007, 10:37 AM
«®°·.¸.•°°·.¸¸.•°°·.¸.•°®»بسم الله الرحمن الرحيم00
السلام عليكم ورحمة الله وبركاتة00
وياصباااااااااااااااااحوووووووووووو00
ومدام الهرجه يا حلوووين عن العيد00
ما ننسى الفطووووووور 00
وما ادراك ما الفطور00
اييييييييييييييييششششششش لقيمات 00
وزلابيه00وآمبه00وقشطه00والمش00واللبنه00على فكرة في ناس يقولو على اللبنه 00حالوب00
والجبن والزيتون 00 وخير الله الكتييييييير 00
والحمد لله 00
واتذكرت مع دي الأكلات 00
المنفوووووووووووووووووووووش00
ههههههههههههههههههههههههههههه00
وداك الرجال اللي شايل الكرتون الكبير وهو طالع في الدرجه00
وطبعا عشان نحن في الشاميه00
يقوم يطلع الرجال من درجتنا على جبل هندي00
ايوه خلينا نرجع للعيد 00والعيدياات00
يا سلالالالالالالالالالالالالالام وانا كنت معاهم البنات والاولاد ونطلع ناخد العيديات من الجيران00
حلالالالالالالالالالالالاوه 00 وريال00
والعطر اللي ابو ضغط00اللي يبخبخ من اليد اللي زي جهاز الضغط بعيد عنكم 00
والله ما ادري ايش اللي كان حلو 00
العطر ولا الفلوس00
ههههههههههههههههههههههههههههه
المهم ناخدها ونجلس نعدها 00
هههههه
وكلها على بعضها ما تجي العشرة00
هههههههههههههههههههههههههههههههههههههه00
وكان لالالالازم عشان العيد وونبسط00
نروح الملاهي00
وطبعا ملاهي بدر مافي غيرها00
نقعد ننقز الييييييييييييييييييييين ما ندوخ00
ههههههه
ونرجع نرقد 00
ولا اللي بيشتغل حجر وطين00
ما يرقد زينا 00
والعيد طويل 00 مو زي دحين يومين ونحنا في المدرسه00
يلالالالالالالالالالالالالا00
لكل وقت آذآنه00
ونشوفكم على خييييييييير 00«®°·.¸.•°°·.¸¸.•°°·.¸.•°®»بااااااااااااااااااااا ااي:004:

مكاوية كووول
01 Aug 2007, 10:47 AM
مكاوية من جد العيد ليه طعم ايام زمان

هاشم السيد
01 Aug 2007, 04:36 PM
مشاركة قيمة بالفعل تسلم الايادي والسلام،،،

العندليب12
01 Aug 2007, 06:21 PM
السلام عليكم بدي احكي عن العيد في وقتنا كنا قبل العيد بليلتين أو تلاته نشوف الزين هديك يلي تطلع سواء في البسطات حقت الالعاب واللمبات يلي بتشتغل وتنطفي والحلوانية برضو بيركبوا هذي اللمبات والزين تملأ الشارع ونروح بنشتري الحلاوة والجبن والأمبة والزيتون والطراشي اتنين كيلو جبن مصري واحد كيلو زيتون نص كيلو أمبه كيلو حلاوة طحينية وكيلو حلاوة شامية بالفستق وساده ونص كيلو طرشي وتجي ليلة العيد الوالدة تحضر لنا الحنة وتحتنينا وتربط أيادينا بالخرقه ومكان رجولنا عشان لا نوسخ المكان بالحنة وكمان عشان الواحد لا ينام وبعد كده يحلم بحاجة ويروح يا كل الحنة نقوم في الصباح ونسمع تكبيرات العيد بحكم البيت كان قريب من الحرم وما كانت هذي البيوت يلي دحين ونقوم ونغسل ايدنا من الحنة ونلبس ونتروش وبعد كده نستعد ونفطر عشان بدع كده تبدأ تهل جموع المعيدين وطبعا نحنا كنا صغار يعني ما كنا نهتم كتير بالمعيدين المهم عندنا اننا نروح نعيد وناخذ العيدية لكن كانت امي إذا جو رجال تقعدنا وتقولنا عيب من حيستقبلهم اقعدوا استقبلوهم وبعدين روحوا وكنا نعد الثواني على جلوسهم عشان يروحوا طبعا عشان لا يحمىالجو ويحين أذان الظهر خلاص الشمس تحمى وتجلسنا امنا في البيت المهم العيد كان عيد من جد كانت في الليل تظهر البرزات كل عمدة حي يعمل برزة يستقبل فيها أهل الحي وغير اهل الحي وكل عمدة وشطارتوا بعضهم بيعمل حفل لمدة ثلاثة ايام العيد شعار ومغنيين ومزمار لساعات متاخره من الليل كنا بنخرج ونتفرج ونحس انه عيد مو زي دحين دحين عيد العافية المهم الله يعيد ايام زمان ونفرح بالعيد زي زمان

هاشم اولياء السيد
03 Aug 2007, 03:17 AM
خبرني يا بيت جدي الله يرحم اللي بناك
كيف حالك بعدي ولا الزمان نساك
فاكر يا بيت جدي كيف كنت انا وياك
لما كنت انا لوحدي أسهر ليالي معاك

خبرني يا بيت جدي مين برشلك الحوش
و قلي من بعد خيرك مين يسوي الشاي بالدوش
و مين يبخر شِرابك و مين بيلمع الشربوش
و مين يرخم الدهليز اللي من أيام الصبا منقوش
و أخبار سيبك أيش اللي بالفرح مفروش
و ليالي النمسية كيف و طرفها اللي كان مخشوش
و مين بيقزقز الترمس و مين بيقرمط المنفوش
و مين يوقف على بابك يستنى التلاته قروش

و خبرني يابيت جدي كيف حال جدرانك
كيف قاعتك يا بيت و كيف أخبار ديوانك
و الله وحشتني بالحيل و حشني صرير بيبانك
و حشتني الرسلة و الزنبيل و أسيابك و روشانك
و حشتني دعسة السقا على أعتاب درجانك
و حشني النمنم أبو ديل و بساسك و فيرانك
و البعبع و هول الليل و عفاريتك مع جانك
و حشتني أشجار النيم و مرافعك و زيرانك
و حشني كوم البرسيم و دجاجك و قفصانك
أيام راحت يابيت جدي في كل ركن لنا حكاية
هنا قنعة هنا بيشة هنا جامة هنا ملاية

هنا كانت مدورات ستي و محارمها و مصلاية
هنا الكوبر و السيسم الخشبي و مشقرة قديمة و مراية
هنا كان كمر جدي و بسطونوا و تكاية
هنا يرج عمة الحلبي و هنا كوفية منشاية
هنا كان رحل القرآن و هنا معلقين آية
هنا بيت المراوح كان و الطراريح بدقديق مغطاية
هنا مكوى أم الفحم و مويه بخ في كوباية
هنا شربة هنا دورق بالزمزم محلاية
هنا مغراف هنا مشرب بريحة الخير منداية
هنا سماور و بيت منقل و بخور في صرة مخباية
هنا نعناع هنا فوفل و شامي و لامي و مسكاية

هنا كان المركب فوق صحون رايحة و صحون جاية
هنا خرقة هنا صندوق و قفة من السقف مدلاية
هنا بيت البسة حق العيش هنا نحسان مكفاية
هنا بيت الملاعق كان و كومة رز منقاية
هنا بكرج هنا كفكير هنا منخل و مصفاية
هنا مرقة هوا و مكمور و عجينة بشاش مغطاية
هنا غريبة و معمول هنا كنافة مسقاية
و بخاخة و طباخة و تنكة كاز معباية
هنا تطبخ لنا ستي بايدها الحلوة المحناية

كدا كنا هنا عايشين قصو حب بلا نهاية
هنا تعلمنا معناة عيب هنا تعلمنا ياساتر
هنا تعلمنا احترام الشيب و نسوي للكبير خـــــــــاطر


الأستاذ الكبير و الشاعر / محمد قشقري

حمامه الحرم
04 Aug 2007, 12:58 PM
اهلا استيتا كووول نورتيني في موضوعي وانتظر قصصك الحلو
يلا دوري من هنا ومن هنا وحطيها بسرعه

هههههههههه

اهلا بيك في اي وقت يا ست البنات

حمامه الحرم
04 Aug 2007, 01:05 PM
مكاويه الله يسعدك
وكل سنه وانتي طيبه
بصراحه حكايات العيد ما تنمل ومافي احلى منها
وخاصه فطور العيد بالاضافه لما قلتي في المنزله والمختوم والدبيازه مع العيش الحب

والعيده يا الله نضارب على بعضنا عشان ناخدها

والله زكريات حلوه ياريت كل مره تزكيرنا بيها

حمامه الحرم
04 Aug 2007, 01:13 PM
سيدي العندليب ربي لا يحرمنا من قصصك الحلوه
والعيد مهما قلنا فيه ما يخلص الكلام
ومقاضي العيد لها طعم تاني وفطور العيد وجمعت العيله
والعيديات لما نروح ونعيد على بعض
الله يبلغنا واياكم رمضان والعيد واحنا بصحه وسلامه وحياه سعيده يارب

حمامه الحرم
04 Aug 2007, 01:20 PM
سيدي هاشم اشكلرك من قلبي على مشاركتك الفاعله
وعلى القصيده الرائعه للشاعر محمد قشقري

وانا بصراحه سمعت ليه قصائد اخرى لها نفس الروعه
بيت سيدي
بيت العيله
زقاقنا القديم

وغيرها من القصائد الي تحكي عن تراثنا الحجازي

تسلم يا سيدي على مشاركتك ولا تحرمنا جديدها

زهرانية جياد
05 Aug 2007, 09:45 PM
حسيت اني ابغى ابكي لاني حنيت لهديك الايام جياد واهلها ومكة وناسها الطيبين افتكرت لما ابويا الله يرضى عليه كان اسبوعياً يودينا عرفة نلعب الين ماينقطع قلبنا وكنا نروح ابحر الي كانت بحر من جد مو زي كورنيش اليوم كنا نروح نقضي اكلنا من السوق الصغير وملابسنا وبخورنا من المدعى كنا في رمضان ينصبو لنا في برحة الطفران مراجيح والعاب كنا ناكل البليلة والسمبوسة اللي تنقلي قدام عيوننا ولا في العيد كنا نلبس ملابسنا الجديدة وننزل نصلي المشهد في الحرم ويعطينا ابويا العيدية وكنا نشتري العاب مافي زيها دحين كان طعم التميس والفول مختلف له طعم تاني كان زمان احلى افتكر مكة زمان كل مااسمع اذان علي ملة والحضراوي كل مااشم عطر ابو طير اه اه يامكة اتولدت فيك وعشت على ترابك الطاهر الله يرحم الي ماتوا ذكرتينا يا حلوة بزمان بس مو زي زمان العمدة الله يطول في عمره

مكاويه00
06 Aug 2007, 10:37 AM
«®°·.¸.•°°·.¸¸.•°°·.¸.•°®»يا صباااااااااااااااااااح الحكاوي00:004:
و الذكريات الجميله 00
يا صبااااااااح الحب00:a72:
و النسمه العليييييله00
اللي ترد الروح00
و تخلي الواحد عاااااااايش00:128:
في خييييييييييييااااااااااااااااال00
فاكرييييييين يا حبايب 00:a77:
لمن كانت تجي المطرة ايييي نسوي 00
اللي يتفرج عليها00:a21:
و اللي يحط صحون تحت سقف بيته 00
عشان المطرة بتنقط عليه من السقف00
هادا غير اللي كان يحط الطشوت في الحوش 00
عشان نشرب من موية المطرة00
و يا سلالالالالالالالالالالالالالالالالالالام 00
لمن تسمع صوت المطر فوق الواح الزنك00
تش تش طع طع طع تش تش طع تش 00
هههههههههههههههههههههه
ولا السيل لمن ينزل من الدرج00:a83:
تششتتتشششتتتششششششششششتتتششششتشتشتشتشتتش00
ههههههههههههههههههههههه
حلوة حكاية وصف الصوت00
تخلي الواحد داخل في الجو00
هادا لمن كان يجي المطر00
لكن اياااام الحر 00:125:
الله يخلي الكونديشن00
ابو مويه00
ونبلل الخيشه و نحطها عليه00:247:
قال يبردنا قال00
شكلوووو كنا نحنا بنبردو00
ههههههههههههههههههههههههههه
و لا الشراشف يا عيني 00:)
اللي نبلها ونعصرها كدا نص عصرة عشان يكون فيها شوية طراوة00:rolleyes:
آآآآآآآآآه لك الحمد يا ربي على كل حاجه00
عوضت صبرنا خير00:213:
يا جعلها من حسن الى احسن ليا وليكم 00
مع حسن العمل والعبادة والقبول:127: 00
قولووووو00
آآآآآآآآآآآميييييييين00
و للحديث بقيه00
بااااااااااااااااااااااااي00:004: «®°·.¸.•°°·.¸¸.•°°·.¸.•°®»

هاشم اولياء السيد
07 Aug 2007, 03:05 PM
ولا اروع من كدا جزاك الله خير والسلام

حمامه الحرم
15 Aug 2007, 02:27 AM
زهرانيه اجياد فعلا حسستينا قد ايش مكه كانت حلوه زمان
وخاصه طيبه اهلهى
ولكن الى الان الحمد لله مازال الخير فيها وفي اهلها
الله على الكلام الي قلتي من جد الحنين لايام زمان

تسلمي يا استيتا على كلامك الرائع وياريت دايما تفكريني كيف كانت مكه زمان

حمامه الحرم
15 Aug 2007, 02:32 AM
مكاويه ربي يسعدك على حكاياتك الرائعه
فكرتيني لما كانت تجي المطره كنا ننزل عشان نشرب منها ونحط الكاسات عشان تتعبا مويه
وعجبتني الطريقه الي كنتو تبردو نفسكم بيها
والحمد لله دحين كل شي اتغير

تسلمي يا مكاويه على قصصك وفي انتظار بقيتها

حمامه الحرم
15 Aug 2007, 02:34 AM
سيدي هاشم اسعدني مرورك
وفي انتظار قصه من قصصك الرائعه

حمامه الحرم
16 Aug 2007, 12:09 AM
فين المكاوين وقصصهم الي عودنا على اتحافنا بيها
نحنا في انتظار راوئعكم

لا تحرمونا من قصصكم الجميله

بنت العزيزيه
17 Aug 2007, 02:06 AM
موضوع رائع وقصص اروع
اوقدت حنينا للماضي جعلتني اهرب لوهله من الزمن الي وحملتني الي تلك الايام بالرغم اني لم احظى سوي بالقليل منها
مستنين اجمل القصص ونحن في انتظار اصحاب الكنز الدفين
تقبلو تحياتي

الفرح والسرور
19 Aug 2007, 01:43 PM
الله واكبر على ايام زمان


ان شاء الله راح امخمخ كده بقصه راح الجميع ينبسط منها


شكرا على الموضوع الجميل

حمامه الحرم
20 Aug 2007, 02:06 AM
اهلا بنت العزيزيه نورتي الموضوع
ويلا استنى منك قصه كده عن زمان اسالي دادي وتعالي حكينا

يلا لا تتاخري

حمامه الحرم
20 Aug 2007, 02:11 AM
اهلا بنت العزيزيه نورتي الموضوع
ويلا استنى منك قصه كده عن زمان اسالي دادي وتعالي حكينا

يلا لا تتاخري

قمر طيبه
12 Sep 2007, 07:02 AM
السلام عليكم ورحمة الله وبركاته

شكراً لك عالموضوع الفلللللللللللللللللللللللله

والله الزمان أتغير
والناس أتغيرت


مافي إلا نددعي إنو نرجع لأيام زماااااااااااااااااااان

أيام الفرح والأخوةو...و...و...


شكرا ياقمر عالموضوع

حمامه الحرم
12 Sep 2007, 11:40 PM
اهلا قمر طيبه
من جد ياريت يرجع زمان وترجع النفوس الطيبه

وازا افتكرتي اي قصه حلوه تعالي حكينا

وشكرا على مشاركتك

قمر طيبه
13 Sep 2007, 07:41 AM
يانااااااااااااااااااااااااس ليش منكم راضين تصدقو إني ولد؟

اسمي قمرطيبه

كلموني على إني ولد ممكن؟

الله يسعدكم يارب

نجدية
15 Aug 2008, 10:14 PM
ماشاء الله روووووووووووووووووعة ايام زمان

غجرية مكة
21 Aug 2008, 03:36 PM
مشكورة حمامة الحرم على الموضوع الرائع دا
من جد رجعتينا لايام زماااااااااااان

تحيااااااتي

ورد مكه 2005
29 Aug 2008, 05:51 PM
يعطيك العافيه اخي الكريم

فكرة جميلة ورائعه

شامخ الاحساس
30 Aug 2008, 09:23 AM
كل الشكر لصاحبة الطرح
والشكر ايضا موصولا لاخينا محمد مكيفو فقد افاض فيما قال واجاد
صحيح كانت الحياة في بنيانها بسيطة لكن انفس الناس كانت مليئة بالحب والامتنان للجميع

اضافة بسيطة ولو اني لست خبيرا في السرد لكن خذوا مني المقسوم
كانت بعض البيوت القديمة في اكثر حواري مكة ولكن اخص بالذكر واللي شفته بعيني في حارتي جرول وحارة الباب اقول فيه بيوت تصل الى خمسة ادوار مبنية بالحجر ويربط بين البنيان الواح من الخشب السنديان القوي
وفي معظم المباني لا يستخدم الاسمنت وانما النورة
ومن اساسيات تلك البيوت وجود حنفيات ( حافظات) الماء من نفس المباني يعني من الحجر والمليسة اما بالاسمنت واما بالنورة وبشكل ثنائي يعني فتحة جهة حمام الرجال وفتحة ثانية غير مرئية جهة حمام العايلة
واللي يغرف من هادي الجهة ما يشوف اللي في الجهة التانية

هذا ما يحضرني في هذه المداخلة العاجلة
ارجو ان تصحح من قبل الاقدر مني على التوضيح
وسلامي للجميع

أحلام كبيره
06 Jan 2009, 02:39 AM
الله يعطيكي العافيه حمامه


حلوه الحكايه مررره :)


أناأفتكر وحده حكايه بس .. كانت ماما تحكيني هيا

اسمها ( عم عفان واللبان )

وماتتعلق بمكه .. يعني حكايه عاديه

بس ماتتنسي ههههههه

أنوووس
08 Jan 2009, 03:00 AM
~*¤ô§ô¤*~*¤ô§ô¤*~كان يا ما كان في قديم الزمان ولا يحلى الكلام الا بذكر المصطفى عليه الصلاة والسلام
اللهم صل على سيدنا محمد وعلى اله وصحبه وسلم
اتذكر انو الناس في البيوت كانت تصحى قبل الفجر وتسمع الناس بيصحو اهلهم ويستعدو لصلاة الصبح وكان عم محمد ينادي على عم صدقة وعم عباس وعم محمود وعم عبادي وولد جارهم اليتيم حمتو ليروحو يصلو في الحرم وطول مهم ماشيين في الطريق يسبحو ويذكرو الله ويصلوا على حضرة سيدنا النبى ( اللهم صل على سيدنا محمد وعلى اله وصحبه وسلم )يذكرو بعض وينبهو الغفلان والنايم للصلاة ، ولما يوصلو الحرم طبعا قبل الادان الى يصلى والى ياخدلو سبع ، وبعد الصلاة يجلسو يسبحوا الين ما تطلع الشمس ويصلو الضحى ، وبعدين يرجعو لبيوتهم وهم مارين على السوق ياخدو الفول والشريك ، ولما يوصلو الحارة كل واحد يروح لبيتو (الحجه ) الزوجه تكون محضره الفطور وبعد الفطور كل واحد يتسهل على شغلو الاب على العمل والعيال على المدارس والكتاتيب والام على شغل البيت

كانت حياة بسيطه مليانا ايمان مو زي دحين~*¤ô§ô¤*~*¤ô§ô¤*~[/frame]

مستكة
05 Feb 2009, 11:15 AM
طيب .. بما اني مو من مكة

فراح اكتفي بقراية قصصكم الحلوة

رائدنعمان
07 Jan 2010, 01:30 AM
موضوع جميل فعلا ...استمتعت بقراءته كثيرا
جزاكم الله خيرا.

البركه
08 Jan 2010, 04:43 PM
احسنت وجزاك خير

رعشة دفا
18 Jan 2010, 11:48 PM
الموضوع برمته مشوق والله يعطيكم العافية
والذكريات وايام زمان ماننساها
بروعتها في حلوها ومرها ويشكر عمدتنا الفاضل
وجميع من ساهم في سرد القصص التي مازالت في
مخيلة كل من عاش زمانهم واشتاق للقلوب الطيبة حقين الفزعة
تحية خاصة لاحلى جيران علي كراته والناس الطيبة
ونقول للي راحو الله يرحم موتانا وموتاكم
والدنيا لسا بخير فمازالت بعض الاسر متمسكة بالماضي وعاداتهم
والله لايقطعها من عادة ويبارك في اولادنا واولادكم اللهم أمين عقيل
واتمناان تكون حلقات او مسلسلات تلفزيونية توضح للجيل الجديد
عن عيشة ابائهم واجدادهم زمان
ومعذرة فانا نادرة التواجد بالمنتدى والمشاركة
ولكني احن اليه واقرأ ماشاء الله
واحب ان اشارك هذه المرة بحاجة بسيطة
وهو العسا
واللي ينصب الاتاريك فبل المغرب بالحواري
وتذكرت ايام بير زمزم والرجال اللي يصب الزمزم بالمغراف
وبعدها صاريستعمل لي كبير الان يالله نقدر نملي ونستناطابور وبالقطارة يصب
بعد ماكنا نتروش من زمزم من قوة تدفقه ماشاء الله
وبالست اللي تقعد بالحرم وتفرش السجاد الكبير
لزوار الحرم وهما اغلب مايكون من اهل الرياض
وتكون لابسة برقع كانها قطرية كنت اخاف منها ههههههههه
عاد صغاروكنا نعمل للكبير حساب مو زي هذا الجيل اللهم ياكافي
وبيدها المروحة الخزف والدوارق جنبهاوشويةختم وتضيفهم بالقهوة
والتمرة وريحة الهيل تمخمخ الراس
بس تنش بالحصى وتبعد الاطفال من جنبها
وعاد نحنا نخرج نشتري منفوش من ناحية المسعى وناكله بالحرم
ع فكرة فيه بخلف سوق العتيبية منفوش مقارب لطعم زمان
باقي بيض الكوكو تعبت وانا ادور زي حق زمان
كان فترة باع المستهلك اللي بجرول شبهو بس قطع مايصير يبيعو
المهم
ونخرج من الحرم بعد العشاوعلى طول عند علي حلواني ناخذ اللبنية
والطحينية والمفروكة وحلاوة الشامي
وبطريقنا الشريك ابوشمر وحبة سودة ودغري ع البيت
مدخدخين ندور النوم من الجري بالمسعى والحرم نمترو
الله يرحم دحين ضعفناوالحرم مانشوفة الا اذازلينا من جنبه
واتذكر الست اللي يتجمعو عندها اهل الحارة وحولها
اباريق الشاهي والفناجين والقهوة ساعة العصرية
والمرأة كان خروجها بالعصر مايأذن المغرب اللي وهي بالبيت
وكمان السقا الله يذكره بالخير ونحسبلو لحد مايملي
الخزان الطين وغطاه خشب اللي بالحمام اكرمكم الله
وايام التنكة والموية من البازان
تصدقو بعض الناس مايعرفو ايش يعني المغراف التوتواء
ولا الابريق لا الحديد ولاالباغة اقصد البلاستك ولاحتى يستعملو
والطباخة والفتايل والاتريك ابو فتيلةوالدافور وغسيل الملابس
وزير الموية والنامسية المنصوبة والموية اللي تترش قبل المغرب
عشان يبرد المكان قبل اللليل مايليل
والله يرحم زمان الزنبيل والمقاضي شفت رجال قبل فترة بالشارع شايلو
قلت الله يازمااااااااان
وشايل بيده زبدية الفول قلت لسا فيه ناس عايشة من زماننا بعاداتهم
ذكرني بالفول من القرارة والتميس الملبلب
والكعك من سوق الصغير كان لهم طعم
وتذكرت السديرية بالازارير الذهب تلبسهاام العريس والمدورة المطرزة
والفوطة اللي كانت تلبسهاالست بالبيت كانت صحيح ايام صعبة
والله ع ايام العيد العطور
والدبيازة وريحة الانبة تشمها تذكرك بالعيد والزلابية
والهريسة واللقيمات
ضحكت ع الريال كان لما طلع الاكابر يوزعوه بالعيد
هو والقهوة البيضة الحلوة ام اللوز والمعروف انها ماتنشرب
اللي اذا احد نجح نقولها قهوة الناجحين
او شراب التوت اوالبرتكان
الله يرحم لما خرمت اذني اعطوني قرشين من الكبيرة
واختي اعطوها اربعة قروش برضو الكبيرة الفضة
ايام الملك فيصل وخالد الله يرحمهم ويافرحتنا ان مكتوب عليها ويطعمون الطعام على حبة
فكانت بعض الفلوس الفضة بفئاتهاعليها ايات صغيرة
اللي قد الريال لماطلع الريال الفضة اللي الان ماهم راضين يعترفوبه الاطفال
يبغو من ابو الورق
والله يرحم الفستان المقصب والشنطة تتملا حلاوة
والتوت بالاكياس والايسكريم بعلب الجاموس الصغيرة كان زمان لما اتطورت
الدنيا صار حليب ابو ولد الله يرحم حليب الغنم اللي اتربينا عليه الان كله معلب
ماعلينا
كان حليب بهيل تفرغو الحرمة كان بخمس هلللات والان نشربو برمضان كمشروب بارد
من ضمن القمر الدين الحمر اللي هو تمر هندي
على فكرة اخوي مازال محتفظ بقروش الهلل ايام زمان
وكل فئة قديمة الى الان ورقية وفضية نطالع فيها
واسعدني جدا جميع من شارك بهذا الطرح الجميل والشكر للجميع
وعسى الله يختم لنا ولكم بالخاتمة الطيبة واسفة ع الاطالة والله
يعطينا ويعطيكم الصحة في طاعة الرحمن اللهم أمين عقيل

مــيمي
01 Feb 2010, 06:52 AM
من جد موضوع مميز احب اشكر كل الي شارك فية وياريتني
عشت في داك الزمن ....ومحد مكيفو ماشاء الله علية ماقصر ربنا يعطية طولت العمر...
رعشة دفا اخدتينا بوصفك لأماكن حلوة ومواقف احلى الله يسعدك كمان وكمان...

مــيمي
01 Feb 2010, 06:54 AM
من جد موضوع مميز احب اشكر كل الي شارك فية ومن وصفكم
اتمنيت إني عشت في داك الزمن ....ومحد مكيفو ماشاء الله علية ماقصر ربنا يعطية طولت العمر...
رعشة دفا اخدتينا بوصفك لأماكن حلوة ومواقف احلى الله يسعدك كمان وكمان...